ଓପିଜିସିରୁ ଏଇଏସ୍ ଅଧିକାରୀଙ୍କୁ ବହିଷ୍କାର ଦାବି
ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଲେ ବ୍ରଜରାଜନଗର ବିଧାୟକ
ଭୁବନେଶ୍ୱର : ଓଡ଼ିଶା ପାୱାର ଜେନେରେସନ୍ ଲିମିଟେଡ୍ (ଓପିଜିସି)ରୁ ଆମେରିକୀୟ କମ୍ପାନି ‘ଏଇଏସ୍’ ଅଧକାରୀଙ୍କୁ ତୁରନ୍ତ ବହିଷ୍କାର କରିବାକୁ ଦାବି କରିଛନ୍ତି ବ୍ରଜରାଜନଗର ବିଧାୟକ କିଶୋର ଚନ୍ଦ୍ର ମହାନ୍ତି। ଶ୍ରୀ ମହାନ୍ତି ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ଏନେଇ ଅନୁରୋଧ କରିଛନ୍ତି। ଏଇଏସ୍ କମ୍ପାନି ଅଧିକାରୀମାନଙ୍କ ଅନିଭଜ୍ଞତା ଓ ଦୁର୍ନୀତିଖୋର୍ ମନୋଭାବ ଓପିଜିସିର ଦୁରାବସ୍ଥା ପାଇଁ ଦାୟୀ ବୋଲି କେତୋଟି କାରଣ ଦର୍ଶାଇ ସେ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଛନ୍ତି।
Sambad is now on WhatsApp
Join and get latest news updates delivered to you via WhatsApp
ରାଜ୍ୟ ସରକାର ଏଇଏସ୍ କମ୍ପାନି ହାତରେ ଥିବା ଓପିଜିସିର ୪୯ ପ୍ରତିଶତ ଅଂଶଧନ କିଣିବା ନିଷ୍ପତ୍ତି ଐତିହାସିକ ବୋଲି ବର୍ଣ୍ଣନା କରି ସେ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି। କିନ୍ତୁ ଏହି କମ୍ପାନି ବିଦାୟ ନେବା ପରେ ଏଇଏସ୍ର କିଛି ଅସାଧୁ ଅଧିକାରୀ ଓପିଜିସିରେ ରହିବା ପାଇଁ ଉଦ୍ୟମ ଚଳାଇଛନ୍ତି ବୋଲି ସେ ଦର୍ଶାଇଛନ୍ତି। ପୂର୍ବରୁ ଏହି ଅଧିକାରୀମାନଙ୍କ ପାଇଁ ଓପିଜିସି କିଭଳି ବିପୁଳ କ୍ଷତି ସହିଛି, ତାହାର ଉଦାହରଣ ସେ ଦେଇଛନ୍ତି। ୧୯୯୯ ମସିହାରେ ଏଇଏସ୍ ଅଂଶଧନ କିଣିବା ବେଳେ ଆଉ ଦୁଇଟି ପାୱାର୍ ପ୍ଲାଣ୍ଟ ନିର୍ମାଣ କରିବ ବୋଲି ପ୍ରତିଶ୍ରୁତି ଦେଇଥିଲା। ମାତ୍ର ବହୁ ବିଳମ୍ବରେ ଅର୍ଥାତ୍ ୨୦୧୫ ମସିହାରେ ଦୁଇଟି ୟୁନିଟ୍ ୬୬୦ x୨ କାର୍ଯ୍ୟକ୍ଷମ କରାଗଲା। କିନ୍ତୁ ଉଦ୍ବେଗର ବିଷୟ ହେଲା, ଉଦ୍ଘାଟନ ହେବାର ମାତ୍ର ୩ ଦିନ ପରେ ସେଥିରେ ତ୍ରୁଟି ପରିଲକ୍ଷିତ ହେଲା ଓ ୯୦ % କାପାସିଟି ସ୍ଥାନରେ ମାତ୍ର ୫୦ %ରେ ଚାଲିଲା। ଫଳରେ ରାଜ୍ୟ ସରକାରଙ୍କର କୋଟି କୋଟି ଟଙ୍କାର ରାଜସ୍ବ ହାନି ହେଲା। ପରେ ବିଶେଷଜ୍ଞଙ୍କ ପରାମର୍ଶରୁ ଜଣାଗଲା ଯେ ନିମ୍ନମାନର ଯନ୍ତ୍ରପାତି, ବ୍ୟାପକ ଦୁର୍ନୀତି ଓ ଅନିଭଜ୍ଞ ଏଇଏସ୍ ଅଧିକାରୀମାନଙ୍କ ପାଇଁ ଉକ୍ତ ପାୱାର ପ୍ଲାଣ୍ଟର ଏହି ଦୁରାବସ୍ଥା ହୋଇଛି। ସେହିଭଳି ପୁରୁଣା ଦୁଇଟିଯାକ ୟୁନିଟ୍ର ରକ୍ଷଣାବେକ୍ଷଣ ଅଭାବ ପାଇଁ ସେଥିରୁ ମଧ୍ୟ ପୂର୍ଣ୍ଣମାତ୍ରାରେ ବିଦ୍ୟୁତ୍ ଉତ୍ପାଦନ ହୋଇପାରୁନାହିଁ। ଗତ ସେପ୍ଟେମ୍ବର ୫ ତାରିଖରେ ୩ ନମ୍ବର ୟୁନିଟ୍ରୁ ପାଉଁଶ ହୁପର ଖସି ୬ ଜଣ ଶ୍ରମିକ ଆହତ ହୋଇଥିଲେ ଓ ଚିକିତ୍ସାଧୀନ ଅବସ୍ଥାରେ ଜଣଙ୍କର ମୃତ୍ୟୁ ହୋଇଥିଲା। ଏହି ସବୁ ଘଟଣା ପାଇଁ ଏଇଏସ୍ ଅଧିକାରୀମାନେ ଦାୟୀ। ତେଣୁ ସରକାର ସରଜମିନ୍ ତଦନ୍ତ ଆଦେଶ କରାଇବା ସହ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବିଧାୟକ ଶ୍ରୀ ମହାନ୍ତି ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଛନ୍ତି।
ସୂଚନାଯୋଗ୍ୟ ବ୍ରଜରାଜନଗର ବନହରପଲ୍ଲୀ ଠାରେ ମୁଖ୍ୟମନ୍ତ୍ରୀ ସ୍ବର୍ଗତ ବିଜୁ ପଟ୍ଟନାୟକ ଓପିଜିସିର ଏହି ୨ଟି ପ୍ଲାଣ୍ଟ ପ୍ରତିଷ୍ଠା କରାଇଥିଲେ ଓ ୧୯୯୯ ମସିହାରେ ତତ୍କାଳୀନ ରାଜ୍ୟ ସରକାର ଏହାର ୪୯ ପ୍ରତିଶତ ଅଂଶଧନକୁ ଆମେରିକୀୟ କମ୍ପାନି ଏଇଏସ୍କୁ ବିକ୍ରି କରି ଦେଇଥିଲେ।