ନବରଙ୍ଗପୁର : କଳାହାଣ୍ଡିର ଦାନ ମାଝୀଙ୍କ ଘଟଣା ଓଡ଼ିଶାବାସୀ ଭୁଲି ନଥିବା ବେଳେ ପୁଣି ଥରେ ସେଭଳି ଏକ ଘଟଣା ନଜରକୁ ଆସିଛି । ଦାନ ମାଝୀ ନିଜ ସ୍ତ୍ରୀର ଶବକୁ କାନ୍ଧରେ ବୋହିଥିବା ବେଳେ ଜଣେ ପୁଅ ଏବେ ନିଜ ବାପାଙ୍କ ପାଇଁ ସେଭଳି କିଛି କରିଥିବା ଜଣା ପଡ଼ିଛି । ସ୍ୱର୍ଗରଥ ନ ମିଳିବାରୁ ପୁଅ ନିଜ ବାପାର ଶବକୁ ବାଇକ୍ରେ ବାନ୍ଧି ଘରକୁ ନେବା ଭଳି ଅତ୍ୟନ୍ତ ସ୍ପର୍ଶକାତର ଖବର ଏବେ ଚର୍ଚ୍ଚାର ବିଷୟ ପାଲଟିଛି ।
Sambad is now on WhatsApp
Join and get latest news updates delivered to you via WhatsApp
ନବରଙ୍ଗପୁର ଜିଲ୍ଲାରେ ଏହି ଘଟଣା ଘଟିଥିବା ବେଳେ କୁଡ଼ୁମାଧା ଗାଁର ଲୋକି ସାନ୍ତା ମୃତ ବାପାଙ୍କ ଶବକୁ ବାଇକରେ ବୋହିବା ଚିତ୍ର ଦେଖିବାକୁ ମିଳିଛି । ସ୍ୱର୍ଗରଥ ଯୋଗାଡ଼ ନ ହୋଇ ପାରିବାରୁ ଲୋକି ସାନ୍ତା ନିଜ ବାପାଙ୍କ ଶବକୁ ବାଇକ୍ରେ ବାନ୍ଧି ୨୦କିଲୋମିଟର ପର୍ଯ୍ୟନ୍ତ ଯାତ୍ରା କରିଥିଲେ । ରାସ୍ତାରେ ଏଭଳି ଦୃଶ୍ୟ ସମସ୍ତଙ୍କୁ ଆନ୍ଦୋଳିତ କରିଥିଲା ।
ସୂଚନା ମୁତାବକ, ଘଟଣାର ପୂର୍ବ ଦିନ ଲୋକିଙ୍କ ବାପାଙ୍କ ସ୍ୱାସ୍ଥ୍ୟବସ୍ଥା ବିଗିଡ଼ିବାରୁ ତାଙ୍କୁ ଦେଶୀ ଚିକିତ୍ସା ପାଇଁ ଝରିଗାଁ ବ୍ଲକ୍ର ବଂଶୀବନ୍ଧ ଗାଁରେ ରହୁଥିବା ସଂପର୍କୀୟଙ୍କ ଘରକୁ ନିଆଯାଇଥିଲା । ସେଠାରେ ତାଙ୍କ ସ୍ୱାସ୍ଥ୍ୟବସ୍ଥା ବିଗିଡ଼ିବାରୁ ଡାକ୍ତରଖାନା ନେବା ପାଇଁ ଆମ୍ବୁଲାନ୍ସ ଡ଼କାଯାଇଥିଲେ ମଧ୍ୟ ଆମ୍ବୁଲାନ୍ସ ପହଞ୍ଚି ପାରି ନ ଥିଲା । ଯାହା ଦ୍ୱାରା ଲୋକିଙ୍କ ବାପାଙ୍କର ଚିକିତ୍ସା ଅଭାବରୁ ମୃତ୍ୟୁ ହୋଇଥିଲା । ମୃତ୍ୟୁ ଖବର ପାଇ ଶବ ଆଣିବାକୁ ପହଞ୍ଚିଥିଲେ ଲୋକି । କିନ୍ତୁ ଆମ୍ବୁଲାନ୍ସ କିମ୍ବା ସ୍ୱର୍ଗରଥ ଯୋଗାଡ଼ କରିବାରେ ଅସଫଳ ହୋଇ ଲୋକି ନିଜ ବାଇକ୍ ଯୋଗେ ବାପାଙ୍କ ଶବକୁ ଧରି ଘରକୁ ଫେରିଥିଲେ ।
ବାଟରେ କିଛି ସାମ୍ବାଦିକ ତାଙ୍କୁ ଶବ ବ୍ୟବଚ୍ଛେଦ ପାଇଁ ପରାମର୍ଶ ଦେବା ପରେ ଲୋକି ନିଜ ବାପାଙ୍କୁ ଉମରକୋଟ କମ୍ୟୁନିଟି ହେଲ୍ଥ କେୟାରକୁ ନେଇଥିଲେ । ସେଠାରେ ଶବ ବ୍ୟବଚ୍ଛେଦ ହେବା ପରେ ପରିବାର ଲୋକଙ୍କ ଶବ ହସ୍ତାନ୍ତର କରାଯାଇଥିଲା ।