ପ୍ରତି ଘର ହେଉ ସାହିତ୍ୟଘର: ସୌମ୍ୟରଂଜନ

ଟମକା: ଓଡ଼ିଶାର ପ୍ରତ୍ୟେକଟି ଘର ହେଉ ସାହିତ୍ୟଘର। ଭାବ ଓ ଭାଷାକୁ ନେଇ ସାହିତ୍ୟର ସୃଷ୍ଟି। ବିପଦରେ ପଡ଼ିଲେ ସମସ୍ତଙ୍କର ଘର କଥା ମନେ ପଡ଼େ। ଆମ ଭାଷାସାହିତ୍ୟ ବର୍ତ୍ତମାନ ବିପଦ ଦେଇ ଗତି କରୁଛି। ତେଣୁ ଆସନ୍ତୁ ଆମେ ସମସ୍ତେ ସାହିତ୍ୟଘର ମୁହାଁ ହୋଇ ଆମ ଭାଷାସାହିତ୍ୟକୁ ରକ୍ଷା କରିବା। ଟମକା ‘ସମ୍ବାଦ ସାହିତ୍ୟଘର’ ହେଉଛି ଦାନଗଦୀ ବ୍ଲକ୍‌ର ଦ୍ୱିତୀୟ ସାହିତ୍ୟଘର। ଏହାର ପ୍ରଥମ ବାର୍ଷିକୋତ୍ସବରେ ମୁଁ ଯୋଗଦେଇ ଅତ୍ୟନ୍ତ ଆନନ୍ଦିତ ବୋଲି ଇଷ୍ଟର୍ଣ୍ଣ ମିଡିଆ ଲିମିଟେଡ୍‌ର ଅଧ୍ୟକ୍ଷ ସୌମ୍ୟରଂଜନ ପଟ୍ଟନାୟକ କହିଛନ୍ତି। ସାହିତ୍ୟଘରର ଦାୟିତ୍ୱ କେବଳ, ଗଳ୍ପ, କବିତା, ନାଟକ ଲେଖାରେ ସୀମିତ ନରହୁ, ବରଂ ସମାଜରୁ ଘୃଣା ଓ ଈର୍ଷାକୁ ଦୂରକରି ସୁନ୍ଦର ସମାଜ ଗଠନରେ ସହାୟକ ହେଉ ବୋଲି ମୁଖ୍ୟ ଅତିଥି ଶ୍ରୀ ପଟ୍ଟନାୟକ ପ୍ରକାଶ କରିଛନ୍ତି। 

ରବିବାର ଯାଜପୁରଜିଲ୍ଲା ଦାନଗଦୀ ବ୍ଲକ୍‌ ଗୋବର୍ଦ୍ଧନପୁର ପଞ୍ଚାୟତର ମାନପୁର ସରକାରୀ ଉଚ୍ଚବିଦ୍ୟାଳୟ ପ୍ରେକ୍ଷାଳୟରେ ଆୟୋଜିତ ଏହି କାର୍ଯ୍ୟକ୍ରମରେ ସ୍ୱତନ୍ତ୍ର ନିମନ୍ତ୍ରିତ ଅତିଥି ଭାବେ ‘ସମ୍ବାଦ ସାହିତ୍ୟଘର’ର ରାଜ୍ୟ ସଂଯୋଜିକା ଡ. ଶୁଭଶ୍ରୀ ଲେଙ୍କା ଯୋଗ ଦେଇ କହିଥିଲେ, ସମ୍ବାଦ ସାହିତ୍ୟଘରରେ ମହିଳାମାନେ ଅଧିକ ସଂଖ୍ୟାରେ ସାମିଲ ହୁଅନ୍ତୁ। ମା’ ମାଟି, ମାତୃଭାଷାର ମମତା ସାହିତ୍ୟଘରର ଧ୍ୟେୟ ହେଉ। ମୁଖ୍ୟବକ୍ତା ଭାବେ ଅବସରପ୍ରାପ୍ତ ପ୍ରାଧ୍ୟାପକ ଡ. ମନୋରଞ୍ଜନ ମହାନ୍ତି ଯୋଗ ଦେଇ ଓଡ଼ିଆ, ସଂସ୍କୃତ ଓ ଇଂରାଜୀ ସାହିତ୍ୟର କାଳଜୟୀ ସ୍ରଷ୍ଟାଙ୍କ ସୃଷ୍ଟିସମ୍ଭାର ଉପରେ ସାରଗର୍ଭକ ଆଲୋଚନା କରିଥିଲେ। ସାହିତ୍ୟଘର ସଭାପତି ଅକ୍ଷୟ କୁମାର ରାଉତ ସଭାରେ ଅଧ୍ୟକ୍ଷତା କରିଥିଲେ। ସଂପାଦକ ଡ. ଯୁଗଳ କିଶୋର ହୋତା, ଉପଦେଷ୍ଟା ଗୋକୁଳ ବିହାରୀ ପୃଷ୍ଟି ଓ କୁଳମଣି ଦତ୍ତ ସାହିତ୍ୟଘର ସମ୍ପର୍କରେ ସୂଚନା ଦେଇଥିଲେ। ଟମକା ‘ସମ୍ବାଦ’ ପ୍ରତିନିଧି ତଥା ସାହିତ୍ୟଘର ସଂଯୋଜକ ହରିହର ବାରିକ ବାର୍ଷିକ ବିବରଣୀ ପାଠ କରିଥିଲେ। ଏହି ଅବସରରେ ‘ସମ୍ବାଦ’ରେ ପ୍ରକାଶିତ ‘ଇନ୍ଦ୍ରଧନୁ’ ପୃଷ୍ଠାକୁ ଅତିଥିମାନେ ଉନ୍ମୋଚିତ କରିଥିଲେ। ଯୁବ ଉପସ୍ଥାପକ ବାବାଜୀ ଚରଣ ଜେନା ଓ ତାରିଣୀ ପ୍ରସାଦ ପୁହାଣ ମଞ୍ଚ ପରିଚାଳନା କରିଥିଲେ।