ପାପୁଲି ନ ଥିଲେ କ’ଣ ହେଲା? ଚାଷ କରି ନିଜେ ସ୍ବାବଲମ୍ବୀ ହେବା ସହ ୨୦ ପରିବାରକୁ ରୋଜଗାର ଦେଇଛନ୍ତି ବିଭୂତି

ଢେଙ୍କାନାଳ: ଚାଷ କାମ ଯାହାର କେଡେ ସୁଖ ତାହାର…। ଏ କଥାକୁ କେବଳ କଥାରେ ରହିବାକୁ ଦେଇନାହାନ୍ତି ସେ । ଜନ୍ମରୁ ଦିବ୍ୟାଙ୍ଗ ହେଲେ ବି କ୍ଷେତରେ ଫଳାଉଛନ୍ତି ସବୁଜ ଫସଲ। ତାଙ୍କ ହାତର ସ୍ପର୍ଶରେ ପନିପରିବାରେ ପୂରି ଯାଇଛି କ୍ଷେତ। ନିଜ ଆଖିରେ ନ ଦେଖିଲେ କେହି ବିଶ୍ୱାସ କରିବେନି । ଆଜ୍ଞା ହଁ, ହାତର ପାପୁଲି ନ ଥାଇ ବି ସେ ହାରି ନଯାଇ ଲଢ଼ିଛନ୍ତି ଆଉ ଅନ୍ୟମାନଙ୍କ ପାଇଁ ସାଜିଛନ୍ତି ପ୍ରେରଣାର ଉତ୍ସ ।

ଢେଙ୍କାନାଳ ଜିଲ୍ଲା ପରଜଙ୍ଗ ବ୍ଲକ କଟାବାହାଲ ଗାଁର ଦିବ୍ୟାଙ୍ଗ ଯୁବକ ବିଭୂତି ପ୍ରଧାନ । ଜନ୍ମରୁ ପାପୁଲି ନ ଥିବା ସହ ପାଠ ପଢିବାକୁ ଅର୍ଥ ନ ଥିବାରୁ ଅଧାରୁ ପାଠ ଛାଡି ରୋଜଗାର ପାଇଁ ବାଙ୍ଗାଲୋର ଯାଇଥିଲେ । ଆଉ ସେଠାରେ ହେଉଥିବା କୃଷି ପଦ୍ଧତି ଓ କୃଷକଙ୍କ ଆୟ ଦେଖି ଆଗ୍ରହ ପ୍ରକାଶ କରିଥିଲେ ବିଭୂତି । ଆଉ ସେଠାରେ ମାସେ ତାଲିମ ନେଇ ସିଧା ଗାଁକୁ ଆସି ଚାଷ ଆରମ୍ଭ କରିଥିଲେ ।

୫ ଏକର ଜମିରେ ନିଜସ୍ୱ ଉଦ୍ୟମରେ ପାଖାପାଖି ଅଢେଇ ଲକ୍ଷ ଟଙ୍କା ବିନିଯୋଗ କରି ବାହାରୁ ଶିଖି ଆସିଥିବା ଚାଷ ପ୍ରଣାଳୀରେ ଗାଁରେ ଚାଷ କରିଥିଲେ । ପୂରା ଜମିରେ ଟମାଟୋ ଲଗାଇ ଏବେ ବେଶ ଲାଭବାନ ହେଉଛନ୍ତି ବିଭୂତି । ତେବେ ସବୁଠାରୁ ବଡ କଥା ହେଉଛି, ଦିବ୍ୟାଙ୍ଗ ହୋଇ ବି କେବଳ ନିଜେ ସ୍ୱାବଲମ୍ବୀ ହୋଇ ନାହାନ୍ତି ବରଂ ଅନ୍ୟମାନଙ୍କୁ ସ୍ୱାବଲମ୍ବୀ କରାଇଛନ୍ତି । ଗାଁର ପାଖାପାଖି ୨୦ଟି ପରିବାରର ଲୋକଙ୍କୁ ସେ ନିଜ ଚାଷ ଜମିରେ ରୋଜଗାର ଦେଇଛନ୍ତି ।

ବର୍ଷକୁ ୫ରୁ ୭ ଲକ୍ଷ ରୋଜଗାର କରୁଥିବା ବିଭୂତି ବିନା ପାପୁଲିରେ ଚାଷ ଜମିରେ ଅନେକ କାମ ନିଜେ କରନ୍ତି । ବିଷ ପକାଇବା ଠାରୁ ଟମାଟୋ ଅମଳ କରି ବିକ୍ରି କରିବା ଯାଏଁ ସବୁ କରନ୍ତି ବିଭୂତି । ତେବେ ଗୋଟିଏ ପାପୁଲି ବିନା ସେ ଯେଉଁ ସଫଳତା ପାଇଛନ୍ତି ଯେଉଁ ଉଦ୍ୟମ କରିଛନ୍ତି ତାହା ଅନ୍ୟମାନଙ୍କ ପାଇଁ ଭଲ ବାର୍ତ୍ତାଟିଏ ଦେଇଛି ।

ସମ୍ବନ୍ଧିତ ଖବର