କୁକୁର କାମୁଡ଼ାରେ ହରିଣ ଆହତ

ତେଲକୋଇ : ଗୁରୁବାର ଅପରାହ୍ଣରେ ଏକ ହରିଣ ସମାକୋଇ ସଂରକ୍ଷିତ ଜଙ୍ଗଲରୁ ନିକଟସ୍ଥ ଦେଉଳଡିହା ଗ୍ରାମକୁ ପଶି ଆସିଥିଲା। ମହାନ୍ତି ସାହି ନିକଟରେ ହରିଣଟି ବୁଲା କୁକୁରଙ୍କ ହାବୁଡ଼ରେ ପଡ଼ିଯିବାରୁ କୁକୁର ହରିଣଟିକୁ ଝୁଣି ଦେଇଛନ୍ତି। ମାଈ ହରିଣଟି ସାମାନ୍ୟ ଆହତ ହୋଇଛି। ପ୍ରାଥମିକ ଚିକିତ୍ସା ପରେ ତାକୁ ଜଙ୍ଗଲରେ ଛାଡ଼ି ଦିଆଯାଇଥିବା ବନ ବିଭାଗ ସୂତ୍ରରୁ ଜଣାପଡିଛି।

ସୂଚନାଯୋଗ୍ୟ ତେଲକୋଇ ରେଞ୍ଜ ସମାକୋଇ ସଂରକ୍ଷିତ ଜଙ୍ଗଲରେ ୨୦୦ ରୁ ଊର୍ଦ୍ଧ୍ବ ହରିଣ ରହିଛନ୍ତି। କେତେବେଳେ ଶିକାରୀ ଓ ବୁଲା କୁକୁରଙ୍କ ହାବୁଡ଼ରେ ପଡ଼ି ସେମାନଙ୍କ ଜୀବନ ଯାଉଛି। ଆଗକୁ ବନାଗ୍ନି ଭୟ ରହିଛି। କୌଣସି କାରଣରୁ ନିଆଁ ଲାଗିଲେ ହରିଣଗୁଡ଼ିକ ଏଣେତେଣେ ଧାଉଁଛନ୍ତି। ଏଥିପ୍ରତି ବନ ବିଭାଗ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା କରିବା ସହିତ ଏହାକୁ ହରିଣ ପାର୍କ କରିବାକୁ ସାଧାରଣରେ ଦାବି ହୋଇଆସୁଛି।