ଭବାନୀପାଟଣା: କଳାହାଣ୍ଡି ଜିଲ୍ଲାସ୍ତରୀୟ ଉତ୍ସବ ଘୁମୁରାର ରଜତ ଜୟନ୍ତୀ ଉତ୍ସବ ଉଦ୍‌ଘାଟିତ ହୋଇଛି। ଲୋକସଭା ସାଂସଦ ବସନ୍ତ ପଣ୍ଡା ମୁଖ୍ୟଅତିଥି ଭାବେ ଯୋଗଦେଇ କଳାହାଣ୍ଡିର ମଣ୍ଡିରେ ଚାଷୀ ଶୋଷଣ ହେଉଛନ୍ତି ବୋଲି କହିଥିଲେ। ଜିଲ୍ଲା ପ୍ରଶାସନ ଏଥି ନିମନ୍ତେ ସଜାଗ ହେବା ଆବଶ୍ୟକତା ରହିଛି। କଳାହାଣ୍ଡି ଜିଲ୍ଲାରେ ମିଲେଟ ଜାତୀୟ ଶସ୍ୟର ଅଧିକ ଉତ୍ପାଦନ ହେଉଛି। ତେଣୁ ଏହାର ବଜାରୀକରଣର ଆବଶ୍ୟକତା ରହିଛି। ଏକ ଭାରତ ଶ୍ରେଷ୍ଠ ଭାରତ କାର୍ଯ୍ୟକ୍ରମରେ ଦେଶର ୫୬ଟି ସ୍ଥାନରେ ବିଶେଷ ମହୋତ୍ସବ ଅନୁଷ୍ଠିତ ହେବ।

Advertisment

ବିଦେଶୀମାନଙ୍କୁ ନିମନ୍ତ୍ରଣ କରାଯାଇ ଭାରତର କଳା ଓ ସଂସ୍କୃତିକୁ ଜଣାଇବା ପାଇଁ ପ୍ରଧାନମନ୍ତ୍ରୀ ଉଦ୍ୟମ କରିଛନ୍ତି। ଏହି ଉତ୍ସବ ଆସନ୍ତା ନଭେମ୍ବର ୩୦ ତାରିଖରେ ଆରମ୍ଭ ହେବ। ଜିଲ୍ଲାପାଳ ଜିଲ୍ଲାର ବିଭିନ୍ନ ସମସ୍ୟା ନିମନ୍ତେ ଯତ୍ନବାନ ହେବା ଆବଶ୍ୟକତା ରହିଛି ବୋଲି ଶ୍ରୀ ପଣ୍ଡା ନିଜର ବକ୍ତବ୍ୟ ରଖିଥିଲେ। ସେହିପେରି ଜିଲ୍ଲା ପରିଷଦ ସଭାପତି ପୁଷ୍ପେନ୍ଦ୍ର ସିଂଦେଓ କଳାହାଣ୍ଡି ଜିଲ୍ଲା ଏକ ଶିକ୍ଷାର ହବ ହେବାରେ ଲାଗିଛି। ମୁଖ୍ୟମନ୍ତ୍ରୀଙ୍କ ଦ୍ବାରା ଫୋକସରେ କଳାହାଣ୍ଡି ଥିବା ଯୋଗୁଁ ବିଭିନ୍ନ କ୍ଷେତ୍ରରେ କଳାହାଣ୍ଡିର ଅଗ୍ରଗତି ହେଉଛି ବୋଲି କହିଥିଲେ। ସମ୍ମାନିତ ଅତିଥି ଭାବେ ଧର୍ମଗଡ଼ ବିଧାୟକ ମୈାଷଧି ବାଗ, ଲାଞ୍ଜିଗଡ଼ ବିଧାୟକ ପ୍ରଦୀପ ଦିଶାରୀ, ଭବାନୀପାଟଣା ସଦର ବିଧାୟକ ପ୍ରତିନିଧି ମନୋଜ ସାହୁ, ଭବାନୀପାଟଣା ପୌରପାଳିକା ଅଧ୍ୟକ୍ଷା ସଂଯୁକ୍ତା ବେହେରା, କଳାହାଣ୍ଡି ଜିଲ୍ଲାପାଳ ପି. ଅନ୍ବେଷା ରେଡ୍ଡୀ, ଏସ୍‌ପି ଅଭିଳାଷ ଜି., ସିଡିଓ ସଚିନ ପାୱାର ପ୍ରକାଶ, ଅତିରିକ୍ତ ଜିଲ୍ଲାପାଳ ସୁଶାନ୍ତ ପଟେଲ, ଭବାନୀପାଟଣା ଉପଜିଲ୍ଲାପାଳ ଡ. ବିଶ୍ବଜିତ ଦାସ, ଜିଲ୍ଲା ସଂସ୍କୃତି ଅଧିକାରୀ ଅର୍ପିତା ବେହେରା ଉଦ୍‌ବୋଧନ ଦେଇଥିଲେ। ଓଡ଼ିଶା ସାହିତ୍ୟ ଏକାଡେମୀ ସଦସ୍ୟ ସତ୍ୟ ନାରାୟଣ ମହାପାତ୍ର ମଞ୍ଚ ପରିଚାଳନା କରିଥିଲେ।

ଲେଖକ କଳା ପରିଷଦର କଳାକାରମାନେ ପ୍ରାରମ୍ଭିକ ସଂଗୀତ ଗାନ କରିଥିଲେ। ଏହି ଅବସରରେ କଳାହାଣ୍ଡି ଉତ୍ସବର ସ୍ମରଣିକା କଳାଝରଣ ଏବଂ କବିତା ପାଠୋତ୍ସବ କମିଟିର ପତ୍ରିକା ନିଶାନ ଅତିଥିଙ୍କ ଦ୍ବାରା ଉନ୍ମୋଚିତ ହୋଇଥିଲା। ସଭା ପରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏହି ଅବସରରେ କଳାହାଣ୍ଡି କଳାକେନ୍ଦ୍ରର ଓଡ଼ିଶୀ, କେସିଙ୍ଗା ବୃନ୍ଦାବନ ସାଂସ୍କୃତିକ ଅନୁଷ୍ଠାନ, ଜୟପାଟଣା ରିଦମ ସ୍କିଲ ଡ୍ୟାନ୍ସ ଏକାଡେମୀର ସାଂସ୍କୃତିକ କାର୍ଯ୍ୟକ୍ରମ, ରାୟଗଡ଼ା ଜିଲ୍ଲା ସଂସ୍କୃତି ପରିଷଦର ଢେମସା, ଗଜପତି ଜିଲ୍ଲା ସଂସ୍କୃତି ପରିଷଦର ସଖୀ ନାଚ, ରାଜସ୍ଥାନର ମାନିଂହାର ଓ କାଲବେଲିଆ, ଝାରଖଣ୍ଡର ପାଇକିଆ ନୃତ୍ୟ, ବଲାଙ୍ଗୀରର ଭଗବାନ ସାହୁ ଓ ସାଥୀଙ୍କ ଲୋକ ନୃତ୍ୟ, ହାବସପୁରର ବନାବାଡି, ଆସାମର ବିହୁ ନୃତ୍ୟ, ମଧ୍ୟପ୍ରଦେଶର ବର୍ଦ୍ଧେଇ ନୃତ୍ୟ, ବରଗଡ କଳାଗ୍ରାମର ମନ୍ଦଲିଆ, ମୟୁରଭଞ୍ଜର ପାଲୁଭି ନୃତ୍ୟ, ମହାରାଷ୍ଟ୍ରର ଲାବଣୀ ନୃତ୍ୟ ପରିବେଷିତ ହୋଇଥିଲା। ନମିତା ମିଶ୍ର ଓ ନିହାରିକା ନାଏକ ସାଂସ୍କୃତିକ କାର୍ଯ୍ୟକ୍ରମ ସଂଯୋଜନା କରିଥିଲେ। ଶେଷରେ କମେଡିଆନ ପ୍ରଜ୍ଞାନ ଖଟୁଆଙ୍କ ଦ୍ବାରା ହାସ୍ୟବ୍ୟଙ୍ଗ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଆଜି ଜିଲ୍ଲାର ୧୦ଟି ସ୍ଥାନରୁ ମଶାଲ ଆସି ଭବାନୀପାଟଣା ଗାନ୍ଧୀଛକରେ ପହଞ୍ଚିଥିଲା। ଅପରାହ୍ନ ୩ଟାରେ ମା' ମାଣିକେଶ୍ବରୀ ମନ୍ଦିରରୁ ମଶାଲ ଶୋଭାଯାତ୍ରା ବାହାରି ଲାଲବାହାଦୂର ଶାସ୍ତ୍ରୀ ଷ୍ଟାଡିୟମ ସ୍ଥିତ ରେଣ୍ଡୋ ମାଝୀ ମଞ୍ଚରେ ପହଞ୍ଚିଥିଲା।