ଅଗ୍ନିକାଣ୍ଡ: ୧୧ ଛେଳି ଜଳିଗଲେ

ପାଣିକୋଇଲି: ବ୍ୟାସନଗର ତହସିଲ ଅନ୍ତର୍ଗତ ମୂଳାପାଳ ପଞ୍ଚାୟତ ଗୋବିନ୍ଦପୁର ଗ୍ରାମରେ ଗତକାଲି ବିଳମ୍ବିତ ରାତିରେ ଅଗ୍ନିକାଣ୍ତ ଘଟି ୪ ବଖରା ଘର ସମେତ ବହୁ ଆସବାବପତ୍ର ଜଳିଯାଇଛି। ଏଥିରେ ଗୋଟିଏ ଗାଈ, ୧୧ଟି ଛେଳି ଓ ୭ଟି କୁକୁଡ଼ା ଜୀବନ୍ଦ ଦଗ୍ଧ ହୋଇଛନ୍ତି। ପ୍ରକାଶ ଯେ ଗୋବିନ୍ଦପୁର ଗ୍ରାମର ମାନସ ଦତ୍ତଙ୍କ ଘରେ ବୁଧବାର ରାତିରେ ବିଦ୍ୟୁତ୍‌ ସର୍ଟସର୍କିଟ୍‌ରୁ ଅଗ୍ନିକାଣ୍ତ ଘଟିଥିଲା। ଏଥିରେ ୩ ବଖରା ଘର, ଗୋଟିଏ ବଖରା ଗୁହାଳ ସମେତ ଘରର ସମସ୍ତ ଆସବାବପତ୍ର, ୨ଟି ବାଇକ୍‌, ଗୋଟିଏ ସାଇକଲ, ଧାନଚାଉଳ, ଶଗଡ଼ ପୋଡ଼ି ପାଉଁଶ ହୋଇଯାଇଛି।

ନିଆଁ ଲାଗିବା ପରେ ମାନସଙ୍କ ପରିବାର ଘରୁ ପଦାକୁ ବାହାରି ଆସିଥିଲେ। ପାଟି ଶୁଣି ଗ୍ରାମବାସୀ ପହଞ୍ଚିଥିଲେ ମଧ୍ୟ ନିଆଁ ଲିଭାଇ ପାରିନଥିଲେ। ବୈତରଣୀରୋଡ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ। ଖବର ପାଇ ରଣପାଳ ଆରଆଇ ସୁଧିର ମଲ୍ଲିକ ପହଞ୍ଚି କ୍ଷୟକ୍ଷତି ଆକଳନ କରିଥିଲେ। ସମିତିସଭ୍ୟ ମଧୁସୂଦନ ନନ୍ଦୀ, ଯୁବନେତା ଗୋଲକ ଚନ୍ଦ୍ର ମାଝୀ, ନିରଂଜନ ନାୟକ, ଅଶୋକ ସାହୁ ପ୍ରମୁଖ ଉପସ୍ଥିତ ଥିଲେ। ପ୍ରାଣୀଧନ ବିଭାଗ କର୍ମଚାରୀ ପହଞ୍ଚି କ୍ଷୟକ୍ଷତି ଅନୁଧ୍ୟାନ କରିଥିଲେ। ବିପନ୍ନ ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ଗ୍ରାମବାସୀ ଦାବି କରିଛନ୍ତି।