ସମ୍ବଲପୁର: ଅଢ଼େଇବର୍ଷ ପରେ ମା’ ପାଖକୁ ଫେରିଲା ଝିଅ। ସମ୍ବଲପୁର ସିଡବ୍ଲୁସି ପକ୍ଷରୁ ୯ ବର୍ଷର ଝିଅକୁ ଶୁକ୍ରବାର ତାର ମା’ଙ୍କୁ ହସ୍ତାନ୍ତର କରାଯାଇଛି। ସୂଚନା ଅନୁଯାୟୀ, ୨୦୧୯ ଜୁଲାଇ ୮ ତାରିଖରେ ସେଚ୍ଛାସେବୀ ସଂଗଠନ ସ୍ବଇଚ୍ଛା ପକ୍ଷରୁ ୭ ବର୍ଷର ଶିଶୁକନ୍ୟାଙ୍କୁ ହୀରାକୁଦ ରେଳ ଷ୍ଟେସନ୍‌ ନିକଟରୁ ଉଦ୍ଧାର କରାଯାଇଥିଲା। ତାପରେ ଝିଅଟିକୁ ସ୍ବଇଚ୍ଛା ପକ୍ଷରୁ ସିଡବ୍ଲୁସିକୁ ହସ୍ତାନ୍ତର କରିଥିଲା। ପଚରା ଉଚରା ପରେ ମଧ୍ୟ ଝିଅଟି ତାର ପରିଚୟ ଦେଇ ନ ଥିଲା, କେବଳ ଅନୁଗୁଳ ଜିଲ୍ଲା କଂସନାଳୀର ବୋଲି କହିଥିଲା। ହେଲେ ସେଠାରେ ତାଙ୍କର କେହି ସମ୍ପର୍କୀୟ ମିଳି ନଥିଲା। ଖବରକାଗଜରେ ମଧ୍ୟ ତାଙ୍କ ବିଷୟରେ ବିଜ୍ଞାପନ ଦିଆଯାଇଥିଲା। ହେଲେ କିଛି ଫଳ ମିଳି ନଥିଲା। ତାପରେ ତାଙ୍କୁ ସମ୍ବଲପୁର ସିଡବ୍ଲୁସି ପକ୍ଷରୁ ଛଛାନପାଲି ସ୍ଥିତ ରୁକ୍ମଣିଲାଠ ବାଲ ନିକେତନରେ ଥଇଥାନ କରାଯାଇଥିଲା।

Advertisment

ସେଠାରେ ସେ ଏବେ ଚତୁର୍ଥ ଶ୍ରେଣୀରେ ପଡ଼ୁଛନ୍ତି। ତେବେ ବହୁ ଖୋଜା ଖୋଜି କରିବା ପରେ ଝିଅଟିର ମା’ ଶୁକ୍ରବାର ସିଡବ୍ଲୁସିରେ ହାଜର ହୋଇଥିଲେ। ସବୁ ପ୍ରକାର ପ୍ରମାଣ ଦେବା ପରେ ଭିଡିଓ କନ୍‌ଫରେନ୍ସିଂ ମାଧ୍ୟମରେ ଝିଅ ସହ ତାଙ୍କର କଥା କରାଯାଇଥିଲା। ଝିଅଟି ମଧ୍ୟ ତାଙ୍କୁ ଚିହ୍ନି ଥିଲା। ସୂଚନାଯୋଗ୍ୟ, ମହିଳା ଓ ତାଙ୍କ ସ୍ବାମୀଙ୍କ ମଧ୍ୟରେ ଝଗଡ଼ା ହେବାରୁ ମହିଳା ଜଣକ ତାଙ୍କ ବାପ ଘରେ ମୟୁରଭଞ୍ଜ ଯଶୀପୁରକୁ ଚାଲି ଯାଇଥିଲେ। ତେବେ ତାଙ୍କ ସ୍ବାମୀ ସେଠାକୁ ଯାଇ ଝିଅକୁ ସମ୍ବଲପୁର ନେଇ ଆସିଥିଲେ। ମହିଳାଙ୍କ ସ୍ବାମୀ ବୁର୍ଲା ଅଞ୍ଚଳରେ ଏକ ହୋଟେଲ୍‌ରେ କାମ କରୁଥିଲେ। ୨୦୨୧ରେ ଏକ ସଡ଼କ ଦୁର୍ଘଟଣାରେ ତାଙ୍କର ମୃତ୍ୟୁ ମଧ୍ୟ ଘଟିଥିଲା। ଏହା ପରେ ମହିଳା ଜଣକ ତାଙ୍କ ଝିଅଙ୍କୁ ଖୋଜିବା ଆରମ୍ଭ କରିଥିଲେ। ମାସେ ତଳେ ଅଇଁଠାପାଲି ଥାନାରେ ସେ ଅଭିଯୋଗ ମଧ୍ୟ କରିଥିଲେ। ତେବେ ସମ୍ବଲପୁରର କୌଣସି ଆଶ୍ରମରେ ତାଙ୍କ ଝିଅ ଥିବା ନେଇ ସୂଚନା ପାଇବା ପରେ ସିଡବ୍ଲୁସିର ଦ୍ବାରସ୍ଥ ହୋଇଥିଲେ। ସମସ୍ତ ପ୍ରକାର ଯାଞ୍ଚ କରାଯିବା ପରେ ଝିଅଟିକୁ ଶୁକ୍ରବାର ତାଙ୍କ ମା’ଙ୍କୁ ହସ୍ତାନ୍ତର କରାଯାଇଛି।