ଫମ୍ପା ମାଠିଆର ଶବ୍ଦ ବେଶି: ସୂରଜ ସୂର୍ଯ୍ୟବଂଶୀ

ଭୁବନେଶ୍ବର: ବିଜେଡିର ନୂଆ ନୂଆ ମୁଖିଆ ସାଜିଥିବା ଭିକେ ପାଣ୍ଡିଆନ କେବଳ ଫମ୍ପା ମାଠିଆଙ୍କ ପରି କଥା କହୁଛନ୍ତି। ପାଣ୍ଡିଆନ ନା ଓଡ଼ିଶାର ଇତିହାସ ଜାଣିଛନ୍ତି ନା ଧାମନଗର ଇତିହାସ ବୁଝିଛନ୍ତି। ୧୯୮୫ ମସିହାରୁ ଧାମନଗର ବିଜେପି ସହ ଅଛି ଓ ବିଜେପି ଧାମନଗରବାସୀଙ୍କ ସାଥୀରେ ଅଛି। ଏଥିପାଇଁ କାହାର ସାର୍ଟିଫିକେଟ୍ ଦରକାର ନାହିଁ ବୋଲି ବିଜେଡିର ଧାମନଗର ବିଧାୟକ ସୂରଜ ସୂର୍ଯ୍ୟବଂଶୀ। ସେ କହିଛନ୍ତି ଯେ ଗତ ଉପ-ନିର୍ବାଚନରେ ଲୋକଙ୍କ ଜନମତକୁ ସ୍ୱୀକାର ନ କରି ଭ‌ି.କେ ପାଣ୍ଡିଆନ ଆଜି ଯେଉଁ କଥା କହିଛନ୍ତି ତାହା ଧାମନଗରବାସୀଙ୍କ ମତକୁ ତାତ୍ସଲ୍ୟ କରିବା ଭଳି। ଭଦ୍ରକର ବିକାଶ ପାଇଁ ମୋଦୀ ୧୦ ହଜାର କୋଟିରୁ ଉର୍ଦ୍ଧ୍ୱ ଟଙ୍କା ଦେଇଛନ୍ତି। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପାଇଁ ଧାମରା ଏଲଏନ୍‌ଜି ପ୍ରାଇଭେଟ୍‌ ଲିମିଟେଡ୍(ଡିଏଲଟିପିଏଲ) ୬ ହଜାର କୋଟି ଟଙ୍କା ବ୍ୟୟରେ ଧାମରା ବନ୍ଦର ପରିସରରେ ବାର୍ଷିକ ୫ ମିଲିୟନ ମେଟ୍ରିକ୍ ଟନ୍ ବିଶିଷ୍ଟ ଏଲଏନଜି ରି-ଗ୍ୟାସିଫିକେସନ ଟର୍ମିନାଲକୁ ବିକଶିତ କରୁଛି। ଭଦ୍ରକ ଜିଲ୍ଲା ଭଣ୍ଡାରିପୋଖରୀଠାରେ ପ୍ରାୟ ୨ ହଜାର କୋଟି ଟଙ୍କା ବିନିଯୋଗରେ ଆଇଓସିଏଲ୍ ଟେକ୍ସଟାଇଲ୍ ପାର୍କ ନିର୍ମାଣ କରାଯାଉଛି। ଭଦ୍ରକ ଓ ନାରାୟଣଗଡ଼ ମଧ୍ୟରେ ୧୫୫ କି.ମିର ତୃତୀୟ ରେଳ ଲାଇନ ନିର୍ମାଣ ପାଇଁ ୧,୮୮୬.୩୧ କୋଟି ମଞ୍ଜୁର ହୋଇଛି।

ବିଧାୟକ କହିଲେ, ଭଦ୍ରକ ଓ କେନ୍ଦ୍ରାପଡ଼ାର ବିକାଶରେ ଗତି ଦେବା ପାଇଁ ନିକଟରେ କେନ୍ଦ୍ର ସରକାରଙ୍କ ସାଗରମାଳା ପ୍ରକଳ୍ପ ଅଧୀନରେ ଧାମରା ବନ୍ଦରକୁ ଆସିବାକୁ ଥିବା ଆରଓ-ପାକ୍ସ ଜେଟି ପ୍ରକଳ୍ପ ପାଇଁ ୧୧୦ କୋଟି ମଞ୍ଜୁର କରାଯାଇଛି। ଅମୃତ ଯୋଜନା ଅଧୀନରେ ଭଦ୍ରକରେ ସହରାଞ୍ଚଳ ଭିତ୍ତିଭୂମି ବିକାଶ ପାଇଁ ୮୦.୦୨ କୋଟି ଟଙ୍କା, ପ୍ରଧାନମନ୍ତ୍ରୀ ଆବାସରେ ଭଦ୍ରକ ଜିଲ୍ଲାରେ ଗରିବ ଲୋକମାନଙ୍କୁ ପ୍ରାୟ ୧୦୮ କୋଟି ଟଙ୍କା ବ୍ୟୟରେ ୭୨ ହଜାର ୪୧୬ ଟି ପକ୍କା ଘର, ଜାତୀୟ ଖାଦ୍ୟ ସୁରକ୍ଷା ଅଧିନିୟମରେ ଭଦ୍ରକରେ ୧୧.୩୪ ଲକ୍ଷ ହିତାଧିକାରୀ ସାମିଲ ହୋଇଛନ୍ତି। ଉଜ୍ୱଳା ଯୋଜନାରେ ରାଜ୍ୟର ୫୨ ଲକ୍ଷରୁ ଅଧିକ ଘର ଗ୍ୟାସ ପାଇଥିବା ବେଳେ ଏହି ଯୋଜନାରେ ଭଦ୍ରକରେ ୨.୦୮ ଲକ୍ଷରୁ ଅଧିକ ଏଲପିଜି ଗ୍ୟାସ ସଂଯୋଗ କରାଯାଇଛି।