ଦୁର୍ଗାପୁର ପାହାଡ଼ରେ ନିଆଁ: ଲିଭାଇବାରେ ୩୧୭ ସ୍କ୍ବାର୍ଡ, ୨୨ ଗାଡି ନିୟୋଜିତ
ରାଉରକେଲା: ରାଉରକେଲା ବନଖଣ୍ଡ ପାନପୋଷ ରେଞ୍ଜ ଅନ୍ତର୍ଗତ ଦୁର୍ଗାପୁର ପାହାଡ଼ରେ ନିଆଁ। ଗତକାଲି ରାତିରୁ ପାହାଡ଼ରେ ଲାଗିଥିବା ନିଆଁ ଲିଭାଇବାକୁ ବନବିଭାଗ କର୍ମଚାରୀ ଓ ଅଗ୍ନିଶମ କର୍ମଚାରୀ ନିୟୋଜିତ ହୋଇଥିଲେ। ପ୍ରାୟ ୪ ଘଣ୍ଟାରୁ ଅଧିକ ସମୟ ପରିଶ୍ରମ ପରେ ନିଆଁକୁ କାବୁ କରାଯାଇଛି। ଆଜି ଅପରାହ୍ନରେ ଛେଣ୍ଡ କଲୋନିପାର୍ଶ୍ବ ପାହାଡ଼ରେ ନିଆଁ ଲାଗିଥିବା ଦେଖି ସ୍ଥାନୀୟ ଲୋକ ବନ ବିଭାଗ ଓ ଅଗ୍ନିଶମ ବିଭାଗକୁ ସୂଚନା ଦେଇଥିଲେ। ଉଭୟ ବନ ବିଭାଗର ନିଆଁ ଲିଭା ଟିମ୍ ଓ ଅଗ୍ନିଶମ କର୍ମଚାରୀ ପହଞ୍ଚି ନିଆଁକୁ କାବୁ କରିଥିଲେ। କିଛି ଦୁର୍ବୃତ୍ତମାନେ ନିଆଁ ଲଗାଇଦେଇଥିବାରୁ ଏଭଳି ସ୍ଥିତି ଉପୁଜିଛି ବୋଲି ରାଉରକେଲା ବନଖଣ୍ଡ ଅଧିକାରୀ ଯଶୋବନ୍ତ ଜେଠୁଆ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସେ କହିଛନ୍ତି, ରାଉରକେଲା ବନଖଣ୍ଡ ଅନ୍ତର୍ଗତ ୬ ରେଞ୍ଜରେ ଜଙ୍ଗଲ ନିଆଁ ଲିଭାଇବାକୁ ସ୍ବତନ୍ତ୍ର ଟିମ୍ ଓ ଗାଡି ନିୟୋଜିତ କରାଯାଇଛି। ୩୧୭ ସ୍କ୍ବାର୍ଡ, ୬୬ ବନ ସୁରକ୍ଷା ସମିତି , ୨୨ଟି ଗାଡି, ୫୦ ଏଚ୍ଜି, ୫୯ ଫରେଷ୍ଟ ଗାର୍ଡ, ୨୫ ଜଣ ଫରେଷ୍ଟର, ୫ ଡେପୁଟି ଫରେଷ୍ଟ ରେଞ୍ଜର, ୬ ରେଞ୍ଜର, ୨ ଏସିଏଫ୍ଙ୍କୁ ଦାୟିତ୍ବ ଦିଆଯାଇଛି। ବନ ବିଭାଗର ସ୍ବତନ୍ତ୍ର ଆପ୍ ରହିଛି। କେଉଁ ଜଙ୍ଗଲ ଓ ପାହାଡ଼ରେ ନିଆଁ ଲାଗୁଛି ଆପ୍ ଜରିଆରେ ସଠିକ୍ ଭାବେ ଜାଣିହେଉଛି। କେବଳ ରାଉରକେଲା ବନଖଣ୍ଡ ନୁହେଁ, ସୁନ୍ଦରଗଡ଼ ଓ ବଣାଇ ବନଖଣ୍ଡରେ ଅଧିକାଂଶ ପାହାଡ ଓ ଜଙ୍ଗଲରେ ନିଆଁ ଲାଗିଛି।
କୋଇଡା ଓ ବଣାଇ ଅଞ୍ଚଳରେ କିଛି ଜଙ୍ଗଲ ଓ ପାହାଡ ଜଳୁଥିବା ଦେଖିବାକୁ ମିଳୁଛି। ବନ ବିଭାଗ କର୍ମଚାରୀମାନେ ନିଆଁ ଲିଭା କାର୍ଯ୍ୟରେ ଲାଗିଛନ୍ତି। ସୂଚନା ପାଇବାମାତ୍ରେ ବନ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରୁଛନ୍ତି। ଉଲ୍ଲେଖଯୋଗ୍ୟ, ଗତବର୍ଷ ରାଉରକେଲା ଦୁର୍ଗାପୁର ପାହାଡ଼ରେ ଲାଗିଥିବା ନିଆଁ, ଆର୍ଏସ୍ପି ଓ ବିଭିନ୍ନ କଳକାରଖାନାରୁ ନିର୍ଗତ ଧୂଆଁ ଯୋଗୁ ସମ୍ପୂର୍ଣ୍ଣ ଇସ୍ପାତ ସହର ଧୂଆଁମୟ ହୋଇଯାଇଥିଲା। ପ୍ରାୟ ୩/୪ ଦିନ ସହରରେ ଏଭଳି ସ୍ଥିତି ଉପୁଜିଥିଲା। ସହରବାସୀ, ଯାନବାହନ ଚାଳକମାନେ ନାହିଁ ନଥିବା ଯାତାୟତରେ ନାହିଁ ନଥିବା ଅସୁବିଧାରେ ସମ୍ମୁଖୀନ ହୋଇଥିଲେ। ବୟୋଜ୍ୟେଷ୍ଠ ବ୍ୟକ୍ତି ଓ ପିଲାମାନେ ନିଶ୍ବାସ ପ୍ରଶ୍ବାସରେ କଷ୍ଟ ଅନୁଭବ କରିଥିଲେ।