ହାତୀ ଆକ୍ରମଣରେ ଜଣେ ମୃତ

ଆନନ୍ଦପୁର: ଘସିପୁରା ଥାନା କୋଳିମାଟି ପଞ୍ଚାୟତ ନୂଆପଡ଼ା ଗ୍ରାମରେ ହାତୀ ଆକ୍ରମଣରେ ଜଣେ ଯୁବକଙ୍କ ମୃତ୍ୟୁ ଘଟିଛି। ମୃତକ ଜଣଙ୍କ ହେଲେ ବନ୍ଧ ଗ୍ରାମର ନିରଞ୍ଜନ ପାତ୍ର (୪୦)। ନିରଞ୍ଜନ ଆଜି ସନ୍ଧ୍ୟା ୭ଟାବେଳେ ସହଯୋଗୀ ବାବୁ ପାତ୍ରଙ୍କ ସହ ସାଇକଲରେ ନୂଆପଡ଼ା ଗ୍ରାମକୁ ଜାଳେଣି କାଠ ଆଣିବା ପାଇଁ ଯାଉଥିଲେ।

ହଠାତ୍‌ ଏକ ହାତୀ ରାସ୍ତା ଉପରକୁ ଆସି ନିରଞ୍ଜନଙ୍କୁ ଶୁଣ୍ଢରେ ଟେକି କଚାଡ଼ିବା ସହ ଦଳି ଦେଇଥିଲା। ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ବାବୁ ପ୍ରାଣ ବିକଳରେ ଦୌଡ଼ି ପଳାଇବାରୁ ହାତୀ ହାବୁଡ଼ରୁ ବର୍ତ୍ତି ଯାଇଥିଲେ। ଖବର ପାଇ ଘସିପୁରା ପୁଲିସ ଏବଂ ଘଟଗାଁ ବନ ବିଭାଗ କର୍ମଚାରୀ ପହଞ୍ଚି ତଦନ୍ତ ଆରମ୍ଭ କରିଛନ୍ତି।