କେନ୍ଦ୍ରକୁ ଚିଠି ଲେଖିଲେ ମୁଖ୍ୟମନ୍ତ୍ରୀ : ଦଳିତ ଛାତ୍ରଛାତ୍ରୀଙ୍କ ବୃତ୍ତି ଅର୍ଥ କଟା ନ ଯାଉ

କେନ୍ଦ୍ରର ଭାଗ କଟାଯାଇଥିବାରୁ ଅସନ୍ତୋଷ

ଭୁବନେଶ୍ବର ଦଳିତ ବର୍ଗର ଛାତ୍ରଛାତ୍ରୀଙ୍କ ମାଟ୍ରିକ୍ ପରବର୍ତ୍ତୀ ଛାତ୍ରବୃତ୍ତି ପାଇଁ ପ୍ରଦାନ କରାଯାଉଥିବା ଅର୍ଥରୁ କେନ୍ଦ୍ର ସରକାର ତାଙ୍କ ଅଂଶକୁ ଗତ ବର୍ଷ ଠାରୁ କମାଇ ଦେଇଛନ୍ତି। ଫଳରେ ରାଜ୍ୟ ଉପରେ ଅଧିକ ଆର୍ଥିକ ଭାର ପଡ଼ୁଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏ ନେଇ ଅସନ୍ତୋଷ ପ୍ରକାଶ କରିବା ସହ କେନ୍ଦ୍ର ସାମାଜିକ ନ୍ୟାୟ ଓ ସଶକ୍ତିକରଣ ମନ୍ତ୍ରୀ ଟି ସି ଗେହଲଟଙ୍କୁ ଚିଠି ଳେଖିଛନ୍ତି। ପୂର୍ବ ପରି ଛାତ୍ରବୃତ୍ତି ପାଇଁ କେନ୍ଦ୍ର ଓ ରାଜ୍ୟ ମଧ୍ୟରେ ଥିବା ଢାଞ୍ଚାଗତ ଆର୍ଥିକ ଅନୁଦାନ ବ୍ୟବସ୍ଥା ୯୦:୧୦କୁ ପୁନର୍ବାର ଚାଲୁ କରିବା ପାଇଁ ମୁଖ୍ୟମନ୍ତ୍ରୀ ଦାବି କରିଛନ୍ତି।

ଶ୍ରୀ ପଟ୍ଟନାୟକ ତାଙ୍କ ଚିଠିରେ ଦର୍ଶାଇଛନ୍ତି, ରାଜ୍ୟ ସରକାର ସମାଜର ଦୁର୍ବଳ ବର୍ଗର ଲୋକ, ବି‌େଶଷ କରି ଅନୁସୂଚିତ ଜାତି ଓ ଜନଜାତି ଛାତ୍ରଛାତ୍ରୀଙ୍କ ଗୁଣାତ୍ମକ ଶିକ୍ଷା ଉପରେ ଗୁରୁତ୍ବ ଦେଇ ଆସୁଛନ୍ତି। ଅନୁସୂଚିତ ଜାତିର ପ୍ରାୟ ୨ ଲକ୍ଷ ଛାତ୍ରଛାତ୍ରୀଙ୍କୁ ଉଚ୍ଚଶିକ୍ଷା ପାଇଁ ମାଟ୍ରିକ୍ ପରବର୍ତ୍ତୀ ବୃତ୍ତି ପ୍ରଦାନ କରାଯ‌ାଉଛି। ଏହି ବୃତ୍ତି ସମ୍ପୂର୍ଣ୍ଣ କେନ୍ଦ୍ରୀୟ ପ୍ରବର୍ତ୍ତିତ ଯୋଜନା। ୨୦୧୬-୧୭ ଆର୍ଥିକ ବର୍ଷ ପର୍ଯ୍ୟନ୍ତ ଏ ବାବଦରେ ଖର୍ଚ୍ଚ ହେଉଥିବା ଅର୍ଥର ୯୦ ପ୍ରତିଶତ କେନ୍ଦ୍ର ସାମାଜିକ ନ୍ୟାୟ ଓ ସଶକ୍ତିକରଣ ମନ୍ତ୍ରଣାଳୟ ଦେଉଥିଲା ବେଳେ ଅବଶିଷ୍ଟ ୧୦ ପ୍ରତିଶତ ରାଜ୍ୟ ସରକାର ବହନ କରୁଥିଲେ। ୨୦୧୬-୧୭ରେ କେନ୍ଦ୍ର ସରକାର ୨୧୫.୮୦ କୋଟି ଟଙ୍କା ଦେଇଥିଲା ବେଳେ ରାଜ୍ୟର ଅଂଶ ଥିଲା ୨୨.୪୮ କୋଟି ଟଙ୍କା।

କିନ୍ତୁ ୨୦୧୭-୧୮ରେ ଏହି ବୃତ୍ତି ବାବଦକୁ ସାମାଜିକ ନ୍ୟାୟ ଓ ସଶକ୍ତିକରଣ ମନ୍ତ୍ରଣାଳୟ ରାଜ୍ୟ ସରକାରଙ୍କ ଉପରେ ଆର୍ଥିକ ବୋଝ ଲଦି ଦେଇଛନ୍ତି। ଏହି ବୃତ୍ତି ଖର୍ଚ୍ଚର ରାଜ୍ୟ ସରକାର ୮୦ ପ୍ରତିଶତ ଅର୍ଥ ବହନ କରିବାକୁ କୁହାଯାଇଛି। ୨୦୧୭-୧୮ରେ ରାଜ୍ୟ ସରକାରଙ୍କୁ ୨୩୮.୨୮ କୋଟି ଟଙ୍କା ଦେବାକୁ ପଡ଼ିଥିଲା ବେଳେ ସାମାଜିକ ନ୍ୟାୟ ଓ ସଶକ୍ତିକରଣ ମନ୍ତ୍ରଣାଳୟ ମାତ୍ର ୩୫.୧୨ କୋଟି ଟଙ୍କା ଦେଇଥିଲା। ୨୦୧୮-୧୯ରେ ମଧ୍ୟ ସମାନ ସ୍ଥିତି ରହିଛି। ଛାତ୍ରବୃତ୍ତି ଅର୍ଥ ପ୍ରଦାନରେ କେନ୍ଦ୍ର ଓ ରାଜ୍ୟର ଅଂଶରେ ଏପରି ଅତର୍କିତ ପରିବର୍ତ୍ତନ ବୃତ୍ତି କାର୍ଯ୍ୟକ୍ରମକୁ ଶକ୍ତ ଧକ୍କା ଦେଇଛି। ତେଣୁ ଛାତ୍ରବୃତ୍ତି ଯୋଜନାକୁ ସ୍ବାଭାବିକ ଭାବେ ଜାରି ରଖିବା ପାଇଁ ପୂର୍ବ ପରି କେନ୍ଦ୍ର ଓ ରାଜ୍ୟର ଅନୁପାତ ୯୦:୧୦ ରଖିବାକୁ ମୁଖ୍ୟମନ୍ତ୍ରୀ ଦାବି କରିଛନ୍ତି। ଏ ନେଇ କେନ୍ଦ୍ର ମନ୍ତ୍ରୀ ନିଜେ ବ୍ୟକ୍ତିଗତ ଭାବେ ହସ୍ତକ୍ଷେପ କରିବାକୁ ସେ ଅନୁରୋଧ କରିଛନ୍ତି।

ସମ୍ବନ୍ଧିତ ଖବର