ମାଟ୍ରିକ୍ ପାସ କଲେ ନଗଡ଼ାର ଦାଦନ ଫେରନ୍ତା ୫ ଜୁଆଙ୍ଗ ଛାତ୍ର
କାଳିଆପାଣି : ମାଟ୍ରିକ୍ ପରୀକ୍ଷା ପୂର୍ବରୁ ଦାଦନ ଯାଇଥିଲେ। ଆଉ ସେଠାରୁ ଫେରିବା ପରେ ନଗଡ଼ାର ୫ ଜଣ ଜୁଆଙ୍ଗ ଜନଜାତି ଛାତ୍ର ସୁକିନ୍ଦା ବ୍ଲକ ଗୋବରଘାଟି ହାଇସ୍କୁଲରୁ ମାଟ୍ରକ୍ ପାସ୍ କରିଛନ୍ତି। ୩୦୬ ନମ୍ବର ରଖି ବାଉରିଆ ପ୍ରଧାନ, ୨୪୪ ନମ୍ବର ରଖି ନିଧିଆ ପ୍ରଧାନ, ୨୩୮ ନମ୍ବର ରଖି କାଳିଆ ପ୍ରଧାନ, ୨୧୪ ନମ୍ବର ରଖି ମିଟୁ ପ୍ରଧାନ ଓ ୧୯୮ ନମ୍ବର ରଖି ସଇତ ପ୍ରଧାନ ପାସ୍ କରିଛନ୍ତି। ଏହି ପରୀକ୍ଷାରେ ତାଙ୍କର ଅନ୍ୟ ୨ ସହପାଠୀ ଲଟିଆ ପ୍ରଧାନ ୨୨୪ ନମ୍ବର ଓ ରବି ପ୍ରଧାନ ୧୯୦ ନମ୍ବର ରଖିଥିଲେ ମଧ୍ୟ ଅକୃତ କାର୍ଯ୍ୟ ହୋଇଥିବା ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଯେ, ଉପରୋକ୍ତ ଛାତ୍ରମାନେ କରୋନା ବେଳେ ଗାଁକୁ ପଳାଇ ଆସିଥିଲେ। ଜନୈକ ଦଲାଲ୍ କଥାରେ ପଡ଼ି ଭୁବନେଶ୍ବରରେ ରହି ଦାଦନ ଖଟୁଥିଲେ। ମାଟ୍ରିକ୍ ସମ୍ମେଟିଭ୍-୧ ପୂର୍ବରୁ ଏହି ପିଲାମାନେ ନିଖୋଜ ଥିବା ନଜରକୁ ଆସିଥିଲା। ସଂପୃକ୍ତ ଅଭିଭାବକମାନେ ଆମ ପ୍ରତିନିଧିଙ୍କୁ ଭେଟି ଦୁଃଖ ଜଣାଇଥିଲେ। ଏ ସଂକ୍ରାନ୍ତରେ ଗତ ଜାନୁଆରି ୪ ତାରିଖ ‘ସମ୍ବାଦ’ ପ୍ରଥମ ପୃଷ୍ଠାରେ ‘ମାଟ୍ରିକ୍ ଦେଇଥାନ୍ତେ, ବନ୍ଧା ପଡ଼ିଛନ୍ତି’ ଶୀର୍ଷକ ଖବର ପ୍ରକାଶ ପାଇଥିଲା। ପ୍ରଶାସନିକ ତନାଘନା ପରେ ଜିଲ୍ଲା ପ୍ରଶାସନ ଓ ପୁଲିସ ପକ୍ଷରୁ ଏକ ସ୍ବତନ୍ତ୍ର ପ୍ରତିନିଧି ଦଳର ତତ୍ପରତା ପରେ ସମସ୍ତ ପରୀକ୍ଷାର୍ଥୀ ଓ ସାଥୀ ନାବାଳକମାନଙ୍କୁ ଉଦ୍ଧାର କରାଯାଇଥିଲା। ପରେ ଏମାନେ ମାଟ୍ରିକ୍ ପରୀକ୍ଷା ଦେଇଥିବା ବେଳେ କୃତକାର୍ଯ୍ୟ ହୋଇଛନ୍ତି।