ଭୁବନେଶ୍ବର: ସାଂସଦ ଅପରାଜିତା ଷଡ଼ଙ୍ଗୀଙ୍କ ଗାଡି ଉପରକୁ ଅଣ୍ଡାମାଡ଼ ଘଟରାରେ ବାଲିଅନ୍ତା ଥାନାରେ ମାମଲା ରୁଜୁ ହୋଇଛି । ଧନେଶ୍ବର ବାରିକ୍ ନାଁରେ ଜଣେ ବ୍ୟକ୍ତିଙ୍କ ଅଭିଯୋଗ କ୍ରମେ ପୁଲିସ ମାମଲା ରୁଜୁ କରଛି। ଅଭିଯୋଗରେ ଶ୍ରୀ ବାରିକ୍ ଦର୍ଶାଇଛନ୍ତି ଯେ, ଆଜି ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କ ଗାଡି ଉପରକୁ ଅଣ୍ଡାମାଡ କରିଛନ୍ତି ଛାତ୍ର କଂଗ୍ରେସ କର୍ମୀ । ଏକ କାର୍ଯ୍ୟକ୍ରମରେ ଯୋଗ ଦେବାକୁ ଯାଉଥିବାବେଳେ ବାଲିପାଟଣାରେ ସାଂସଦଙ୍କ ଗାଡି ଉପରକୁ ଅଣ୍ଡାମାଡ କରି ପ୍ରତିବାଦ ଜଣାଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ବିଜେପି କର୍ମୀ ରାଜ୍ୟ ମନ୍ତ୍ରୀ ମଣ୍ଡଳର ସଦସ୍ୟଙ୍କୁ ଅଣ୍ଡାମାଡ କରୁଥିବାବେଳେ କଂଗ୍ରେସ କର୍ମୀ ମାନେ ସାଂସଦ ଅପରାଜିତାଙ୍କ ଗାଡ଼ି ଉପରକୁ ଅଣ୍ଡାମାଡ଼ କରିଛନ୍ତି। ଦେଶରେ ଦରଦାମ ବୃଦ୍ଧି ପାଉଥିବାବେଳେ ସାଂସଦ କାହିଁକି ଚୁପ୍ ଅଛନ୍ତି ? ଏହାର ପ୍ରତିବାଦରେ ଛାତ୍ରକଂଗ୍ରେସ କର୍ମୀମାନେ ଅଣ୍ଡାମାଡ କରିଥିବା ଜଣାପଡିଛି । ଗତ କିଛି ଦିନ ହେବ ପ୍ରତିବାଦର ଏକ ନୂଆ ଷ୍ଟାଇଲ ପାଲଟିଛି ଅଣ୍ଡାମାଡ । ବିଶେଷ କରି ମମିତା ମେହେର ହତ୍ୟାକାଣ୍ଡ ପରେ ମନ୍ତ୍ରୀ ଦିବ୍ୟଶଙ୍କରଙ୍କ ଇସ୍ତଫା ଦାବିରେ ଅଣ୍ଡାମାଡ କରି ପ୍ରତିବାଦ କରିବା ବୃଦ୍ଧି ପାଇଛି ।
ବିଭିନ୍ନ ସମୟରେ ରାଜ୍ୟ କ୍ୟାବିନେଟର ଏକାଧିକ ମନ୍ତ୍ରୀଙ୍କ ଉପରକୁ ଅଣ୍ଡା ମାଡ କରିଛନ୍ତି ଉଭୟ ବିଜେପି ଓ କଂଗ୍ରେସ କର୍ମୀ । ତେବେ କଂଗ୍ରେସ କର୍ମୀମାନେ ଭୁବନେଶ୍ୱରରେ କେନ୍ଦ୍ରମନ୍ତ୍ରୀ ଅଜୟ ମିଶ୍ର ଓ ଜଗତସିଂହପୁରରେ ମନ୍ତ୍ରୀ ବିଶ୍ୱେଶ୍ୱର ଟୁଡୁଙ୍କ ଗାଡି ଉପରକୁ ମଧ୍ୟ ଅଣ୍ଡାମାଡ କରିଥିଲେ । ସେହିପରି ନିକଟରେ କେନ୍ଦ୍ରାପଡା ଗସ୍ତରେ ଯାଇଥିବାବେଳେ ମନ୍ତ୍ରୀ ବିଶ୍ୱେଶ୍ୱର ଟୁଡୁଙ୍କ ଗାଡି ଉପରକୁ ଅଣ୍ଡାମାଡ କରିଥିଲେ ବିଜେଡି କର୍ମୀ । ଏହାଛଡା ବିଜେଡି ମନ୍ତ୍ରୀଙ୍କୁ ମଧ୍ୟ ବିଜେପି କର୍ମୀ ମାନେ ମଧ୍ୟ ବିଭିନ୍ନ ସ୍ଥାନରେ ପ୍ରତିବାଦ ସ୍ୱରୂପ ଅଣ୍ଡାମାଡ କରୁଥିବାର ଦେଖିବାକୁ ମିଳୁଛି । ତେବେ ଆଗକୁ ପଂଚାୟତ ଓ ପୌର ନିର୍ବାଚନ ଆସୁଥିବାରୁ ଏହି ଅଣ୍ଡାମାଡ ପ୍ରତିବାଦ ଆହୁରି ରୋଚକ ହେବ ବୋଲି କୁହାଯାଉଛି ।