ବିଲକୁ ଫେରିଲେ ପୂର୍ବତନ ବିଧାୟକ ଡମ୍ବରୁ ସୀସା : ବିଲରେ ବିହନ ବୁଣିବା ସହ ଚାଷ ଜମିକୁ ସବୁଜିମା କରିବାକୁ ଅକ୍ଲାନ୍ତ ପରିଶ୍ରମ କରୁଛନ୍ତି ଏହି ପୂର୍ବତନ ବିଧାୟକ

ଚିତ୍ରକୋଣ୍ଡା : ହାତରେ ଧାନ ବିହନ ଆଉ ବାଲ୍ଟି ଗୋଟେ ଧରି ବିଲକୁ ଫେରିଲେ ପୂର୍ବତନ ବିଧାୟକ। ରାଜନୀତି ବାଦ୍ ନିଜକୁ ଚାଷ କାମରରେ ନିୟୋଜିତ କଲେ ଚିତ୍ରକୋଣ୍ଡାର ପୂର୍ବତନ ବିଧାୟକ ଡମ୍ବରୁ ସୀସା। ସାଧାରଣ ନିର୍ବାଚନରେ ଟିକେଟରୁ ବଞ୍ଚିତ ହୋଇଥିବା ଆଦିମ ବଣ୍ଡା ଜନଜାତି ସମ୍ପ୍ରଦାୟର ପୂର୍ବତନ ବିଧାୟକ ଡମ୍ବରୁ ସୀସା ଏବେ ଚାଷ କ୍ଷେତରେ ନିଜକୁ ନିୟୋଜିତ କରିଛନ୍ତି । ଜଣେ ସାଧାରଣ ମଣିଷ ପରି ବିଲରେ ଧାନ ବିହନ ବୁଣୁଥିବାର ଦେଖିବାକୁ ମିଳିଛି।

ଗତ ୨୦୧୪ ସାଧାରଣ ନିର୍ବାଚନରେ ଚିତ୍ରକୋଣ୍ଡା ବିଧାନସଭା କ୍ଷେତ୍ରରୁ ଡମ୍ବରୁ ସୀସା ଆଦିମ ବଣ୍ଡା ଜନଜାତି ସମ୍ପ୍ରଦାୟର ବିଧାୟକ ଭାବେ ବିପୁଳ ଭୋଟରେ ନିର୍ବାଚିତ ହୋଇଥିଲେ। ହେଲେ ଚଳିତ ଥର ତାଙ୍କୁ ଆଉ ଟିକେଟ୍ ମିଳିନଥିଲା। ଏହାପରେ ସେ ନିଜକୁ ଚାଷ କ୍ଷେତ୍ରରେ ନିୟୋଜିତ କରିଥିବା ଦେଖିବାକୁ ମିଳିଛି। ସୂଚନା ମୁତବକ, ଡମ୍ବରୁ ସୀସା ଚିତ୍ରକୋଣ୍ଡାର ଖଇରପୁଟ ଠାରେ ଥିବା ୩୦ ଏକର ଚାଷ ଜମିରେ ନିଜେ ଧାନ ବିହନ ବୁଣୁଛନ୍ତି। ଆଉ ଏକ ସାଧାରଣ ଲୋକଙ୍କ ଭଳି ନିଜସ୍ୱ ଚାଷ ଜମିକୁ ସବୁଜିମା କରିବାକୁ ଅକ୍ଲାନ୍ତ ପରିଶ୍ରମ କରିଛନ୍ତି ଏହି ପୂର୍ବତନ ବିଧାୟକ।

ସବୁଠାରୁ ବଡ଼ କଥା ହେଲା କି, ଆଦିମ ବଣ୍ଡା ଜନଜାତିର ସବୁଠାରୁ ଉଚଶିକ୍ଷିତ ବିଧାୟକ ଭାବେ ବିଧାନସଭାକୁ ନିର୍ବାଚିତ ହୋଇଥିଲେ ଡମ୍ବରୁ ସୀସା। ଯାହା କି ତାଙ୍କୁ ନିଜ ଅଞ୍ଚଳରେ ବେଶ୍ ପରିଚିତ କରିଛି। ହେଲେ ରାଜନୀତିକୁ ଆସିବା ପୂର୍ବରୁ ମଧ୍ୟ ଚିତ୍ରକୋଣ୍ଡାର ଏହି ପୂର୍ବତନ ବିଧାୟକ ନିଜ କୂଳ ବେଉସା ଚାଷ କାର୍ଯ୍ୟକୁ ଭୂଲି ନାହାନ୍ତି। ଆଉ ରାଜନୀତି ମୈଦାନ ନୁହେଁ ବରଂ ନିଜର ପାରମ୍ପାରିକ ବୃତ୍ତି ଚାଷ କାର୍ଯ୍ୟ ପାଇଁ ଖୋଦ୍ ବିଲକୁ ଓହ୍ଲାଇଛନ୍ତି ପୂର୍ବତନ ବିଧାୟକ ଡମ୍ବରୁ ସୀସା।

ତେବେ କେବଳ ଡମ୍ବରୁ ସୀସା ନୁହଁନ୍ତି, ବରଂ ପୂର୍ବରୁ ମଧ୍ୟ ବିଷମ କଟକ ବିଧାୟକ ଜଗନ୍ନାଥ ସାରକା ବିଲରେ ଚାଷ କରୁଥିବା ନଜର ଆସିଛନ୍ତି । ଜନସେବା ସହ ନିଜର ପାରମ୍ପାରିକ ବେଉସାକୁ ନଭୂଲିବା ପାଇଁ ଏଭଳି ବାର୍ତ୍ତା ଦେଉଛନ୍ତି ଡମ୍ବରୁ ସୀସା ଏବଂ ଜଗନ୍ନାଥ ସାରକଙ୍କ ଭଳି ଲୋକପ୍ରତିନିଧି।