ପେଟ୍ରୋଲ ପମ୍ପରେ ଅଗ୍ନିକାଣ୍ଡ: ଜନସାଧାରଣ ଭୟଭୀତ

ନିମାପଡ଼ା: ପୁରୀ ଜିଲ୍ଲା ନିମାପଡ଼ାସ୍ଥିତ ଏକ ପେଟ୍ରୋଲ ପମ୍ପରେ ଆଜି ସନ୍ଧ୍ୟାରେ ଅଗ୍ନିକାଣ୍ଡ ଘଟଣା ଘଟିଛି। ଅଗ୍ନିକାଣ୍ଡ ଯୋଗୁଁ ପେଟ୍ରୋଲ ପମ୍ପରେ କାର୍ଯ୍ୟରତ କର୍ମଚାରୀମାନେ ଭୟଭୀତ ହୋଇଛନ୍ତି। ସେମାନେ ଦମକଳବାହିନୀଙ୍କୁ ସୂଚନା ଦେଇଛନ୍ତି।

ସୂଚନା ଅନୁସାରେ ସ୍ଥାନୀୟ ଇଣ୍ଡିଆନ ଅଏଲର ଏକ ପେଟ୍ରୋଲ ପମ୍ପରେ ଆଜି ସନ୍ଧ୍ୟା ୬ଟାରେ ନିଆଁ ଲାଗିଥିଲା। ଅଗ୍ନିକାଣ୍ଡ ନେଇ ସୂଚନା ମିଳିବା ପରେ ଅଗ୍ନିଶମ ସେବା ବିଭାଗର ୨ଟି ଗାଡ଼ି ପହଞ୍ଚି ଥିଲା। ଦମକଳ ବାହିନୀର କର୍ମଚାରୀମାନେ ଦୀର୍ଘ ସମୟ ଧରି ନିଆଁ ଲିଭା କାର୍ଯ୍ୟରେ ନିୟୋଜିତ ହୋଇଥିଲେ। କମ୍ପାନିର ବୈଷୟିକ ଦଳ ଖୁବଶୀଘ୍ର ଘଟଣାସ୍ଥଳକୁ ପହଞ୍ଚୁଥିବା ନେଇ ପେଟ୍ରୋଲ ପମ୍ପର କର୍ମଚାରୀଙ୍କ ପକ୍ଷରୁ ପ୍ରକାଶ।

ତେବେ ପେଟ୍ରୋଲ ପମ୍ପରେ ନିଆଁ ଲାଗିଥିବା କାରଣରୁ ଜନସାଧାରଣଙ୍କୁ ସେଠାକୁ ଛଡ଼ାଯାଉନାହିଁ। ସେହିପରି ଆଖପାଖ ଅଞ୍ଚଳକୁ ନିଆଁ ନବ୍ୟାପିବା ପାଇଁ ସତର୍କ ବ୍ୟବସ୍ଥା କରାଯାଇଛି। ଅଗ୍ନିକାଣ୍ଡର କାରଣ ଜଣାପଡ଼ି ନାହିଁ। ସେହିପରି କ୍ଷୟକ୍ଷତିର ମଧ୍ୟ ଆକଳନ କରାଯାଇ ନାହିଁ।