ମାଛ ଚୋରିକୁ ପ୍ରତିବାଦ କରିବାରୁ ଚାଷୀଙ୍କୁ ହତ୍ୟା

ବେଲଗୁଣ୍ଠା : ଗଞ୍ଜାମ ଜିଲ୍ଲା ଗାଙ୍ଗପୁର ଥାନା କୁଲାଙ୍ଗି ପଞ୍ଚାୟତ ସିଆରିମାଳ ଗ୍ରାମରେ ବେନ୍ଦାରୁ ମାଛ ଚୋରିକୁ ପ୍ରତିବାଦ କରିବାରୁ ଜ‌ଣେ ଚାଷୀଙ୍କୁ ହତ୍ୟା କରାଯାଇଛି। ମୃତକଜଣକ ହେଲେ, ଗ୍ରାମର ଦିଲ୍ଲୀପ ସ୍ବାଇଁ (୫୦)।

ସୂଚନାନୁସାରେ, ଦିଲ୍ଲୀପ ତାଙ୍କ ଘରର ପଛପଟେ ୨୦୦ ମିଟର ଦୂରରେ ଥିବା ଜମିରେ ମାଛ ଧରିବାକୁ ରାତିରେ ବେନ୍ଦା ପକାଉଥିଲେ। କିନ୍ତୁ, ସକାଳୁ ମାଛ ପଡ଼ୁ ନଥିବା ଦେଖି ଚୋରି ହେଉଥିବା ସନ୍ଦେହ କରୁଥିଲେ। ଏହା ଜାଣିବାପରେ ସେ ଗତକାଲି ରାତି ୧୦ଟାରେ ଦିଲ୍ଲୀପ ଜମି ନିକଟକୁ ଯାଇ ଲୁଚି ରହିଥିଲେ। ଏହିସମୟରେ ଗ୍ରାମର ଭରତ ତାରିଣୀ (୨୫) ବେନ୍ଦାରୁ ମାଛ ଚୋରି କରି ନେଉଥିବା ଦେଖି ସେ ପ୍ରତିବାଦ କରିଥିଲେ। ଫଳରେ ଉଭୟଙ୍କ ମଧ୍ୟରେ ପ୍ରବଳ ବଚସା ହୋଇଥିଲା। ପରେ ଉଭୟ ଗାଁ ମୁଣ୍ଡରେ ଥିବା ବ୍ରାହ୍ମଣୀଦେବୀ ମନ୍ଦିର ପାଖରେ ପୁଣି ଥରେ ପାଟିତୁଣ୍ଡ କରିଥିଲେ। ଏଥିରେ ଭରତ ଉତ୍‌କ୍ଷିପ୍ତ ହୋଇ ଏକ କାତିରେ ଦିଲ୍ଲୀପଙ୍କୁ ଏକାଧିକ ଚୋଟ ପକାଇଥିଲେ। ଫଳରେ ଘଟଣାସ୍ଥଳରେ ହିଁ ଦିଲ୍ଲୀପ ପ୍ରାଣ ହରାଇଥିଲେ। ଦିଲ୍ଲୀପଙ୍କ ପତ୍ନୀ ନଗରି ଗାଙ୍ଗପୁର ଥାନାରେ ଏତଲା ଦେବା ପରେ ପୁଲିସ ଶବକୁ ଜବତ କରିଛି। ଅଭିଯୁକ୍ତ ଭରତକୁ ଅଟକ ରଖାଯାଇଛି।