ମଦ୍ୟପ ପୁଅର କାଠଫାଳିଆ ମାଡ଼ରେ ବାପା, ମା’ ଗୁରୁତର

ବେତନଟୀ ସଦର/ବେତନଟୀ: ବେତନଟୀ ଥାନା ଅଧୀନ ତାରାଶୋଳ ଗ୍ରାମର ଜଣେ ମଦ୍ୟପ ପୁଅର କାଠଫାଳିଆ ମାଡ଼ରେ ବୁଢ଼ାବାପା, ମା’ ଗୁରୁତର ଆହତ ହୋଇଛନ୍ତି। ସୂଚନା ଅନୁଯାଇ ଗତ ୧୪ ତାରିଖ ସନ୍ଧ୍ୟାରେ ତାରାଶୋଳ ଗ୍ରାମର ମଙ୍ଗଲ ବେସ୍ରା (୬୫) ଘରେ ଥିବାବେଳେ ପୁଅ ସମାୟ (୪୩) ନିଶାସକ୍ତ ଅବସ୍ଥାରେ ପହଞ୍ଚିଥିଲେ ଓ କୌଣସି କଥାକୁ ନେଇ ବାପାଙ୍କୁ ଗାଳିଗୁଲଜ କରିଥିଲେ।

ମଙ୍ଗଲ ଏହାର ପ୍ରତିବାଦ କରିବାରୁ ପାଖରେ ପଡ଼ିଥିବା ଏକ କାଠ ଫାଳିଆରେ ତାଙ୍କୁ ନିର୍ଘାତ ମାଡ଼ ମାରିଥିଲେ ସମାୟ। ସ୍ବାମୀଙ୍କୁ ଉଦ୍ଧାର କରିବାକୁ ଆସି ପତ୍ନୀ ଚୂଡ଼ାମଣି ମଧ୍ୟ ପୁଅର ଆକ୍ରୋଶର ଶିକାର ହୋଇଥିଲେ। ସେମାନଙ୍କ ଚିତ୍କାର ଶୁଣି ପଡ଼ୋଶୀ ଘର ଲୋକ ପହଞ୍ଚି ବୃଦ୍ଧ ଦମ୍ପତିଙ୍କୁ ଉଦ୍ଧାର କରି ଡାକ୍ତରଖାନା ନେଇଥିଲେ। ୩ ଦିନ ଧରି ଚିକିତ୍ସିତ ହୋଇ ଫେରିବା ପରେ ମଙ୍ଗଲ ଆଜି ବେତନଟୀ ଥାନାରେ ଲିଖିତ ଅଭିଯୋଗ କରିଥିଲେ। ପୁଲିସ ୧୪୮/୨୩ରେ ମାମଲା ରୁଜୁ କରି ସମାୟଙ୍କୁ ଗିରଫ କରି କୋର୍ଟ ଚାଲାଣ କରିଛି।