ପୂର୍ବତଟ ରେଳପଥର ସୁରକ୍ଷା ସମ୍ପର୍କିତ ସମୀକ୍ଷା : ଏବର୍ଷ ଟ୍ରେନ୍ ଦୁର୍ଘଟଣା ହୋଇନି
ଭୁବନେଶ୍ୱର : ପୂର୍ବତଟ ରେଳପଥର ସୁରକ୍ଷା, ବ୍ୟବସାୟ ବିକାଶ, ରୋଲିଂ ଷ୍ଟକ୍, ସିଗନାଲ୍ର ନବୀକରଣ ଆଦି ବିଷୟରେ ରେଳ ମନ୍ତ୍ରଣାଳୟ ପକ୍ଷରୁ ସମୀକ୍ଷା କରାଯାଇଛି। ୨୦୧୯-୨୦ ଆର୍ଥିକ ବର୍ଷ ଓ ୨୦୨୦-୨୧ର ଏପ୍ରିଲ ୧ରୁ ଅକ୍ଟୋବର ୮ ମଧ୍ୟରେ ଭାରତୀୟ ରେଳବାଇରେ ଦୁର୍ଘଟଣାଜନିତ ଯାତ୍ରୀ ମୃତ୍ୟୁ ହୋଇ ନାହିଁ। ସେହିପରି ୨୦୨୯-୨୦ ବର୍ଷରେ ମିଲିୟନ୍ ଟ୍ରେନ୍ କିମି ପ୍ରତି ଦୁର୍ଘଟଣା ୦.୦୫କୁ ହ୍ରାସ ପାଇଛି। ଚଳିତ ଆର୍ଥିକ ବର୍ଷର ଏପର୍ଯ୍ୟନ୍ତ ଭାରତୀୟ ରେଳବାଇରେ ସମୁଦାୟ ୮ଟି ଟ୍ରେନ୍ ଦୁର୍ଘଟଣା ହୋଇଛି। ଗତବର୍ଷ ଏହି ସମୟ ମଧ୍ୟରେ ୩୫ଟି ଦୁର୍ଘଟଣା ହୋଇଥିଲା। ଚଳିତ ଆର୍ଥିକ ବର୍ଷରେ ପୂର୍ବତଟ ରେଳପଥରେ ଆଦୌ ଟ୍ରେନ୍ ଦୁର୍ଘଟଣା ହୋଇ ନ ଥିବା ସମୀକ୍ଷାରୁ ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ଏପ୍ରିଲ ପହିଲାରୁ ସେପ୍ଟେମ୍ବର ୨୦ ମଧ୍ୟରେ ଭାରତୀୟ ରେଳବାଇ ୫୩୩ ନିୟୁତ ଟନ୍ ପଣ୍ୟ ପରିବହନ କରିଛି। ସେପ୍ଟେମ୍ବରରେ କୋଇଲା, ଲୁହାପଥର ଓ ସାର ପରିବହନରେ ୭.୫% ଓ ଖାଦ୍ୟଶସ୍ୟ ପରିବହନ କ୍ଷେତ୍ରରେ ୮୭% ବୃଦ୍ଧି ଘଟିଛି। ଏହି ସମୟ ମଧ୍ୟରେ ପୂର୍ବତଟ ରେଳପଥ ଦ୍ୱାରା ୧୬.୨ ନିୟୁତ ଟନ୍ ପଣ୍ୟ ପରିବହନ ହୋଇଛି। ଚଳିତ ଆର୍ଥିକ ବର୍ଷର ଏପ୍ରିଲ୍ରୁ ସେପ୍ଟେମ୍ବର ମାସ ମଧ୍ୟରେ ଭାରତୀୟ ରେଳବାଇ ୮୩୬ଟି ରେକ୍ ପରିବହନ କରିଛି, ଯାହାକି ପୂର୍ବବର୍ଷ ତୁଳନାରେ ୧୦୫ଟି ଅର୍ଥାତ ୧୪% ଅଧିକ। ଏହି ଅଭିବୃଦ୍ଧି ପାଇଁ ରେଳବାଇ ବୋର୍ଡ ଦ୍ୱାରା ଅନେକ ନୀତିଗତ ପଦକ୍ଷେପ ନିଆଯାଇଛି। କୋଇଲା, କୋକ୍ ଓ ଲୁହାପଥର ବ୍ୟତୀତ ଜୁଲାଇ ମାସ ପହିଲାରୁ ସର୍ଟ ଲିଡ୍ ରିହାତି ପୁନଃପ୍ରବର୍ତ୍ତିତ ହୋଇଛି। କୋଇଲା ଓ କୋକ୍, ଲୁହାପଥର, ଲୁହା, ଇସ୍ପାତ ଟ୍ରାଫିକ୍ ପାଇଁ ଜୁଲାଇ ପହିଲାଠାରୁ ଲମ୍ବା ସୀସା ଟ୍ରାଫିକ୍ ଉପରେ ରିହାତି ପ୍ରଦାନ କରାଯାଇଛି। ଜୁଲାଇ ପହିଲାରୁ ରାଉଣ୍ଡ ଟ୍ରିପ୍ ତାରିଫ(ଆରଟିଟି) ନୀତି ପ୍ରଚଳିତ ହୋଇଛି।
ପୂର୍ବତଟ ରେଳପଥକୁ ଅକ୍ଟୋବରରେ ଦୈନିକ ୯୦ଟି ରେକ୍ ପଣ୍ୟ ଓ ୨୫ଟି ରେକ ଲୁହାପଥର ପରିବହନ କରିବାକୁ ଲକ୍ଷ୍ୟ ଧାର୍ଯ୍ୟ ଦିଆଯାଇଛି। ୨୦୨୦ ସେପ୍ଟେମ୍ବର ପାଇଁ ରେଲୱେ ବୋର୍ଡ ୪୧୧୨.୮ ରେଳବାଇ ଇଞ୍ଜିନ ରକ୍ଷଣାବେକ୍ଷଣ ପାଇଁ ଲକ୍ଷ୍ୟ ଧାର୍ଯ୍ୟ ଦିଆଯାଇଥିଲା। ତେବେ ଜୋନାଲ ରେଳବାଇଗୁଡ଼ିକ ୪୪୧୩.୫୩ ଇଞ୍ଜିନର ରକ୍ଷଣାବେକ୍ଷଣା କାର୍ଯ୍ୟ କରିଛନ୍ତି। ଏହାକୁ ଆହୁରି ଉନ୍ନତ କରିବା ପାଇଁ ପ୍ରୟାସ କରାଯିବା ଉଚିତ ବୋଲି ରେଳବାଇ ବୋର୍ଡ ପକ୍ଷରୁ କୁହାଯାଇଛି।
ପୂର୍ବତଟ ରେଳପଥର ମହାପ୍ରବନ୍ଧକ ବିଦ୍ୟାଭୂଷଣ ରେଳବାଇର ବ୍ୟବସାୟ ବିକାଶ ୟୁନିଟକୁ ସକ୍ରିୟ କରିବା ସହିତ ସିଆରଆଇଏସ୍ ଦ୍ୱାରା ବିକଶିତ କରାଯାଇଥିବା ବ୍ୟବସାୟ ବିକାଶ ପୋର୍ଟାଲକୁ ନବୀକରଣ କରିବାକୁ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ସର୍ବୋତ୍ତମ କାର୍ଯ୍ୟଦକ୍ଷତା ଓ ଲକ୍ଷ୍ୟ ଧାର୍ଯ୍ୟ ହାସଲ କରିବାକୁ ହେଲେ ସୁରକ୍ଷା, ଗତିଶୀଳତା ଉପରେ ଗୁରୁତ୍ୱାରୋପ କରିବାକୁ ରେଳପଥର ମହାପ୍ରବନ୍ଧକ କହିଛନ୍ତି।