ଆଠଗଡ଼ରେ ପୁଣି ଏକ ଦନ୍ତାର ଜୀବନ ଗଲା: ହାତୀର ଶିକାର ଅନୁମାନ

କଟକ: ରାଜ୍ୟରେ ଅସୁରକ୍ଷିତ ଦନ୍ତା। ଆଠଗଡ଼ ଵନଖଣ୍ଡରେ ହାତୀ ମୃତ୍ୟୁ ଘଟଣା ଥମିବାର ନାଁ ଧରୁନି। ଆଠଗଡ଼ରେ ଆଜି ପୁଣି ଗୋଟିଏ ୨୦ ବର୍ଷର ଦନ୍ତା ହାତୀର ମୃତ୍ୟୁ ଘଟିଛି।
ଆଠଗଡ଼ ଵନଖଣ୍ଡ ରେଞ୍ଜ୍ ଵେତିଆ ଜଙ୍ଗଲ ନିକଟ ନୂଆବନ୍ଧ ନୂଆ ତଇଲା କାଜୁ ଜଙ୍ଗଲରେ ଏହି ହାତୀର ମୃତ୍ୟୁ ହୋଇଥିବା ଜଣାପଡ଼ିଛି। ତେବେ ହାତୀ ମୃତ୍ୟୁର କାରଣ ଅସ୍ପଷ୍ଟ ଥିବା ବେଳେ ଘଟଣାସ୍ଥଳରେ ବନବିଭାଗ ପହଞ୍ଚି ତଦନ୍ତ ଆରମ୍ଭ କରିଛି। ହାତୀ ଶୁଣ୍ଢରେ କ୍ଷତ ଚିହ୍ନ ଥିବାରୁ ହାତୀର ଶିକାର ହୋଇଥିବା ଅନୁମାନ କରାଯାଉଛି। ତେବେ ଏନେଇ ବନ ବିଭାଗ ମୁହଁ ଖୋଲୁନାହିଁ।

ସୂଚନାଯୋଗ୍ୟ, କିଛି ଦିନ ତଳେ ବଡ଼ମ୍ବା ଏବଂ ହିନ୍ଦୋଳ ସଂରକ୍ଷିତ ଜଙ୍ଗଲର ସୀମାବର୍ତ୍ତୀ ଅଞ୍ଚଳରୁ ଏକ ଗଳିତ ଗୁଳିବିଦ୍ଧ ଦନ୍ତା ହାତୀର ମୃତଦେହ ଉଦ୍ଧାର କରାଯାଇଥିଲା।  ଜଙ୍ଗଲରୁ ଗଳିତ ମୃତଦେହ ପାଇବା ସହ ତରବରିଆଭାବେ ତାକୁ ବ୍ୟବଚ୍ଛେଦ ପରେ ବନବିଭଗ ପୋତି ଦେଇଥିଲା। ଉଭୟ ଆଠଗଡ଼ ଓ ହିନ୍ଦୋଳ ବନଖଣ୍ଡର ଉଚ୍ଚ ପଦାଧିକାରୀଙ୍କ ଉପସ୍ଥିତିରେ ଶବ ବ୍ୟବଚ୍ଛେଦ କରାଯାଇଥିଲା।

ଏଣେ ଆଠଗଡ଼ ବନଖଣ୍ଡରେ ଗତ ଜାନୁଆରି ମାସରେ ଏକ ହାତୀର ମୃତ୍ୟୁ ଘଟିଥିଲା। ଆଠଗଡ଼ ବନଖଣ୍ଡ ଖୁଣ୍ଟୁଣୀ ବନାଞ୍ଚଳ ଅନ୍ତର୍ଗତ ସଂଖପୋଇ ଜଙ୍ଗଲ ନିକଟରେ ଏକ ଦନ୍ତା ହାତୀର ମୃତ୍ୟୁ ହୋଇଥିଲା। ହାତୀଟିର ବୟସ ପାଖାପାଖି ୧୫ରୁ ୨୦ ବର୍ଷ ହେବ ବୋଲି କୁହାଗଲା। ଏନେଇ ସୂଚନା ଦେଇଥିଲେ ଖୁଣ୍ଟୁଣୀ ରେଞ୍ଜର ନୀଳମାଧବ ସାହୁ। ତେବେ କେଉଁ କାରଣରୁ ମୃତ୍ୟୁ ହୋଇଥିଲା, ତାହା ଜଣାପଡ଼ିନଥିଲା।