ବାଘଙ୍କ ଉପରେ ନଜର ନାହିଁ, ନୟାଗଡ଼ରେ କଳାବାଘ ନେଇ ବଢ଼ୁଛି ସନ୍ଦେହ

ନୟାଗଡ଼: ଦେଶ‌ରେ ବାଘ ବଂଶ ବୃଦ୍ଧି ଲାଗି ସରକାର ଗୁରୁତ୍ବ ଦେଉଥିବା ବେଳେ, ନୟାଗଡ଼ରେ ମହାନଦୀ ବନ୍ୟପ୍ରାଣୀ ବନଖଣ୍ଡ ଅଧୀନରେ ଥିବା ବାଘ ବଂଶ ଅସୁରକ୍ଷିତ ସ୍ଥିତିରେ ରହିଛନ୍ତି। ଏମାନଙ୍କର ଆତଯାତ, ସଂଖ୍ୟା ବଢ଼ିଛି କି କମିଛି ସେ ସମ୍ପର୍କରେ ବିଶେଷ କିଛି ଖବର ମହାନଦୀ ବନ୍ୟପ୍ରାଣୀ ବନଖଣ୍ଡ ନିକଟରେ ନାହିଁ। ଫଳରେ ଏହି ବନଖଣ୍ଡ ଅଧୀନରେ ୨୦୧୭-୧୮ ବାଘ ଗଣନା ରିପୋର୍ଟ ଅନୁସା‌ରେ ୧୭ଟି କଲରାପତରିଆ ବାଘ ଥିଲେ। ପ୍ରତି ୪ ବର୍ଷକୁ ଥରେ ବାଘ ଗଣନା ହେଉଥିବା ବେଳେ, ଇତିମଧ୍ୟରେ ୨୦୨୧-୨୨ରେ ବାଘ ଗଣନା ସରିଛି। ପ୍ରତିବର୍ଷ ମୌସୁମୀ ପୂର୍ବରୁ ଜୁନ୍‌ ଓ ପରେ ଡିସେମ୍ବର ମାସରେ ବାଘ ଗଣନା ହେଉଛି। କିନ୍ତୁ ବାଘ ସଂଖ୍ୟା ବଢ଼ିଛି କି କମିଛି ସେ ନେଇ ବନଖଣ୍ଡ କର୍ତ୍ତୃପକ୍ଷ ସୂଚନା ଦେଇପାରିନାହାନ୍ତି।

ଆମେ ଆନୁଷଙ୍ଗିକ ତଥ୍ୟ ସବୁ ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷ (ଏନ୍‌ଟିସିଏ)କୁ ପଠାଇ ଦେଇଛୁ। ସେମାନେ ଆମକୁ କିଛି ହିସାବ ଦେଇନଥିବା ଡିଏଫ୍‌ଓ ସମୀର ଶତପଥୀ କହିଛନ୍ତି। ୨୦୨୧ ଫେବ୍ରୁଆରିରେ ବନ ବିଭାଗର ଟ୍ରାପ୍‌ କ୍ୟାମେରାରେ ଦଶପଲ୍ଲାର ବାଣୀଗୋଚ୍ଛା(ପଶ୍ଚିମ) ବନାଞ୍ଚଳରେ ଏକ କଳାବାଘ ପ୍ରଥମ ଥର ପାଇଁ ଦେଖାଯାଇଥିଲା। ଏହା ପରଠାରୁ ଉକ୍ତ କଳାବାଘର ଅବସ୍ଥା କ’ଣ, ସେ ନେଇ ବନଖଣ୍ଡ କର୍ତ୍ତୃପକ୍ଷଙ୍କ ନିକଟରେ ସୂଚନା ନାହିଁ। ବିରଳ କଳା ଚିତା ବାଘ ହେଉ ଅବା ହାତୀ, ବାଘ ଭଳି ଅନ୍ୟ ବନ୍ୟ ପ୍ରାଣୀ ଉପରେ ଟ୍ରାପ୍‌ କ୍ୟାମେରା ଜରିଆରେ ସ୍ବତନ୍ତ୍ର ଦୃଷ୍ଟି ଦିଆଯିବାର ଆବଶ୍ୟକତା ରହିଛି। କିନ୍ତୁ ନୟାଗଡ଼ରେ ନିୟମିତ କ୍ୟାମେରା ଲଗାଯାଉନଥିବାରୁ ଏଭଳି ଜନ୍ତୁଙ୍କ ସମ୍ପର୍କରେ ବନଖଣ୍ଡ କର୍ତ୍ତୃପକ୍ଷଙ୍କୁ ଅଜଣା। ହାତୀ କ୍ୟାମେରା ଭାଙ୍ଗି ଦେଉଥିବ‌‌ା, ଶିକାରୀ ଚୋରି କରିନେଉଥିବା, ଅଧିକ ଖର୍ଚ୍ଚ ଆଦି କାରଣ ପାଇଁ ଆମେ କ୍ୟାମେରା ଲଗାଉନଥିବା, କେବଳ ୪ ବର୍ଷରେ ଥରେ ବାଘ ଗଣନା ବେଳେ, ଅଥବା ପ୍ରତିବର୍ଷ ମୌସୁମୀ ପୂର୍ବରୁ ଜୁନ୍‌, ଜୁଲାଇ ମାସରେ ଓ ମୌସୁମୀ ଯିବା ପରେ ଅର୍ଥାତ୍‌ ଡିସେମ୍ବର‌‌ରେ ଥରେ ବାଘ ଗଣନା ନେଇ କ୍ୟାମେରା ଲଗାଉଛୁ।

ତେବେ ଏହି ଗଣନା ସମ୍ବନ୍ଧିତ ପାଦ ଚିହ୍ନ, କ୍ୟାମେରାରେ କଏଦ୍‌ ‌ହୋଇଥିବା ଛବି ଆଦି ଆମେ ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷ(ଏନ୍‌ଟିସିଏ)କୁ ପଠାଇ ଦେଉଛୁ। କିନ୍ତୁ ଆମକୁ ସଂଖ୍ୟା ନେଇ ଏନ୍‌ଟିସିଏ କିଛି ରିପୋର୍ଟ ‌ ଦେଇନଥିବା ମହାନଦୀ ବନ୍ୟପ୍ରାଣୀ ବନଖଣ୍ଡ ଅଧିକାରୀ ସମୀର ଶତପଥୀ କହିଛନ୍ତି। ଫଳରେ ୪ ବର୍ଷରେ ନୟାଗଡ଼ରେ ବାଘ ସଂଖ୍ୟା ବଢ଼ିଛି କି କମିଛି ଆମେ ଜାଣିନାହୁଁ। ସବୁଠାରୁ ରୋଚକ କଥା ହେଉଛି, ପ୍ରାୟ ୨୦୧୫ରେ ଗଣିଆ ଅଞ୍ଚଳରେ ମଧ୍ୟ କଳା ବାଘ ଦେଖାଯାଇଥିଲା। ୨୦୨୧ରେ ବାଣୀଗୋଚ୍ଛା ନିକଟସ୍ଥ ଜଙ୍ଗଲରେ ଦେଖାଦେଇଥିବା କଳାବାଘ କଳା ଚିତା ବାଘ ବୋଲି ସେତେବେ‌ଳେ ବନାଞ୍ଚଳ କର୍ତ୍ତୃପକ୍ଷ କହିଥିଲେ, ଏବେ ମଧ୍ୟ କହୁଛନ୍ତି। କିନ୍ତୁ ଏହା କଳା କଲରାପତରିଆ ବାଘ ଥିଲା ବୋଲି ଡିଏଫ୍‌ଓ ଶ୍ରୀ ଶତପଥୀ କହିବା ସନ୍ଦେହ ବଢ଼ାଉଛି। ଦେଶରେ ତଥା ରାଜ୍ୟରେ କମ୍‌ ସଂଖ୍ୟକ କଳା ଚିତା ବାଘ ଥିବା ବେଳେ, ନୟାଗଡ଼ରେ ମହାନଦୀ ବନ୍ୟପ୍ରାଣୀ ବନଖଣ୍ଡ କର୍ତ୍ତୃପକ୍ଷ ଏନେଇ ସ୍ପଷ୍ଟ ନ କରିବା ପଛ‌ରେ ସନ୍ଦେହ ବଢ଼ୁଛି। ସଂପୃକ୍ତ କଳା ବାଘ ସମ୍ପର୍କରେ ବର୍ତ୍ତମାନ ବନଖଣ୍ଡ କର୍ତ୍ତୃପକ୍ଷ କୌଣସି ସୂଚନା ଦେଇପାରିନାହାନ୍ତି।