ଫୋନି ମୁକାବିଲା : ପୁଣି ଥରେ ଜରୁରୀ ବୈଠକ ଡାକିଲେ କ୍ୟାବିନେଟ ସଚିବ, ଓଡ଼ିଶା ମାଗିଲା ୨ଟି ହେଲିକାପ୍ଟର
ଭୁବନେଶ୍ୱର : ସାମୁଦ୍ରିକ ଝଡ଼ ଫୋନି ଉପରେ ତୀକ୍ଷଣ ନଜର ରଖିଛନ୍ତି କେନ୍ଦ୍ର ସରକାର । କିଛି ସମୟପୂର୍ବେ ପୁଣି ଥରେ କେନ୍ଦ୍ର କ୍ୟାବିନେଟ ସଚିବ ପି.କେ.ସିହ୍ନା ଜାତୀୟ ବିପର୍ଯ୍ୟୟ ପରିଚାଳନା କମିଟିର ଆଉ ଏକ ଜରୁରୀ ବୈଠକ ଡାକି ବାତ୍ୟା ମୁକାବିଲା ପ୍ରସ୍ତୁତିର ସମୀକ୍ଷା କରିଛନ୍ତି । ଏହି ବୈଠକରେ ତାମିଲନାଡୁ, ଆନ୍ଧ୍ରପ୍ରଦେଶ, ଓଡ଼ିଶା ଏବଂ ପଶ୍ଚିମବଙ୍ଗର ମୁଖ୍ୟ ସଚିବ ଓ ପ୍ରମୁଖ ସଚିବମାନେ ପୁଣିଥରେ ଭିଡିଓ କନଫରେନ୍ସ ମାଧ୍ୟମରେ ଏହି ବୈଠକରେ ଯୋଗ ଦେଇଥିଲେ । ଏହି ଅବସରରେ ଓଡ଼ିଶା ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢୀ ବାତ୍ୟା ମୁକାବିଲା ଲାଗି ୨ଟି ହେଲିକାପ୍ଟର ଓ ଏନଡିଆରଏଫର ଅତିରିକ୍ତ ଟିମ ଯୋଗାଇଦେବା ପାଇଁ ଅନୁରୋଧ କରିଥିଲେ ।
Sambad is now on WhatsApp
Join and get latest news updates delivered to you via WhatsApp
ଏହି ସାମୁଦ୍ରିକ ଝଡ଼ ଫଳରେ ସୃଷ୍ଟି ହେବାକୁ ଥିବା ଯେକୌଣସି ପରିସ୍ଥିତିର ମୁକାବିଲା କରିବା ପାଇଁ ସେମାନେ ସମ୍ପୂର୍ଣ୍ଣ ପ୍ରସ୍ତୁତ ବୋଲି ସମ୍ପୃକ୍ତ ରାଜ୍ୟ ସରକାରମାନଙ୍କର ପଦାଧିକାରୀମାନେ ବୈଠକରେ ଦୃଢ଼ୋକ୍ତି ପ୍ରକାଶ କରିଥିଲେ । ପୁନଶ୍ଚ ସମୁଦ୍ର ମଧ୍ୟକୁ ନଯିବା ପାଇଁ ରାଜ୍ୟ ସରକାରମାନେ ମତ୍ସ୍ୟଜୀବୀମାନଙ୍କୁ ସତର୍କ କରିଛନ୍ତି । ଏହି ନିଷେଧାଦେଶକୁ ଫଳପ୍ରଦ ଭାବେ ପାଳନ କରିବା ପାଇଁ ରାଜ୍ୟ ସରକାରମାନଙ୍କୁ ନିର୍ଦ୍ଦେଶ ଦିଆଯାଇଥିଲା । ରାଜ୍ୟ ସରକାରମାନଙ୍କର ଅନୁରୋଧ ମୁତାବକ ଏସଡିଆରଏଫର ପ୍ରଥମ ଦଫାକୁ ଆଗୁଆ ପ୍ରଦାନ କରିବା ପାଇଁ ଘରୋଇ ମନ୍ତ୍ରଣାଳୟ ତରଫରୁ ଆଶ୍ୱାସନା ପ୍ରଦାନ କରାଯାଇଥିଲା ।
ରାଜ୍ୟ ସରକାରଙ୍କ ଅଧିକାରୀମାନଙ୍କ ସହ ବୁଝାମଣା ରଖାଯାଉଛି ଏବଂ ଏନଡିଆରଏଫ ଓ ଭାରତୀୟ ତଟରକ୍ଷୀ ବାହିନୀକୁ ସତର୍କ କରାଯାଇଛି । ସେମାନେ ସଠିକ ସ୍ଥାନରେ ମହଜୁଦ ରହି ନିଜକୁ ସମ୍ପୂର୍ଣ୍ଣ ଭାବେ ପ୍ରସ୍ତୁତ କରି ରଖିଛନ୍ତି । ଏନଡିଆରଏଫର ମୋଟ ୪୧ଟି ଟିମକୁ ପ୍ରସ୍ତୁତ ରଖାଯାଇଛି ।