ବିଧାୟକଙ୍କ ପାଇଁ ଏମଏଲଏ କଲୋନୀରେ ବହୁତଳ ବିଶିଷ୍ଟ ପ୍ରାସାଦ ନିର୍ମାଣ ହେବ: ଟଙ୍କା ଅଭାବରୁ ଆଗେଇ ପାରୁନି ପ୍ରକଳ୍ପ କାର୍ଯ୍ୟ

ଭୁବନେଶ୍ବର: ବିଧାୟକଙ୍କ ପାଇଁ ଏମଏଲଏ କଲୋନୀରେ ବହୁତଳ ବିଶିଷ୍ଟ ପ୍ରାସାଦ ନିର୍ମାଣ ହେବ, ଯେଉଁଥିରେ ରହିବ ସମସ୍ତ ପ୍ରକାର ଅତ୍ୟାଧୁନିକ ବ୍ୟବସ୍ଥା । ଏମିତି ନକ୍ସା ଆଙ୍କିଥିଲେ ରାଜ୍ୟ ସରକାର । ଏଥିପାଇଁ ପୂର୍ବରୁ ଥିବା ପ୍ରାୟ ଅଧା ଏମଏଲଏ କ୍ୱାର୍ଟରକୁ ଭାଙ୍ଗି ଦିଆଯାଇଥିଲା । କିନ୍ତୁ ଟଙ୍କା ଅଭାବରୁ ଆଗେଇ ପାରୁନି ପ୍ରକଳ୍ପ କାର୍ଯ୍ୟ ।

ରାଜଧାନୀର କେନ୍ଦ୍ରରେ ଥିବା ଏମଏଲଏ କଲୋନୀ । ବିଧାୟକଙ୍କ ପାଇଁ ବ୍ୟବହାର ହେଉଥିବା ପୁରୁଣା ଆବାସିକ କଲୋନୀକୁ ଭାଙ୍ଗି ଏଠାରେ ବହୁତଳ ପ୍ରାସାଦ ନିର୍ମାଣ କରାଯାଇ ବିଧାୟକଙ୍କୁ ପ୍ରଦାନ କରାଯିବ ବୋଲି ଦୁଇ ବର୍ଷ ତଳେ ସରକାର ନିଷ୍ପତି ନେଇଥିଲେ । ଆଉ ଏଥିପାଇଁ ଅଧା ଘରକୁ ଭାଙ୍ଗି ମଧ୍ୟ ଦିଆଯାଇଥିଲା ।

ପୂର୍ବରୁ ଏହି ପ୍ରକଳ୍ପ ପାଇଁ ପୂର୍ତ ବିଭାଗ ୪୦୦ କୋଟି ଟଙ୍କା ଖର୍ଚ୍ଚ ହେବ ବୋଲି ଆକଳନ କରିଥିଲା । ବାଚସ୍ପତି ମଧ୍ୟ ଏ ନେଇ ଗଣମାଧ୍ୟମକୁ ସୂଚନା ଦେଇଥିଲେ । ତେବେ ବିଧାନସଭା ଖର୍ଚ୍ଚର ଅଡିଟ ହେଉ ନଥିବାରୁ ଏହି ପ୍ରକଳ୍ପରୁ କିଛି ଅଧିକାରୀ ଫାଇଦା ନେବାକୁ ଚେଷ୍ଟା କରୁଥିବା ଅଭିଯୋଗ ହେଉଛି । ସମସ୍ତ ଆଧୁନିକ ବ୍ୟବସ୍ଥା ଥାଇ ଏତିକି ବଖରା ବିଶିଷ୍ଟ ଫ୍ଲାଟ ପାଇଁ ରାଜଧାନୀରେ ବିଲ୍ଡର ବିକୁଥିବା ଦରଠାରୁ ଏହି ପ୍ରକଳ୍ପରେ ଦିଆଯିବାକୁ ଥିବା ଫ୍ଲାଟର ଦର ଢେର ଅଧିକ । କିନ୍ତୁ ଏଠାରେ ପୂର୍ବରୁ ପ୍ରକଳ୍ପ ପାଇଁ ଜାଗା ରହିଥିବାରୁ ଫ୍ଲାଟ ମୂଲ୍ୟକୁ ଦେଖିଲେ, ଦୁର୍ନୀତିର ଗନ୍ଧ ବାରି ହେଉଥିବା ଅଭିଯୋଗ ହେଉଛି ।