କଟକ : ରାଜ୍ୟ ପୁଲିସ ଡିଜି ଶ୍ରୀ ଅଭୟ ଡିସେମ୍ବର ୧୧ ତାରିଖରୁ ଛୁଟିରେ ଯିବେ। ଗୃହ ବିଭାଗ ତାଙ୍କର ଛୁଟି ମଞ୍ଜୁର କରିଛି। କିନ୍ତୁ ଡିସେମ୍ବର ୧୩ରୁ ୧୬ ତାରିଖ, ୪ ଦିନ ପର୍ଯ୍ୟନ୍ତ ଡିଜି ଶ୍ରୀ ଅଭୟଙ୍କର ଛୁଟିକୁ ଗୃହ ବିଭାଗ ମଞ୍ଜୁର କରିଥିବା ବେଳେ ୧୧ ଓ ୧୨ ତାରିଖ ସରକାରୀ ଛୁଟି ଦିବସ ରହୁଥିବାରୁ ସେହି ଦିନ ଗୁଡିକରେ ବି ସେ ଦାୟିତ୍ବରେ ରହିବେ ନାହିଁ। ଅର୍ଥାତ ଡିସେମ୍ବର ୧୧ରୁ ୧୬ ତାରିଖ ପର୍ଯ୍ୟନ୍ତ ଡିଜି ଶ୍ରୀ ଅଭୟ ଦାୟିତ୍ବରେ ରହୁ ନଥିବା ବେଳେ ସେହି ସମୟରେ ପୁଲିସ ଗୁଇନ୍ଦା ବିଭାଗ ନିର୍ଦ୍ଦେଶକ ବରିଷ୍ଠ ଆଇପିଏସ୍ ଅଫିସର ଲଳିତ ଦାସ କାର୍ଯ୍ୟ ତୁଲାଇବେ ବୋଲି ଗୃହ ବିଭାଗ ପକ୍ଷରୁ ଚିଠି ଜାରି କରାଯାଇଛି। ଡିଜି ଶ୍ରୀ ଅଭୟ ଏହି ସମୟରେ ସପତ୍ନୀକ ଆଣ୍ଡାମାନ ନିକୋବର ବୁଲିବା ପାଇଁ ଏଲ୍ଟିସିରେ ଯାଉଥିବା ସୂଚନା ରହିଛି।
Sambad is now on WhatsApp
Join and get latest news updates delivered to you via WhatsApp
କିନ୍ତୁ ଡିଜିଙ୍କ ଶେଷ ମାସର କାର୍ଯ୍ୟକାଳରେ ଏହାକୁ ନେଇ ଏବେ ବିଭିନ୍ନ ମହଲରେ ତର୍ଜମା ଆରମ୍ଭ ହୋଇଛି। ନିୟମ ଅନୁସାରେ ଡିଜି ପଦବିରେ ୨ ବର୍ଷ କାର୍ଯ୍ୟ କରିବା ପାଇଁ ଡିଜି ଶ୍ରୀ ଅଭୟଙ୍କ ଅବସର ପରେ ଚାକିରି କାଳ ରାଜ୍ୟ ସରକାର ୬ ମାସ ବୃଦ୍ଧି କରିଥିଲେ। ସେହି ଅନୁଯାୟୀ ସେ ଡିସେମ୍ବର ୩୧ରେ ଅବସର ନେବେ ବୋଲି ସରକାରଙ୍କ ପକ୍ଷରୁ ଅନୁମତି ଦିଆଯାଇଛି। କିନ୍ତୁ ଅନ୍ୟପଟେ ଅବସର ନେଉଥିବା ଜଣେ ଅଧିକାରୀ ଏହି ଡିଜି ପଦବିରେ ଠିକ୍ ୨ ବର୍ଷ କାର୍ଯ୍ୟ କରିପାରିବେ ଏବଂ ସିବିଆଇ ନିର୍ଦ୍ଦେଶକ ଭାବେ ଏହି ନିୟମ ଆଧାରରେ ୩ ଜଣ ବରିଷ୍ଠ ଆଇପିଏସ୍ ଅଧିକାରୀ ଚାକିରିରୁ ଅବ୍ୟାହତି ନେଇ ସାରିଛନ୍ତି ବୋଲି ଏବେ ପୁଲିସ ବିଭାଗରେ ଆଲୋଚନା ହେଉଛି। ଏଭଳି ନିୟମକୁ କାର୍ଯ୍ୟକାରୀ କଲେ ଡିଜି ଶ୍ରୀ ଅଭୟଙ୍କୁ ଡିସେମ୍ବର ୮ ତାରିଖରେ ଦାୟିତ୍ବ ନିବୃତ ହେବାକୁ ପଡିବ। କିନ୍ତୁ ସରକାର ଗୋଟିଏ ପଟେ ଏହି ନିୟମର ବିଭିନ୍ନ ଦିଗକୁ ତର୍ଜମା କରୁଥିବା ବେଳେ ଡିଜି ଶ୍ରୀ ଅଭୟ ଛୁଟିରେ ଯିବାପରେ ପୁଣି କାର୍ଯ୍ୟରେ ଯୋଗ ଦେବେ ନା ସେହିଭଳି ଛୁଟିରେ ଡିସେମ୍ବର ୩୧ ଯାଏ ରହିବେ, ତାହାକୁ ନେଇ ଏବେ ଆଶଙ୍କା ଆକଳନ ଜାରି ରହିଛି। ସରକାର କିନ୍ତୁ ଏବେ ଏଭଳି କୌଣସି ପ୍ରକାର ବିବାଦରେ ଅଯଥା ଛନ୍ଦି ହେବାକୁ ଚାହୁଁ ନଥିବା ସୂଚନା ମିଳିଛି।