ଗଞ୍ଜାମରେ ପୁଣି ଦନ୍ତାହତ୍ୟା, ଦାନ୍ତ କାଟିନେଲେ
ଜଗନ୍ନାଥପ୍ରସାଦ/ବେଲଗୁଣ୍ଠା/ପ୍ରତା
Sambad is now on WhatsApp
Join and get latest news updates delivered to you via WhatsApp
ଗତ ୧୭ ତାରିଖରେ ଗୋଟିଏ ମାଈହାତୀ, ଗୋଟିଏ ପିଲା ଓ ଗୋଟିଏ ଦନ୍ତହାତୀ ଦକ୍ଷିଣ ଘୁମୁସର ବନଖଣ୍ଡ ଅଧୀନ କାଦପଡ଼ା ଜଙ୍ଗଲ ଦେଇ ଉତ୍ତର ଘୁମୁସର ବନଖଣ୍ଡକୁ ଆସିଥିବା ଟ୍ରାକ୍ରୁ ଜଣାପଡ଼ିଥିଲା। ତେବେ ଆଜି କାଜୁଜଙ୍ଗଲ ନିକଟରୁ ଦୁର୍ଗନ୍ଧ ବାହାରିବା ସୂଚନା ମିଳିବା ପରେ ବିଡ଼ିପୁର ବିଟ୍ ଗାର୍ଡ଼ ଧନୁର୍ଦ୍ଧର ବେହେରା ପହଞ୍ଚି ହାତୀଟିର ଶବକୁ ଠାବ କରିଥିଲେ। ସଂଗେ ସଂଗେ ଜଗନ୍ନାଥପ୍ରସାଦ ବନାଞ୍ଚଳ ଅଧିକାରୀ ଉମାକାନ୍ତ ଦାଶ ସଦଳବଳେ ପହଞ୍ଚିଥିଲେ। ହାତୀଟିର ଶବ ଗୋଟିଏ କଡ଼କୁ ରହିଥିବା ବେଳେ ପାଖରେ କିଛି ବିଦ୍ୟୁତ୍ ତାର ବି ପଡ଼ିଥିବା ଦେଖିବାକୁ ମିଳିଥିଲା। ତେବେ ଡାହାଣ ଦାନ୍ତଟି ନଥିବା ସହ ପଛଭାଗରେ ଗୋଟିଏ ଛିଦ୍ର ଥିଲା। ଫଳରେ ବିଦ୍ୟୁତ୍ ଆଘାତରେ ନା’ ଗୁଳିମାଡ଼ରେ ହାତୀଟିର ମୃତ୍ୟୁ ହୋଇଛି ଏନେଇ କିଛି ସ୍ପଷ୍ଟ ହୋଇପାରିନି।
ତେବେ ରାତି ହୋଇ ଯାଇଥିବାରୁ ହାତୀଟିର ଶବକୁ ସେଠାରୁ ଉଦ୍ଧାର କରାଯାଇ ପାରିନି। ଏସିଏଫ୍ ବିକ୍ରମ ଦେବ ପଟ୍ଟନାୟକ ଓ ଅନ୍ୟାନ୍ୟ କର୍ମଚାରୀ ମାନେ ଜଗି ରହିଛନ୍ତି। ଆସନ୍ତା କାଲି ଶବ ବ୍ୟବଚ୍ଛେଦ ହେବ ବୋଲି ସୂଚନା ମିଳିଛି। ସୂଚନା ଥାଉକି, ଗତ ୬ ତାରିଖରେ ମୁଜାଗଡ଼ ରେଞ୍ଜ୍ ଇଲାକାରେ ଏକ ଦନ୍ତାର ଗଳିତ ଶବ ମିଳିଥିଲା। ଶିକାରୀମାନେ ତାକୁ ଗୁଳି କରି ଦୁଇଟିଯାକ ଦାନ୍ତ ନେଇଯାଇଥିଲେ। ଏହି ଘଟଣାରେ ବନ ବିଭାଗ ୩ ଜଣଙ୍କୁ ଗିରଫ କରିବା ସହ ଦୁଇଟି ଦାନ୍ତକୁ ମଧ୍ୟ ଜବତ କରିଥିଲା। ଆଜି ପୁଣି ଏକ ଦନ୍ତା ଶିକାର ବନ ବିଭାଗର ଦାୟିତ୍ବ ଉପରେ ପ୍ରଶ୍ନବାଚୀ ସୃଷ୍ଟି କରିଛି।