ଦରମା ଟଙ୍କାକୁ ନେଇ ବିବାଦରୁ ଡବଲ ମର୍ଡର : ବାପପୁଅ ମୃତ, ୪ ଗୁରୁତର
ପାଟଣାଗଡ଼:ବଲାଙ୍ଗୀର ଜିଲ୍ଲା ପାଟଣାଗଡ଼ ଉପଖଣ୍ଡ ବେଲପଡା ବ୍ଲକ ଦର୍ଲିମୁଣ୍ଡା ଗ୍ରାମରେ ପାରବାରିକ ବିବାଦ ଉଗ୍ର ରୂପ ନେଇଥିଲା । ଏଥିରେ ଦୁଇ ଜଣଙ୍କର ମୃତ୍ୟୁ ଘଟିଥିବା ବେଳେ ୪ ଜଣ ଗୁରୁତର ଅବସ୍ଥାରେ ଭୀମଭୋଇ ମେଡିକାଲ କଲେଜ ଓ ହସପିଟାଲରେ ଭର୍ତ୍ତି ହୋଇ ଚିକିତ୍ସିତ ହେଉଛନ୍ତି । ତେବେ ମୃତ ହୋଇଥିବା ଦୁଇ ଜଣ ବାପା ପୁଅ ହୋଇଥିବା ବେଳେ ଗୁରୁତର ହୋଇ ଚିକିତ୍ସିତ ହେଉଥିବା ୪ ଜଣ ମଧ୍ୟ ଗୋଟିଏ ପରିବାରର ବୋଲି ଜଣାପଡିଛି।
Sambad is now on WhatsApp
Join and get latest news updates delivered to you via WhatsApp
ପୁଲିସର ସୂଚନା ଅନୁଯାୟୀ, ବେଲପଡା ବ୍ଲକ ବେହେରାମୁଣ୍ଡା ପଞ୍ଚାୟତ ଅନ୍ତର୍ଗତ ଦର୍ଲିମୁଣ୍ଡା ଗ୍ରାମରେ ବନଛୋର ପରିବାର (ଟ୍ରାକ୍ଟର ମାଲିକ) ଓ ରାଉତ ପରିବାର (ଡ୍ରାଇଭର) ମଧ୍ୟରେ ଉପୁଜିଥିବା ବିବାଦ ଉଗ୍ର ରୂପ ନେଇଥିଲାା ମୋତିଲାଲ ବନଛୋରର ଟ୍ରାକ୍ଟର ଡ୍ରାଇଭର ଭାବେ ମଙ୍ଗଲ ରାଉତ କାମ କରୁଥିଲାା ତେବେ ମଙ୍ଗଲ ନିଜ ଦରମା ଟଙ୍କା ମାଗିବାରୁ ବିବାଦ ଉପୁଜିଥିଲାା ଫଳରେ ବନଛୋର ଓ ରାଉତ ପରିବାର ମଧ୍ୟରେ କଥା କଟାକଟି ହେବା ସହ ମାଡପିଟ ହୋଇଥିଲା । ଏହି ମାଡପିଟ ସମୟରେ ବନଛୋର ପରିବାରର ମୋତିଲାଲ ବନଛୋର(୫୦), ହେମନ୍ତ ବନଛୋର(୩୦), କୈଳାଶ ବନଛୋର(୨୬), ଚନ୍ଦାମଣି ବନଛୋର(୨୩) ଓ ବୈକୁଣ୍ଠ ବନଛୋର(୨୦) ଏବଂ ରାଉତ ପରିବାରର ବାଲ୍ମିକି ରାଉତ(୬୫), ମଙ୍ଗଲ ରାଉତ, ଗୌର ରାଉତ, ବିପିନ ରାଉତ, ଫକିର ରାଉତ ଥିବା ଜଣାପଡିଛି ।
ଉଭୟ ପରିବାରଙ୍କ ମଧ୍ୟରେ ଦର୍ଲିମୁଣ୍ଡା ଗ୍ରାମର ମୁଣ୍ଡାପଲା ବନ୍ଧ ନିକଟରେ ଧାରୁଆ ଅସ୍ତ୍ରରେ ସଂଘର୍ଷ ହୋଇଥିଲାା ଏଥିରେ ବନଛୋର ପରିବାରର ମୋତିଲାଲ ବନଛୋରଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ତାଙ୍କ ପୁଅ ଚନ୍ଦାମଣି ବନଛୋରଙ୍କର ବେଲପଡା ଡାକ୍ତରଖାନାରେ ମୃତ୍ୟୁ ହୋଇଥିବା ଜଣାପଡିଛି । ଅପର ପକ୍ଷରେ ବନଛୋର ପରିବାରର ହେମନ୍ତ ବନଛୋର ଏବଂ ରାଉତ ପରିବାରର ବାଲ୍ମିକି ରାଉତ, ମଙ୍ଗଳ ରାଉତ, ଗୌର ରାଉତ ଓ ଫକିର ରାଉତ ଗୁରୁତର ଆହତ ହୋଇ ବଲାଙ୍ଗୀର ଭୀମଭୋଇ ମେଡିକାଲ କଲେଜ ଓ ହସପିଟାଲରେ ଭର୍ତ୍ତି ହୋଇ ଚିକତ୍ସିତ ହେଉଛନ୍ତି । ଘଟଣାସ୍ଥଳରେ ପାଟଣାଗଡ଼ ଏସଡିପିଓ ସୁରେଶ ନାଏକଙ୍କ ସହିତ ବେଲପଡା ପୁଲିସ ଓ ସାଇଣ୍ଟିଫିକ ଟିମ୍ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଏ ସମ୍ପର୍କରେ ପାଟଣାଗଡ଼ ଏସଡିପିଓ ସୁରେଶ ନାଏକଙ୍କୁ ପଚାରିବାରୁ ୧୦ ରୁ ୧୫ ହଜାର ଦରମା ଟଙ୍କା ମାଗିବାରୁ ଉଭୟ ପରିବାର ମଧ୍ୟରେ ଏହି ଘଟଣା ଘଟିଛି ବୋଲି ସେ ସୂଚନା ଦେଇଛନ୍ତି ।