ଇଂରାଜୀ ପୁସ୍ତକ ‘ଦି ଟାଇନି ଆଷ୍ଟ୍ରୋନଟ’ ପ୍ରକାଶିତ
କିଶୋର କବି ଅମ୍ଳାନ ଅକ୍ଷୟାନ୍ସୁ ସାହୁଙ୍କ କମାଲ
ଭବାନୀପାଟଣା : କିଶୋର କବି ଅମ୍ଳାନ ଅକ୍ଷୟାନ୍ସୁ ସାହୁଙ୍କର ପ୍ରଥମ ଇଂରାଜୀ କବିତା ସଂକଳନ “ଦି ଟାଇନି ଆଷ୍ଟ୍ରୋନଟ/କ୍ଷୁଦ୍ର ମହାକାଶଚାରୀ” ଯୁକ୍ତରାଷ୍ଟ୍ର ଆମେରିକାର ଡବଲୀନ ସ୍ଥିତ ବ୍ଲାକ ଇଗଲ ବୁକ୍ସ ନାମକ ଏକ ଆନ୍ତର୍ଜାତିକ ପ୍ରକାଶନ ସଂସ୍ଥା ଦ୍ୱାରା ଗତ ତା ୪.୦୮.୨୦ ରିଖରେ ପ୍ରକାଶିତ ହୋଇଯାଇଛି । ଅନଲାଇନ ଆମାଜନ ଦ୍ୱାରା ପୃଥିବୀର ଯେ କୌଣସି ସ୍ଥାନରୁ ଇଂରାଜୀ କବିତାରେ ରୁଚି ରଖୁଥିବା ପାଠକ ପାଠିକା ମାନଙ୍କ ପାଇଁ ଉପଲବ୍ଧ ଏହି କବିତା ପୁସ୍ତକଟିରେ ଅମ୍ଳାନଙ୍କ ୫୧ଟି କବିତା ସଙ୍କଳିତ ହୋଇଛି । ଶବ୍ଦ, ଭାବ ଓ ଗାମ୍ଭିର୍ଯ୍ୟର ପରିପାଟିରେ ସମୃଦ୍ଧ ପ୍ରତ୍ୟେକଟି କବିତା ଆମେ ଜିଉଁଥିବା ଜୀବନ ପ୍ରତି ଏକ କୈଶୋର ଦୃଷ୍ଟିଭଙ୍ଗୀର କାବ୍ୟିକ ପରିପ୍ରକାଶ । ଜୀବନ ଦର୍ଶନର ବିଭିନ୍ନ ଦିଗକୁ ଉନ୍ମୋଚିତ କରୁଥିବା ଏହି ଇଂରାଜୀ କବିତା ଗୁଡିକ ଉଭୟ ବାସ୍ତବ ଓ କଳ୍ପନାର ତାରକସି ମିଶ୍ରଣ । ପୁସ୍ତକରେ ସନ୍ନିହିତ ୫୧ଟି କବିତା ମଧ୍ୟରୁ ପ୍ରତ୍ୟେକ କବିତା ଜୀବନ ସହିତ ଜଡିତ ବିଭିନ୍ନ ଘଟଣା ପ୍ରବାହର ଜୀବନ୍ତ କାବ୍ୟିକ ଅନୁଶୀଳନ । ସଂକଳନସ୍ଥ ‘କ୍ରିବ୍ ଡ୍’ କବିତାରେ ବାସ୍ତବ ଜୀବନର ଅପୂର୍ଣ୍ଣତାର ସୌନ୍ଦର୍ଯ୍ୟ, ‘ ହିଅର ଲାଏଜ୍ ଏ ହ୍ୟୁମାନ୍’ କବିତାରେ ଅବଶ୍ୟମ୍ଭାବି ମୃତ୍ୟୁର ଚିରନ୍ତନ ସତ୍ୟତା, ‘ଏମ୍ପଟି ଷ୍ଟାର୍ ସ୍’ ରେ ଭ୍ରୁଣହତ୍ୟା ସମ୍ପର୍କିତ ବର୍ଣ୍ଣନା, ‘ଉଇଣ୍ଡୋ’ କବିତାରେ ଝରକାର ରୂପକଳ୍ପ ମାଧ୍ୟମରେ ଜୀବନ ବୋଧର ସୂକ୍ଷ୍ମ ବିଶ୍ଳେଷଣ ଅମ୍ଳାନ ଅକ୍ଷୟାନ୍ସୁଙ୍କର କବିସୁଲଭ ଦୃଷ୍ଟିଭଙ୍ଗୀ ଓ ସୃଜନଶୀଳତାର ଭାବସ୍ନାତ ପ୍ରମାଣ ।
Sambad is now on WhatsApp
Join and get latest news updates delivered to you via WhatsApp
ଜୀବନର ଶବ୍ଦଛବି କବିତା ପୁସ୍ତକ ‘ଦ ଟାଇନି ଆଷ୍ଟ୍ରୋନଟ’ ବିଶ୍ଵବ୍ୟାପୀ ଇଂରାଜୀ କବିତା ପ୍ରେମୀ ପାଠକଙ୍କ ନିକଟରେ ବେଶ୍ ଆଦୃତ ହେବା ସହ ବିପୁଳ ପାଠକୀୟ ଶ୍ରଦ୍ଧା ଲାଭ କରିବା ବୋଲି ଆଶା କରାଯାଉଛି ।