କୃଷକ ବଜାରରୁ ଜାଲ୍‌ ନୋଟ୍‌ ଜବତ, ଜଣେ ଅଟକ

କଟକ-ସିଡିଏ : ରବିବାର ସଂଧ୍ୟାରେ କୃଷକବଜାରରୁ ଜାଲ୍‌ ନୋଟ୍‌ ଜବତ କରାଯାଇଥିବା ସୂଚନା ମିଳିଛି। ଏହି ଘଟଣାରେ ବିଡ଼ାନାସୀ ଥାନା ପୁଲିସ ଜଣକୁ ଅଟକ ରଖିଥିବା​ ଜଣାପଡ଼ିଛି। ଅଭିଯୁକ୍ତଜଣକ ଢେଙ୍କାନାଳ ଅଞ୍ଚଳର ହୋଇଥିଲା ବେଳେ ସେ କଟକରେ ରହି ରଙ୍ଗ କାମ କରୁଥିବା ଜଣାପଡ଼ିଛି। ତା’ ଠାରୁ ସାଇକଲ୍‌, ମୋବାଇଲ୍‌ ଏବଂ କିଛି ନକଲି ନୋଟ୍‌ ଜବତ କରାଯାଇଥିବା ଅଭିଯୋଗ ହୋଇଛି।

ସୂଚନାନୁସାରେ, ଢ଼େଙ୍କାନାଳର ରଙ୍ଗ ମିସ୍ତ୍ରିଜଣକ କୃଷକବଜାରକୁ ଶୁଖୁଆ କିଣିବାକୁ ଆସିଥିଲା। ଶୁଖୁଆ ନେବା ପାଇଁ ସେ ଶୁଖୁଆ ବେପାରୀଙ୍କୁ ୨୦୦ ଟଙ୍କିଆ ନୋଟ୍ ଦେଇଥିଲା। ବ୍ୟବସାୟୀଜଣକ ଉକ୍ତ ନୋଟ୍‌କୁ ଦେଖି ସନ୍ଦେହ କରି ଅଭିଯୁକ୍ତର ପିଛା କରି ତାକୁ କାବୁ କରିନେଇଥିଲେ। ଅଭିଯୁକ୍ତଜଣକ ବ୍ୟବସାୟୀଙ୍କ ଆଗରେ ସଫେଇ ଦେଇଥିଲା ଯେ, ଉକ୍ତ ଟଙ୍କା ତାକୁ ପାରିଶ୍ରମିକ ବାବଦ ମିଳିଛି। ସୂଚନା ପାଇ ପୁଲିସ ଘଟଣାସ୍ଥଳରୁ ଅଭିଯୁକ୍ତକୁ ଥାନାକୁ ନେଇଯାଇଥିବା ଜଣାପଡ଼ିଛି। ଏ ସମ୍ପର୍କରେ ଜୋନ୍‌-୩ ଏସିପି ତାପସ ଚନ୍ଦ୍ର ପ୍ରଧାନଙ୍କୁ ପଚାରିବାରେ, ଜାଲ୍‌ ନୋଟ ଅଭିଯୋଗକୁ ନେଇ ଜଣଙ୍କୁ ଅଟକ ରଖାଯାଇଛି। ଜାଲ୍‌ ଅଭିଯୋଗର ସତ୍ୟସତ୍ୟ ଉପରେ ଯାଞ୍ଚ କରାଯାଉଛି।