ମନ୍ଦିର ଭିତରେ କିଭଳି ହେବ ଅକ୍ଷୟ ତୃତୀୟା ନୀତି, ସେବାୟତଙ୍କ ସହ ଆଲୋଚନା କଲା ଶ୍ରୀ ମନ୍ଦିର ପ୍ରଶାସନ
ପୁରୀ: ଶ୍ରୀମନ୍ଦିର ଭିତରେ ହେବ ଅକ୍ଷୟ ତୃତୀୟା ନୀତି ଓ ଚନ୍ଦନ ଯାତ୍ରାର ବିଧି । ଲକଡାଉନ କଟକଣା ଯୋଗୁଁ ମହାପ୍ରଭୁଙ୍କର କୌଣସି ପର୍ବ ବାହାରେ ହୋଇପାରିବ ନାହିଁ । ତେଣୁ ଶ୍ରୀମନ୍ଦିରର ପରମ୍ପରା ଓ ବିଧିକୁ କେମିତି ବଜାୟ ରଖି ହେବ, ସେଥିପାଇଁ ମହାପ୍ରଭୁଙ୍କ ସମସ୍ତ ପର୍ବକୁ ମନ୍ଦିର ଭିତରେ କରିବା ପାଇଁ ଜଗଦଗୁରୁ ଶଙ୍କରାଚାର୍ଯ୍ୟଙ୍କ ପରାମର୍ଶ ଦେଇଛନ୍ତି । ଅର୍ଥାତ ରଥ ନିର୍ମାଣ କାର୍ଯ୍ୟଠାରୁ ଆରମ୍ଭ କରି , ଚନ୍ଦନଯାତ୍ରା ଓ ଅନ୍ୟାନ୍ୟ ସମସ୍ତ ନୀତି ମନ୍ଦିର ଭିତରେ ଆରମ୍ଭ ହେବ ।
Sambad is now on WhatsApp
Join and get latest news updates delivered to you via WhatsApp
ଗତକାଲି ଶଙ୍କରାଚାର୍ଯ୍ୟଙ୍କ ଦ୍ୱାରା ନିଷ୍ପତି ନିିଆଯାଇଥିବା ବ୍ୟବସ୍ଥାରେ, ଶ୍ରୀମନ୍ଦିର ଭିତରେ ହେବାକୁ ଥିବା ଏହି ନୀତି ସ୍ଥାନକୁ ପରଖିଛନ୍ତି ସେବାୟତ । ରଥଯାତ୍ରା ଓ ଚନ୍ଦନଯାତ୍ରା ନୀତି ନିର୍ଘଣ୍ଟ ଓ ସ୍ଥାନ ନିରୂପଣ ପାଇଁ ଜିଲ୍ଲାପାଳ ତଥା ଶ୍ରୀମନ୍ଦିର ଉପମୁଖ୍ୟ ପ୍ରଶାସକଙ୍କ ଅଧ୍ୟକ୍ଷତାରେ ବୈଠକ ଚାଲିଛି | ଶ୍ରୀମନ୍ଦିର ଭିତରେ ମହାପ୍ରଭୁଙ୍କ ରଥକାଠ ପୂଜା ଏବଂ ବାହାର ଚନ୍ଦନ ଯାତ୍ରା ବିଧିକୁ ଶ୍ରୀମନ୍ଦିର ଭିତରେ କିପରି କରାଯିବ ସେନେଇ ଆଲୋଚନା ଚାଲିଛି ।
ସେବାୟତ, ପରିଚାଳନା କମିଟି, ଶ୍ରୀମନ୍ଦିର ଅଧିକାରୀଙ୍କ ସହ ଜିଲ୍ଲାପାଳ, ଏସପିଙ୍କ ଆଲୋଚନା ଜାରି ରହିଛି। କାଲି ପବିତ୍ର ଅକ୍ଷୟ ତୃତୀୟା । କେନ୍ଦ୍ରର ଗାଇଡଲାଇନ ଅନୁସାରେ ବାହାରେ କୌଣସି ନୀତିକାନ୍ତି ହେବ ନାହିଁ । ତେଣୁ ଶ୍ରୀମନ୍ଦିର ଭିତରେ ନୀତି ସମ୍ପାଦିତ କରାଯିବ । ମେଘନାଦ ପାଚେରୀକୁ ଲାଗି ରହିଥିବା ସାହାଣି ମଣ୍ଡପ ନିକଟରେ ରଥକାଠ ପୂଜା କରାଯିବ । ଏହି ବିଧି କିପରି କରାଯିବ ସେନେଇ ସେବାୟତଙ୍କ ସହିତ ଆଲୋଚନା ଜାରି ରହିଛି ।