କୃଷି ପାଠ୍ୟକ୍ରମ ଖୋଲିବାକୁ ଅନୁମତି ଦେବ କୃଷି ବିଭାଗ
ଭୁବନେଶ୍ବର : ଏଣିକି ରାଜ୍ୟରେ କୃଷି ସମ୍ପର୍କିତ ସମସ୍ତ ପାଠ୍ୟକ୍ରମ ଖୋଲିବା ଓ ଅନୁଦାନ ସମ୍ବନ୍ଧୀୟ ସମସ୍ତ ପ୍ରସ୍ତାବ କୃଷି ଓ କୃଷକ ସଶକ୍ତୀକରଣ ବିଭାଗ ଦ୍ୱାରା ପରିଚାଳିତ ହେବ। ସେହି ଅନୁଯାୟୀ ବେସରକାରୀ ଶିକ୍ଷାନୁଷ୍ଠାନ ଦ୍ବାରା କୃଷି ଓ ସହଯୋଗୀ ବିଷୟଗୁଡ଼ିକରେ ନୂତନ କଲେଜ ଖୋଲିବା ପାଇଁ କୃଷି ବିଭାଗ ଗତ ଫେବ୍ରୁଆରି ୧୮ରେ ନିର୍ଦ୍ଦେଶନାମା ଜାରି କରିଛି। ଉକ୍ତ ବିଜ୍ଞପ୍ତିରେ ଉଲ୍ଲେଖ ହୋଇଛି ଯେ କୃଷି ଓ ସହଯୋଗୀ ବିଷୟଗୁଡ଼ିକରେ ନୂତନ କଲେଜ ଖୋଲିବା ପାଇଁ ସେମାନେ କେବଳ ଏନଓସି ପ୍ରଦାନ କରିବେ।
Sambad is now on WhatsApp
Join and get latest news updates delivered to you via WhatsApp
ତେବେ ଏହି ବିଜ୍ଞପ୍ତିରେ ଅନୁଷ୍ଠାନଗୁଡ଼ିକର କୃଷି ପାଠ୍ୟକ୍ରମକୁ ସାମୟିକ/ସ୍ଥାୟୀ ସ୍ୱୀକୃତି ପ୍ରଦାନ ବିଷୟରେ କିଛି କୁହାଯାଇ ନାହିଁ। ନିର୍ଦ୍ଦିଷ୍ଟ ନିର୍ଦ୍ଦେଶ ଦିଆଯାଇ ନ ଥିବାରୁ ବର୍ତମାନ ଥିବା ଘରୋଇ କଲେଜଗୁଡ଼ିକ କୃଷି ବିଭାଗ କିମ୍ବା ଉଚ୍ଚଶିକ୍ଷା ବିଭାଗରୁ କୃଷି ପାଠ୍ୟକ୍ରମ ପାଇଁ ଅସ୍ଥାୟୀ ସ୍ବୀକୃତି(ଟିଆର୍) ପାଇବାରେ ଅସୁବିଧାର ସମ୍ମୁଖୀନ ହେଉଛନ୍ତି। ତାହାକୁ ଦୃଷ୍ଟିରେ ରଖି ଘରୋଇ କଲେଜଗୁଡିକରେ ଥିବା କୃଷି ଓ ସହଯୋଗୀ ପାଠ୍ୟକ୍ରମକୁ ଟିଆର୍ ଅନୁଦାନର ସମସ୍ତ ବିଚାରାଧୀନ ପ୍ରସ୍ତାବକୁ ତୁରନ୍ତ ସମାଧାନ କରିବା ଦିଗରେ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ଉଚ୍ଚଶିକ୍ଷା ବିଭାଗ ପକ୍ଷରୁ ଭୁବନେଶ୍ବର, ବ୍ରହ୍ମପୁର, ସମ୍ବଲପୁର, ବାଲେଶ୍ବର ଓ ଜୟପୁରସ୍ଥିତ ଆଞ୍ଚଳିକ ଶିକ୍ଷା ନିର୍ଦେଶକକୁ କୁହାଯାଇଛି। ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ଏହା ବୈଧ ରହିବ।