ରାଜନଗର: ପାରିବାରିକ କଳହ କେତେ ଯେ ଭୟଙ୍କର ହୋଇପାରେ ତାର ଜ୍ୱଳନ୍ତ ଉଦାହରଣ କେନ୍ଦ୍ରାପଡ଼ା ଜିଲ୍ଲା ରାଜନଗର ଥାନା ଅଂଚଳରେ ଦେଖିବାକୁ ମିଳିଛି । ଘରେ କେହି ନଥିବା ବେଳେ ୬୫ ବର୍ଷର ଶଶୁରକୁ ୨୭ ବର୍ଷର ବୋହୂ ଶିଳପୁଆରେ ଛେଚି ମାରିଥିବାର ଅଭିଯୋଗ ହୋଇଛି । ବାପାଙ୍କୁ ଭାଉଜ ମାରିଛନ୍ତି ବୋଲି ଅବିବାହିତା ଝିଅ ରାଜନଗର ଥାନାରେ ଲିଖିତ ଅଭିଯୋଗ କରିଛନ୍ତି । ଘଟଣା ସଂପର୍କରେ ପୁଲିସ ଖୋଳତାଡ ଜାରି ରଖିଥିବା ବେଳେ ସାଇଂଟିଫିକ ଟିମ ପହଁଚି ତନଖି ଆରମ୍ଭ କରିଛନ୍ତି । ଶଶୁରକୁ ବୋହୂ କାହିଁକି ମାରିଲା, କ’ଣ କାରଣ ହୋଇପାରେ, ପାରିବାରିକ କଳହ ନା ଅନ୍ୟ କିଛି କାରଣ ରହିଛି ସେ ନେଇ ଅଂଚଳରେ ଚର୍ଚ୍ଚା ଲାଗି ରହିଛି । ତଦନ୍ତରେ ସନ୍ଧାନୀ କୁକୁରର ସହାୟତା ନିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ରାଜନଗର ଥାନା ଅନ୍ତର୍ଗତ ରିଘାଗଡ ଗାଁର ଶ୍ରୀନିବାସ ବେହୁରିଆ (୬୫ ବର୍ଷ)ଙ୍କୁ ତାଙ୍କର ବୋହୂ ତଥା ବଡପୁଅ ଶ୍ରୀକାନ୍ତ ବେହୁରିଆର ସ୍ତ୍ରୀ କବିତା ବେହୁରିଆ ଗତକାଲି ରାତିରେ ହତ୍ୟା କରିଥିବା ଅଭିଯୋଗ ହୋଇଛି । ଶ୍ରୀନିବାସ ବଡ ବୋହୂ ଓ ୬ ବର୍ଷର ନାତି ସହ ଘରେ ଥିଲେ । ସାନପୁଅ କେରଳରେ ଥିବାବେଳେ ବଡପୁଅ ଗୁଜୁରାଟରେ କାମ କରନ୍ତି । ବଡଝିଅ ବିବାହିତ ହୋଇଥିବା ବେଳେ ସାନଝିଅ ମାଉସୀ ଘର ନଳିତାପାଟିଆରେ ଥିଲେ । ଅଧିକାଂଶ ସମୟରେ ଶଶୁର ଓ ବୋହୂଙ୍କ ମଧ୍ୟରେ ପାଟିତୁଣ୍ଡ ଲାଗି ରହିଥାଏ । ଗତକାଲି ସଂଧ୍ୟା ଠୁଁ ଉଭୟଙ୍କ ମଧ୍ୟରେ ପାଟିତୁଣ୍ଡ ଲାଗି ରହିଥିବା ନେଇ ପଡୋଶୀଙ୍କ ଠାରୁ ସୂଚନା ମିଳିଛି । ପାଟିତୁଣ୍ଡ ଉଗ୍ର ରୂପ ଧାରଣ କରିବାରୁ ଶଶୁରଙ୍କୁ ବୋହୂ କବିତା ଶିଳପୁଆ ଛେଚି ହତ୍ୟା କରିଥିବା ଜଣାପଡିଛି ।
ଆଜି ଭୋରୁ ଭୋରରୁ ଶଶୁର ଶ୍ରୀନିବାସଙ୍କୁ ତାଙ୍କର ବୋହୂ ହତ୍ୟା କରିଥିବା ସୂଚନା ମିଳିଛି । ଶ୍ରୀନିବାସଙ୍କ ମୁଣ୍ଡକୁ ତାଙ୍କର ବୋହୂ ଶିଳପୁଆରେ ବାରମ୍ବାର ଛେଚିବା ପରେ ଘରର ଚଟାଣରେ ଛଟପଟ ହୋଇ ପ୍ରାଣ ହରାଇଛନ୍ତି । ଘରର ଚଟାଣ ରକ୍ତରେ ବୁଡିଛି । ଆଜି ସକାଳେ ଖବରପାଇ ଝିଅମାନେ ପହଁଚି ରାଜନଗର ଥାନାରେ ଜଣାଇଥିଲେ । ମୃତ ଶ୍ରୀନିବାସଙ୍କ ସାନଝିଅ ସଂଯୁକ୍ତା ରାଜନଗର ଥାନାରେ ତାଙ୍କ ବାପାଙ୍କୁ ଭାଉଜ ହତ୍ୟା କରିଥିବାର ଲିଖିତ ଅଭିଯୋଗ କରିଛନ୍ତି । ଆଇଆଇସି ତପନ କୁମାର ନାୟକ, ଏସଡିପିଓ ରଂଜନ କୁମାର ଦେ, ସବଇନିସପେକ୍ଟର ଅଜୟ କୁମାର ସାହୁ ପ୍ରମୁଖ ଘଟଣା ସ୍ଥଳରେ ପହଁଚି ତଦନ୍ତ ଜାରି ରଖିଛନ୍ତି ।