କଟକ: ୨୦୧୭ ମସିହାର ଏକ ଟ୍ରିପଲ୍ ମର୍ଡର ମାମଲାରେ ନିମ୍ନ ଅଦାଲତ ଦ୍ବାରା ମୃତ୍ୟୁଦଣ୍ଡ ପାଇଥିବା ପ୍ରକାଶ ବେହେରା ଓରଫ ବାବୁଲି ଓ ନନ୍ଦକିଶୋର ସେଠୀ ଓରଫ ରଞ୍ଜଙ୍କୁ ହାଇକୋର୍ଟ ଉପଯୁକ୍ତ ପ୍ରମାଣ ଅଭାବରୁ ଦୋଷମୁକ୍ତ କରିଛନ୍ତି। ଆଠମଲ୍ଲିକ ଅତିରିକ୍ତ ଦୌରା ଜଜ୍ ଅଦାଲତ ୨୦୨୪ ସେପ୍ଟେମ୍ବର ୨୭ରେ ପ୍ରକାଶ ଓ ନନ୍ଦକିଶୋରଙ୍କୁ ଫାଶୀଦଣ୍ଡ ପ୍ରଦାନ କରି ଦେଇଥିବା ରାୟକୁ ହାଇକୋର୍ଟ ରଦ୍ଦ କରିଛନ୍ତି। ଆଇପିସିର ଦଫା ୩୦୨, ୩୬୪, ୨୦୧, ୩୪ରୁ ଉଭୟ ଅଭିଯୁକ୍ତଙ୍କୁ ହାଇକୋର୍ଟ ଦୋଷମୁକ୍ତ କରିଛନ୍ତି। ଏଥିସହିତ ଜେଲ୍ରେ ଥିବା ଦୁଇ ଜଣଙ୍କୁ ମୁକ୍ତ କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ଜଷ୍ଟିସ୍ ସଙ୍ଗମ କୁମାର ସାହୁ ଓ ଜଷ୍ଟିସ୍ ଶିବଶଙ୍କର ମିଶ୍ରଙ୍କୁ ନେଇ ଗଠିତ ଖଣ୍ଡପୀଠ ମୃତ୍ୟୁଦଣ୍ଡ ଅନୁମୋଦନ ସଂପର୍କିତ ରାଜ୍ୟ ସରକାରଙ୍କ ମାମଲା ସହିତ ନିମ୍ନ ଅଦାଲତଙ୍କ ରାୟକୁ ବିରୋଧ କରି ଦାୟର କରିଥିବା ଅପିଲ୍ର ଏକତ୍ର ଶୁଣାଣି କରି ଏପରି ରାୟ ପ୍ରକାଶ କରିଛନ୍ତି। ଅଭିଯୁକ୍ତଙ୍କ ବିରୋଧରେ ଅଭିଯୋଗ ପ୍ରମାଣ କରିବାରେ ପ୍ରସିକ୍ୟୁସନ୍ ବିଫଳ ହୋଇଛି ବୋଲି ପ୍ରକାଶିତ ରାୟରେ ଉଲ୍ଲେଖ କରାଯାଇଛି। ପୂର୍ବ ନିର୍ଦ୍ଦେଶ ଅନୁସାରେ ମୃତ ବିରଞ୍ଚି ନାୟକଙ୍କ ନାବାଳିକା କନ୍ୟାଙ୍କୁ ୩୦ ଲକ୍ଷ ଟଙ୍କା କ୍ଷତିପୂରଣ ପ୍ରଦାନ ପାଇଁ ହାଇକୋର୍ଟ କହିଛନ୍ତି। ଯଦି ଏହି କ୍ଷତିପୂରଣ ରାଶି ପ୍ରଦାନ କରାଯାଇ ନଥିବ ତେବେ ତୁରନ୍ତ ପୀଡ଼ିତଙ୍କୁ ଏହା ପ୍ରଦାନ କରାଯିବ ବୋଲି ହାଇକୋର୍ଟ କହିଛନ୍ତି।
ମାମଲାର ବିବରଣୀରୁ ପ୍ରକାଶ ଯେ ୨୦୧୭ ଅକ୍ଟୋବର ୯ ବିଳମ୍ବିତ ରାତିରେ ଗମ୍ଭାରୀମଳିଆ ଗ୍ରାମର ବିରଞ୍ଚି ନାୟକ, ତାଙ୍କ ପତ୍ନୀ ତାରିଣୀ ନାୟକ ଓ ୭ ବର୍ଷ ବୟସ୍କ ନାବାଳକ ପୁଅଙ୍କୁ ଦୁର୍ବୃତ୍ତମାନେ ହତ୍ୟା କରିଥିଲେ। ୨୦୨୪ ସେପ୍ଟେମ୍ବର ୨୭ରେ ଆଠମଲ୍ଲିକ ଅତିରିକ୍ତ ଦୌରା ଜଜ୍ ଅଦାଲତ ଆଇପିସିର ଦଫା ୩୦୨, ୩୬୪, ୨୦୧, ୩୪ରେ ପ୍ରକାଶ ଓ ନନ୍ଦକିଶୋରଙ୍କୁ ଦୋଷୀ ସାବ୍ୟସ୍ତ କରି ମୃତ୍ୟୁଦଣ୍ଡ ପ୍ରଦାନ କରିଥିବା ବେଳେ ଅନ୍ୟ ଦଫା ଓ ଆର୍ମସ ଆକ୍ଟର ବିଭିନ୍ନ ଧାରାରୁ ସେମାନଙ୍କୁ ଦୋଷମୁକ୍ତ କରିଥିଲେ। ଘଟଣାର କେହି ପ୍ରତ୍ୟକ୍ଷଦର୍ଶୀ ନଥିବା ବେଳେ ପାରିପାର୍ଶ୍ବିକ ପ୍ରମାଣକୁ ବିଚାରକୁ ନେଇ ଅତିରିକ୍ତ ଦୌରା ଜଜ୍ ଅଦାଲତ ଉଭୟଙ୍କୁ ଦୋଷୀ ସାବ୍ୟସ୍ତ କରିଥିଲେ। ଏହି ରାୟ ବିରୋଧରେ ସେମାନେ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ। ଅଭିଯୁକ୍ତଙ୍କ ତରଫରୁ ଆଇନଜୀବୀ ସତ୍ୟରଂଜନ ମୂଳିଆ ମାମଲା ପରିଚାଳନା କରୁଥିଲେ।
Advertisment

Sambad is now on WhatsApp
Join and get latest news updates delivered to you via WhatsApp