ପାନୀୟ ଜଳ ପାଇଁ ଡହଳ ବିକଳ ଯାତ୍ରୀ: ରାଇରଙ୍ଗପୁର ରେଳ ଷ୍ଟେସନ ଶୌଚାଳୟରେ ପଡ଼ିଛି ତାଲା

ରାଇରଙ୍ଗପୁର (ତୁଷାର କାନ୍ତ ମହାନ୍ତ): ମୟୂରଭଂଜ ଜିଲ୍ଲା ରାଇରଙ୍ଗପୁର ରେଳ ଷ୍ଟେସନ ଅବ୍ୟବସ୍ଥା ଘେରରେ। ଯାତ୍ରୀମାନଙ୍କ ପାଇଁ ଅତି ଜରୁରୀ ଥିବା ଶୌଚାଳୟ କଥା ନ କହିଲେ ଭଲ। କେନ୍ଦ୍ର ସରକାର ସ୍ୱଚ୍ଛ ଭାରତ ଅଭିଯାନ ନେଇ ଡେଙ୍ଗୁରା ପିଟୁଥିବା ବେଳେ ରାଇରଙ୍ଗପୁର ରେଳ ଷ୍ଟେସନଠାରେ ଥିବା ଶୌଚାଳୟ କୌଣସି ଯାତ୍ରୀଙ୍କ କାମରେ ଆସୁନଥିବା ଦେଖିବାକୁ ମିଳୁଛି। ଅମୃତ ଭାରତ ଯୋଜନାରେ ସାମିଲ ହେବା ପରେ ବି ଅବ୍ୟବସ୍ଥା ଦେଖାଯାଇଛି। ଏପରିକି ଶନିବାର ଦିନ ରେଳ ଷ୍ଟେସନରେ ପାନୀୟ ଜଳ ଯୋଗାଣ ସମ୍ପୂର୍ଣ ଠପ୍ ହୋଇଯାଇଥିଲା।

ରାଇରଂଗପୁର‌ ରେଳ ଷ୍ଟେସନକୁ ପ୍ରତ୍ୟେକ ଦିନ ୩ଟି ଟ୍ରେନ୍‌ ଟାଟାନଗରରୁ ବାଦାମପାହାଡ, ଗୋଟିଏ ଟ୍ରେନ୍ ବାଦାମପାହାଡରୁ ରାଉରକେଲା ଏବଂ ଅଂଚଳରେ ଥିବା ଲୁହାଖଣିରୁ ଲୁହାପଥର ନେବା ପାଇଁ ୱାଗନ ମଧ୍ୟ ଆସିଥାଏ। ଫଳରେ ଏହି ରେଳପଥ ଚକ୍ରଧରପୁର ଡିଭିଜନକୁ ବାର୍ଷିକ ପ୍ରାୟ ଶହ ଶହକୋଟିରୁ ରାଜସ୍ୱ ପ୍ରଦାନ କରୁଥିବା ବେଳେ ଦକ୍ଷିଣ-ପୂର୍ବ ରେଳବାଇର ଉଚ୍ଚ କର୍ତୁପକ୍ଷ ଏହା ପ୍ରତି ବୈମାତୃକ ମନୋଭାବ ପୋଷଣ କରିଆସୁଥିବାର ବହୁବର୍ଷରୁ ଅଭିଯୋଗ ହୋଇଆସୁଛି।

ସବୁଠାରୁ ଅଧିକ ରାଜସ୍ୱ ପ୍ରଦାନ କରୁଥିବା ରାଇରଙ୍ଗପୁର ଷ୍ଟେସନରେ ଯାତ୍ରୀମାନଙ୍କ ପାଇଁ ଏମସିଏଲ୍ ପକ୍ଷରୁ ନୂତନ ଅତ୍ୟାଧୁନିକ ଶୌଚାଳୟ ନିର୍ମାଣ କରାଯାଇଛି। କିନ୍ତୁ ସେଥିରେ ତାଲା ପଡ଼ିଥିବାରୁ ଯାତ୍ରୀଙ୍କ କାମରେ ଆସୁନାହିଁ । ଏହା ବ୍ୟତୀତ ରେଳ ବିଭାଗ ପକ୍ଷରୁ ମଧ୍ୟ ଅନ୍ୟ ଏକ ଶୌଚାଳୟ ନିର୍ମାଣ ହୋଇଛି। ସେଥିରେ ମଧ୍ୟ ତାଲା ପଡ଼ିଥିବା ଦେଖିବାକୁ ମିଳୁଛି। ଏଣୁ ଯାତ୍ରୀମାନେ ଷ୍ଟେସନ ପାର୍ଶ୍ବରେ ଏଣେତେଣେ ମଳତ୍ୟାଗ କରୁଛନ୍ତି। ଫଳରେ ଷ୍ଟେସନ ଅଂଚଳ ଦୂଷିତ ହୋଇପଡିଛି। ସ୍ୱଚ୍ଛ ଭାରତ ଅଭିଯାନ ମଧ୍ୟ ଫେଲ ମାରିଛି। ବିଶେଷ କରି ମହିଳା ଯାତ୍ରୀମାନେ ଅଧିକ ହନ୍ତସନ୍ତ ହେଉଥିବା ଅଭିଯୋଗ ହେଉଛି।

ତେବେ ନୂତନ କରି ନିର୍ମାଣ ହୋଇଥିବା ଶୌଚାଳୟରେ କାହିିଁକି ତାଲା ପଡିଛି ? ସେସମ୍ବନ୍ଧରେ ଷ୍ଟେସନ ମାଷ୍ଟର ଏସ୍.ପ୍ରସାଦଙ୍କୁ ପଚାରି ବୁଝିବାରୁ ସଫେଇ କର୍ମଚାରୀ ନଥିବାରି ଉକ୍ତ ସଫାସୁତୁରା ହୋଇ ପାରୁନି ବୋଲି କହିଛନ୍ତି ଏବଂ ପାନୀୟ ଜଳ ସମସ୍ୟା ସମ୍ବନ୍ଧରେ ସେ ଅବଗତ ନଥିବା କହିଛନ୍ତି। ଯାତ୍ରୀମାନଙ୍କ କହିବା ଅନୁଯାୟୀ ଉକ୍ତ ଶୌଚାଳୟକୁ କେବଳ ରେଳ ବିଭାଗର କର୍ମଚାରୀ ବ୍ୟବହାର କରୁଛନ୍ତି। ଯଥାଶୀଘ୍ର ଷ୍ଟେସନର ଶୌଚାଳୟକୁ ଯାତ୍ରୀମାନଙ୍କୁ ବ୍ୟବହାର କରିବାକୁ ଦିଆଯାଉ ବୋଲି ଯାତ୍ରୀମାନେ ଦାବି କରିଛନ୍ତି। ରେଳ ଷ୍ଟେସନରେ ପାନୀୟ ଜଳ ଯୋଗାଣ ସମ୍ପୂର୍ଣ ଠପ୍ ହୋଇଯାଇଥିବାରୁ ୪୫ ଡିଗ୍ରିରୁ ଅଧିକ ଗ୍ରୀଷ୍ମ ପ୍ରବାହ ଯୋଗୁଁ ଯାତ୍ରୀମାନେ ନାହିଁ ନଥିବା ଅସୁବିଧାରେ ସମ୍ମୁଖୀନ ହୋଇଛନ୍ତି। ଏହା ବ୍ୟତୀତ ଉକ୍ତ ଷ୍ଟେସନରେ ରାତ୍ରୀ ସମୟରେ ଲାଇଟ ଜଳୁନଥିବାରୁ ଅସାମାଜିକ ବ୍ୟକ୍ତିଙ୍କ ଆଡ୍ଡାସ୍ଥଳି ପାଲଟିଛି। ନିର୍ଭୟରେ ଉକ୍ତ ଷ୍ଟେସନରେ ମଦ ପିଉଥିବା ଓ ଜୁଆ ଖେଳୁଥିବା ଅଭିଯୋଗ ହୁଏ।