ଯାଜପୁରସଦର: ଚାଷୀଙ୍କୁ ଏବେ ଚାଷ ଅପେକ୍ଷା ନକଲି ବିହନ ଚିନ୍ତା ଘାରିଛି। ଅନେକ ସମୟରେ ସରକାରୀ ବିହନ ଭଲ ଫଳ ଦେଉନଥିବାରୁ ଚାଷୀ କ୍ଷତି ସହୁଛନ୍ତି। ଯାଜପୁର ଅଞ୍ଚଳରେ ରବି ଫସଲରେ ‘ବୀଣା’ କିସମ ଧାନ ଚାଷ କରିଥିବା ଚାଷୀ ଏବେ ମୁଣ୍ଡରେ ହାତଦେଇ ବସିଛନ୍ତି। କାରଣ ଗଛରେ ଥିବା ଏହି ଧାନ ଏବେ ଅଗାଡ଼ି ହୋଇଯାଉଛି।

Advertisment

ଯାଜପୁର ବ୍ଲକ୍‌ ବିଚିତ୍ରପୁର ପଞ୍ଚାୟତ ଅବଦଲପୁର ଗ୍ରାମରେ ଅନେକ ଚାଷୀ ରବିଋତୁରେ ଧାନଚାଷ କରିଛନ୍ତି। ଏହି ଅଞ୍ଚଳ ଧୋଇଆ ବା ବନ୍ୟା ପ୍ରଭାବିତ ହୋଇଥିବାରୁ ଶହଶହ ଚାଷୀ ରବିଧାନ ଚାଷକୁ ଗୁରୁତ୍ବ ଦେଇଥାନ୍ତି। ଏଥର ଶତାଧିକ ଚାଷୀ ୫୦ ଏକରରୁ ଅଧିକ ଜମିରେ ‘ବୀଣା’ କିସମ ଧାନ ଚାଷ କରିଥିଲେ। ସ୍ଥାନୀୟ ସାର ବିକ୍ରୟ କେନ୍ଦ୍ରରୁ ସେମାନେ ସରକାରୀ ବିହନ କିଣିଥିଲେ। ଭଲ ଗଛ ହୋଇଥିବାରୁ ଭଲ ଧାନ ହେବ ବୋଲି ଚାଷୀ ଆଶା ରଖିଥିଲେ। ଏବେ ଫଳ ବାହରିବା ପୂର୍ବରୁ ଅଗାଡ଼ି ହେବା ପରିସ୍ଥିତି ସୃଷ୍ଟି ହୋଇଛି। ଫୁଲ ନଉଡ଼ିବାରୁ ଓ କ୍ଷୀର ଧରିନଥିବାରୁ ଚାଷୀଙ୍କ ଏକରଏକର ଚାଷ ଜମି ଏବେ ଫସଲଶୂନ୍ୟ ହୋଇଛି। ଅନେକ ଚାଷୀ ଭାଗଚାଷ କରିବା ସହ ଧାରକରଜ କରି ବେଉସା କରିଥିଲେ। ଏବେ ତାକୁ କିପରି ଭରଣା କରିବେ ବୋଲି ପ୍ରଶ୍ନ କରିଛନ୍ତି। ଚାଷୀ ସରକାରୀ ବସ୍ତାରେ ସରକାରୀ ଲୋଗୋ ଥିବା ବିହନ କିଣିଥିବା ଦାବି କରିଛନ୍ତି। ଏଭଳି ସ୍ଥିତିରେ ବିହନରେ ତ୍ରୁଟି ରହିଛି ନା ଆଉ କେଉଁଠି ଭୁଲ ରହିଛି, ଯେଉଁଥିପାଇଁ ଏପରି କ୍ଷତି ହେଲା ତାହା ଜାଣି ପାରୁନାହାନ୍ତି।

କେତେକ ଚାଷୀ ଆଜି ବିହନ କିଣିଥିବା ଡିଲର ପାଖରେ ପହଞ୍ଚି ହୋହଲ୍ଲା କରି କ୍ଷତିପୂରଣ ମାଗିଥିଲେ। ଡିଲର ଏନେଇ ସଂପୃକ୍ତ ବିହନ ଯୋଗାଣକାରୀ ସଂସ୍ଥାକୁ ଅବଗତ କରିଥିଲେ। କୌଣସି ସହାୟତା ଦେଇପାରିବେ ନାହିଁ ବୋଲି କହିଥିଲେ। ସେ କହିଛନ୍ତି, ଚଳିତ ବର୍ଷ ଥୋଡ଼ ବାହାରିବା ସମୟରେ ଅତ୍ୟଧିକ ଗ୍ରୀଷ୍ମପ୍ରବାହ ଯୋଗୁ ଧାନରୁ ଫୁଲ ଉଡ଼ିଲା ନାହିଁ। ବିଭିନ୍ନ ଅଞ୍ଚଳରୁ ଏପରି ଅଭିଯୋଗ ଆସିଥିବାରୁ ଏହା ଏକ ପ୍ରାକୃତିକ କ୍ଷତି ବୋଲି ପ୍ରକାଶ କରିଛନ୍ତି। ଏ ବିଷୟରେ ଜିଲ୍ଲା କୃଷି ଅଧିକାରୀ ଓ ଜିଲ୍ଲାପାଳଙ୍କୁ ଭେଟି ଅଭିଯୋଗ କରିବେ ବୋଲି ଚାଷୀ ‌ହରେକୃଷ୍ଣ ରାଉତ, ଗୋପାଳ ନାୟକ, ଚିତ୍ତରଂଜନ ନାୟକ, ବାସୁଦେବ ନାୟକ, କୃଷ୍ଣଚନ୍ଦ୍ର ନାୟକ, କାଳନ୍ଦୀ ବିଶ୍ବାଳ, ରମାକାନ୍ତ ନାୟକ ଓ ମାଧବ ନାୟକ କହିଛନ୍ତି।