କଳାହାଣ୍ଡି: ଧାନ ମଣ୍ଡି ବନ୍ଦ କରିବାନେଇ ଜିଲ୍ଲାପାଳଙ୍କୁ ଚାଷୀସଂଘ ତରଫରୁ ଦାବିପତ୍ର ପ୍ରଦାନ
ଭବାନୀପାଟଣା : କଳାହାଣ୍ଡି ଜିଲ୍ଲା ଭବାନୀପାଟଣା ସଦର ବ୍ଲକ ଅନ୍ତର୍ଗତ ଥୁଆପଦର ପଞ୍ଚାୟତ ଅଧିନସ୍ଥ ଥୁଆପଦର, ତେନ୍ତୁଲିଖୁଣ୍ଟି, ଡଙ୍ଗୁରୀପଦର, ଭିମଡଙ୍ଗା, କୁସୁମଖୁଣ୍ଟି ଓ ଗୋଇପିଟା ଗ୍ରାମରେ ସ୍ୱଳ୍ପ ବୃଷ୍ଟି କାରଣରୁ ଚଳିତ ଖରିଫ ଚାଷ ବ୍ୟାପକ ଭାବରେ କ୍ଷତିହୋଇଛି । ଏମିତିକି ଅନେକ ଚାଷ ଜମିରେ ଗାଈ, ଗୋରୁ ଛାଡିଦେବା ପରିସ୍ଥିତି ସୃଷ୍ଟିହୋଇଛି । ଦୀର୍ଘ ୨୦ ବର୍ଷ ପରେ ପ୍ରଥମଥର ପାଇଁ ଏହିପରି ମରୁଡିର ସମ୍ମୁଖୀନ ହୋଇଥିବା ଚାଷୀମାନେ ପ୍ରକାଶ କରିଛନ୍ତି । ଆଗାମୀ ୨୫ ତାରିଖ ଦିନ ଥୁଆପଦର ସେବା ସମବାୟ ସମିତି ଲିଃଠାରେ ଚଳିତ ଖରିଫ୍ ଧାନ ମଣ୍ଡି ଆରମ୍ଭ ହେବାକୁଥିବାବେଳେ ମରୁଡି କ୍ଷତିଗ୍ରସ୍ତ ଚାଷୀମାନେ ଏହି ମଣ୍ଡିକୁ ଦୃଢ ବିରୋଧ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଥୁଆପଦର ପଞ୍ଚାୟତକୁ ସଂମ୍ପୂର୍ଣ୍ଣ ମରୁଡି ଘୋଷଣା କରିବା ତଥା ଧାନ ମଣ୍ଡି ବନ୍ଦ କରିବା ଦାବିନେଇ ପଞ୍ଚାୟତ ଚାଷୀସଂଘ ତରଫରୁ ଏକ ପ୍ରତିନିଧିଦଳ କଳାହାଣ୍ଡି ଜିଲ୍ଲାପାଳ ଡ.ଗାଭାଲି ପରାଗ ହର୍ଷଦକୁ ଭେଟି ଏକ ସ୍ମାରକପତ୍ର ପ୍ରଦାନ କରିଥିଲେ । ଆଗାମୀ ୨୩ ତାରିଖ ଦିନ ପଞ୍ଚାୟତ ଚାଷୀ ସଂଘ ତରଫରୁ ଥୁଆପଦର ସେବା ସମବାୟ ସମିତି ଲିଃ କାର୍ଯ୍ୟାଳୟ ସମ୍ମୁଖରେ ଧାନ ମଣ୍ଡି ବନ୍ଦ ଓ ମରୁଡି ଘୋଷଣା ଦାବିରେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଗଣ ଧାରଣା ଦିଆଯିବା ନେଇ କଳାହାଣ୍ଡି ଜିଲ୍ଲାପାଳ, ଉପ ଜିଲ୍ଲାପାଳ , ଗୋଷ୍ଠୀ ଉନ୍ନୟନ ଅଧିକାରୀ , ସଦର ଥାନା ଅଧିକାରୀ ତଥା ଥୁଆପଦର ସେବା ସମବାୟ ସମିତି ଲିଃ କତୃପକ୍ଷଙ୍କୁ ଲିଖିତ ଭାବରେ ଚାଷୀ ସଂଘ ଅବଗତ କରିଥିବା ଜଣାଯାଇଛି ।
ପ୍ରକାଶ ଯେ’ ଥୁଆପଦର ସେବା ସମବାୟ ସମିତି ଲିଃ ଧାନ ମଣ୍ଡିରେ ଅସାଧୁ ବ୍ୟବସାୟୀ ତଥା ଗ୍ରାମ ପଞ୍ଚାୟତ ବାହାରର ଚାଷୀମାନେ ଚୋରାରେ ଧାନ ଆଣି ମଣ୍ଡିରେ ବିକ୍ରି କରିଥାନ୍ତି । ଏହାଦ୍ୱାରା ପ୍ରକୃତ ଚାଷୀମାନଙ୍କର କ୍ଷତିହେବା ସହ ସେମାନେ ଧାନ ବିକ୍ରି କରିବାବେଳେ ନାନା ସମସ୍ୟାର ସମ୍ମୁଖୀନ ହେଉଥିବା ଅଭିଯୋଗ ହୋଇଛି । ଏମିତି କି ପୂର୍ବ ବର୍ଷମାନଙ୍କରେ ମିଲର୍ସମାନେ ଚାଷୀମାନଙ୍କୁ ବସ୍ତା ଯୋଗାଇବା ନିୟମ ଥିଲେ ମଧ୍ୟ ଧାନ ବିକ୍ରି ସମୟରେ ଚାଷୀ ନିଜ ପେଟରୁ କାଟି ଧାନ ବସ୍ତା କିଣିଥାଏ । ଏଥିସହ ଧାନ ମାପକ ଯନ୍ତ୍ରରେ ଚାଷୀମାନଙ୍କ ବ୍ୟାପକ ଠକେଇ କରାଯାଉଥିବା ଏବଂ ଏଥିରେ ବିଭାଗୀୟ ଅଧିକାରୀମାନଙ୍କ ଭିତିରି ବୁଝାମଣାଥିବା ଅଭିଯୋଗ ହୋଇଆସୁଛି । ଦୁଃଖର ବିଷୟ ଏହି ଯେ’ ଏଫ୍ଏକ୍ୟୁ ନାମରେ ଚାଷୀମାନଙ୍କର କୁଇଣ୍ଟାଲ ପିଛା ଧାନ ପ୍ରତି ୭ ରୁ ୮ କେଜି କଟନୀ ଛଟନି କରୁଥିବା ଘଟଣାକୁ ଚାଷୀସଂଘ ଦୃଢବିରୋଧ କରିଆସୁଛି ।