ବାତ୍ୟା ଫନିକୁ ୬ଦିନ ବିତିଯାଇଥିଲେ ବି ସ୍ୱାଭାବିକ ହୋଇନାହିଁ ପୁରୀ ଜିଲ୍ଲା !
ପୁରୀ: ସମଗ୍ର ପୁରୀ ଜିଲ୍ଲା ବାତ୍ୟା ଫନିରେ ଧ୍ୱସ୍ତବିଧ୍ୱସ୍ତ ହୋଇଯାଇଛି । ବାତ୍ୟାକୁ ୬ଦିନ ବିତିଯାଇଥିଲେ ସ୍ୱାଭାବିକ ହେଉନି ପୁରୀ । ରାସ୍ତାରୁ ହଟୁନି ଗଛ, ପିଇବା ପାଣି ଓ ବିଦ୍ୟୁତ୍ ପାଇଁ ସଂଘର୍ଷ କରୁଛନ୍ତି ଲୋକେ । ସବୁଠି ହାହାକାର ସ୍ଥିତି । ବାସହରା ହୋଇଛନ୍ତି ହଜାର ହଜାର ଲୋକ । ମୁଣ୍ଡ ଉପରେ ଛାତ ନାହିଁ, ପିଇବାକୁ ପାଣି ମୁନ୍ଦେ ନାହିଁ । ରାତି ହେଲେ ଚାରିଆଡେ ଶୂନ ଶାନ । ଅନ୍ଧାର ରାତିରେ ଅଜଣା ଭୟର ବାତାବରଣ ସୃଷ୍ଟି ହେଉଛି । ବହୁ ସଂଖ୍ୟାରେ ବିଜୁଳି ଖୁଂଟ ନଷ୍ଟ ହୋଇଥିବାରୁ କେବେ ବିଜୁଳି ଫେରିବ ତାହା କହିବା ମୁସ୍କିଲ ।
Sambad is now on WhatsApp
Join and get latest news updates delivered to you via WhatsApp
ରାସ୍ତା ଉପରେ ଜମା ହୋଇ ରହିଛି ଭଙ୍ଗା ଗଛ ଓ ବାଲି । ଏବେ ବି ରିଲିଫ କ୍ୟାମ୍ପରେ କଟୁଛି ବାତ୍ୟା ପ୍ରଭାବିତଙ୍କ ଜୀବନ । ରାତିସାରା ବିନା ବିଜୁଳିରେ ଲୋକ ନାହିଁନଥିବା ଅସୁବିଧା ଭୋଗୁଛନ୍ତି । ପ୍ରବଳ ଗରମରେ ଲୋକ ଡହଳବିକଳ ହେଉଛନ୍ତି । ତାହାରି ସାଙ୍ଗକୁ ତାଳ ଦେଇ ପାଣି ବି କିଛି କମ ହଇରାଣ କରୁନାହିଁ । ପିଇବା ପାଣି ଟୋପାଏ ପାଇଁ କେଉଁ ଆଡେ ଯିବାକୁ ପଡୁଛି ତାହାର କୌଣସି ହିସାବ ନାହିଁ । ଯେଉଁଠାରେ ମିଳୁଛି ସେଠାରେ ଲମ୍ବା ଲାଇନ ।
ସନ୍ଧ୍ୟା ନଇଁଲେ କଥା ସରିଲା । କିଟିକିଟି ଅନ୍ଧାର ମଧ୍ୟରେ କଟୁଛି ରାତି । କେବଳ ଅପେକ୍ଷା କେବେ ସକାଳ ହେବ ? ନା ରାତିରେ ଶୋଇ ହେଉଛି ନା ଖାଇ ହେଉଛି । କେବଳ ଯନ୍ତ୍ରଣା ମଧ୍ୟରେ ସହରବାସୀ । କେବଳ ଏତିକି ନୁହେଁ କାହାକୁ ମଧ୍ୟ ଫୋନ ଲାଗୁନାହିଁ । ତେଣୁ କୌଣସି ଯୋଗାଯୋଗ ମଧ୍ୟ ହୋଇପାରୁନାହିଁ । କେବେ ସ୍ୱାଭାବିକ ହେବ ସ୍ଥିତି ତାହାକୁ ନେଇ ଚିନ୍ତାରେ ସ୍ଥାନୀୟ ଅଞ୍ଚଳବାସୀ ।