‘ମୃତ’ ଯୁବକ ଜୀବିତ ଅବସ୍ଥାରେ ଘରକୁ ବାହୁଡ଼ିବା ଘଟଣା : ହତ୍ୟା ଅଭିଯୋଗରେ ଗିରଫ ୨ଯୁବକଙ୍କୁ କ୍ଷତିପୂରଣ ଆଦେଶ
ପୁଲିସ୍ ଅଧିକାରୀଙ୍କ ଦରମାରୁ କଟିବ
ବରଗଡ଼ : ‘ମୃତ’ ବୋଲି ଘୋଷଣା ହୋଇ ସାରିଥିବା ପାଇକମାଲ ଥାନା ଭେଙ୍ଗରାଜପୁର ପଞ୍ଚାୟତ ମାଝିପାଲି ଗ୍ରାମର ଜିତୁ ଡନସନା ୧୯ ମାସ ପରେ ଜୀବିତ ଅବସ୍ଥାରେ ଘରକୁ ଫେରିବା ୨୦୧୮ ମସିହାର ଏକ ଚର୍ଚ୍ଚିତ ଘଟଣାବଳୀ ରହିଥିଲା। ଘଟଣାଟି କୌଣସି ସିନେମା କାହାଣୀରୁ କମ୍ ନଥିଲା। ଏହାପୂର୍ବରୁ ପୁଲିସ୍ ଜିତୁଙ୍କ ହତ୍ୟା ଅଭିଯୋଗରେ ବରଗଡ଼ ବିଶିପଡ଼ାର ହଲୁ ଗୁଲ୍ଲା (୨୨) ଓ ରାଘବ ନାୟକ (୨୨)ଙ୍କୁ ୨୦୧୭ ମସିହା ଅକ୍ଟୋବର ୨୨ ତାରିଖ ଗିରଫ କରି ସାରିଥିଲା। ଦୁହେଁ ଅକାରଣରେ ଜେଲ୍ରେ ରହିଥିଲେ। ଜିତୁ ଫେରିବା ପରେ ଉଭୟେ ଆପଣାଛାଏଁ ଦୋଷମୁକ୍ତ ହୋଇଥିଲେ।
Sambad is now on WhatsApp
Join and get latest news updates delivered to you via WhatsApp
ତେବେ ମାମଲାଟି ଜାତୀୟ ମାନବାଧିକାର କମିସନ ପାଖକୁ ଯାଇଥିଲା। କମିସନ୍ ତତ୍କାଳୀନ ଉତ୍ତରାଂଚଳ ଡିଆଇଜି ସତ୍ୟବ୍ରତ ଭୋଇଙ୍କ ଠାରୁ ରିପୋର୍ଟ ତଲବ କରିଥିଲେ। କ୍ରାଇମବ୍ରାଞ୍ଚ ମଧ୍ୟ ରିପୋର୍ଟ ଦାଖଲ କରିଥିଲା। ଏହାପରେ କମିସନ୍ ହଲୁ ଏବଂ ରାଘବଙ୍କୁ ଅଢ଼େଇ ଲକ୍ଷ ଟଙ୍କା ଲେଖାଏଁ କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛନ୍ତି। ଏହି ଟଙ୍କା ତତ୍କାଳୀନ ପାଇକମାଳ ଥାନାଧିକାରୀ ତଥା ତଦନ୍ତ ଅଧିକାରୀ ପ୍ରକାଶ କର୍ଣ୍ଣଙ୍କ ଦରମାରୁ ଆଦାୟ ହେବ। ଆବେଦନକାରୀଙ୍କ ପକ୍ଷରୁ ଆଇନଜୀବୀ ଅନନ୍ତ ଶୟନ ପାଢ଼ୀ ମାମଲା ପରିଚାଳନା କରିଥିଲେ।
ସୂଚନାଯୋଗ୍ୟ, ୨୦୧୬ ଡିସେମ୍ବର ୭ ତାରିଖ ଜିତୁ ବରଗଡ଼ ଆସିଥିବା ବେଳେ ଜୀରା ନଦୀ ପାଖରେ ଲୁଟ୍ ଶିକାର ହୋଇଥିଲେ। ପୁଅ ନିଖୋଜ ରହିବା ପରେ ତାଙ୍କ ପିତା ସେହି ମାସ ୨୫ ତାରିଖ ପାଇକମାଳ ଥାନାରେ ଲିଖିତ ଅଭିଯୋଗ କରିଥିଲେ। ପୁଲିସ କେସ ନମ୍ବର ୧୮୭/୧୬ ଦଫା ୩୬୬ରେ ମାମଲା ରୁଜୁ କରିଥିଲା। ଦୀର୍ଘ ଦିନ ଧରି ଛାନଭିନ୍ ପରେ ବି ଜିତୁଙ୍କ କୌଣସି ସନ୍ଧାନ ମିଳିନଥିଲା। ଜିତୁଙ୍କ ମୋବାଇଲ୍ ଏବ˚ ଟଙ୍କା ଲୁଟ୍ ମାମଲାରେ ବରଗଡ଼ର ହଲୁ ଓ ରାଘବ ୨୦୧୭ ମସିହା ଜୁଲାଇ ୨୭ ତାରିଖ ଗିରଫ ହେଲେ। ସେମାନେ ଜିତୁଙ୍କୁ ହତ୍ୟା କରିଥିବା ସ୍ୱୀକାର କରିବା ପରେ ପୁଲିସ୍ ହତ୍ୟା ମାମଲା ରୁଜୁ କରି ଉଭୟଙ୍କୁ କୋର୍ଟ ଚାଲାଣ କରିଥିବା କୁହାଯାଇଥିଲା। କିନ୍ତୁ ୧୯ ମାସ ପରେ କୋଲକତାର ଆଇସ୍କ୍ରିମ ବିକାଳୀ ଜିତୁ ଜୀବିତ ଥିବା ତାଙ୍କ ପରିବାରକୁ ମୋବାଇଲ ଯୋଗେ ଜଣାଇଥିଲା। ପରେ ଜିତୁ ଉଦ୍ଧାର ହୋଇଥିଲେ। ପୁଲିସ୍ ଥାର୍ଡ ଡିଗ୍ରି ଦେଇ ତାଙ୍କୁ ହତ୍ୟା କରିଥିବା ସ୍ୱୀକାର କରିବାକୁ ବାଧ୍ୟ କରିଥିଲା ବୋଲି ହଲୁ ଏବଂ ରାଘବ ବୟାନ ଦେଇଥିଲେ।