ରାୟଗଡା: ଦିନ ଦ୍ବିପହରରେ ପାଞ୍ଚ ପାଞ୍ଚଟି ରାସ୍ତା ଚୋରି ହୋଇଯାଉଛି। କିନ୍ତୁ ବିଭାଗ ଜାଣି ଅଜଣା ସାଜିଛି। ଏଭଳି ଘଟଣା ଘଟିଛି ରାୟଗଡା ଜିଲ୍ଲାର ଚନ୍ଦ୍ରପୁର ବ୍ଲକରେ। ଏହି ବ୍ଲକର ୬ଟି ଏମଜିଏନଆରଜିଏ କାମ ମଧ୍ୟରୁ ୫ଟି କାମ ଆଦୌ କରାନଯାଇ ସଂପୃକ୍ତ ବିଭାଗ ପକ୍ଷରୁ ବିଲ କରି ଟଂକା ଚଳୁ କରାଯାଇଥିବା ଜଣାପଡିଛି। ୨୦୨୧ ମସିହା ଜୁଲାଇ ୯ ତାରିଖରେ ଚନ୍ଦ୍ରପୁର ବ୍ଲକର ବିଜାପୁର ପଞ୍ଚାୟତର ବଡପଙ୍ଖାଳ, ସାନପଙ୍ଖାଲ ଏବଂ ମରିଚଗୁଡା ଗ୍ରାମର ଦଣ୍ଡାସି ମାଝିଙ୍କ ନେତୃତ୍ବରେ ୧୨ ଜଣ ଶ୍ରମିକ ଅଭିଯୋଗ କରିଥିଲେ ଯେ ସୁରଲୁ ଠାରୁ ସାନପଙ୍ଖଳ ପର୍ଯ୍ୟନ୍ତ ରାସ୍ତା କାମ ନକରି ଟଂକା ଚଳୁ କରାଯାଇଥିବା ନେଇ ଲୋକପାଳଙ୍କ ନିକଟରେ ଅଭିଯୋଗ କରିଥିଲେ।

Advertisment

ଅଭିଯୋଗକୁ ଭିତ୍ତି କରି ଲୋକପାଳ ଏବଂ ଏକ ଟିମ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ। ଲୋକପାଳ ଯାହା ଦେଖିଥିଲେ ବିଶ୍ବାସ କରିପାରିନଥିଲେ। ଗୋଟିଏ ରାସ୍ତାରେ ହିଁ ଛଅ ଛଅଟି କାମ କରାଯାଇ ଟଂକା ଉଠାଯାଇଛି। ସେଗୁଡିକ ମଧ୍ୟରୁ ପ୍ରଥମଟି ହେଲା ସୁରଲୁ ଠାରୁ ସାନ ପଙ୍ଖାଳ ରାସ୍ତାର ମରାମତି। ଏହାର ୱାର୍କ କୋଡ ନମ୍ବର ହେଲା ୨୪୨୯୦୦୨୦୦୧/ଆରସି/୧୦୪୩୫୩୯୯। ଏଷ୍ଟିମେଟ ହେଲା ୧୦ ଲକ୍ଷ ଟଂକା। ଦ୍ବିତୀୟ କାମଟି ହେଲା ପୁଣି ସୁରଲୁ ଘାଟ ତଳ ଠାରୁ ସାନପଙ୍ଖାଲର ମରାମତି। ଏହାର ୱାର୍କ କୋଡ ହେଲା ୨୪୨୯୦୦୨୦୦୧/ଆରସି/୧୦୪୪୮୬୯୬। ଏହାର ଏଷ୍ଟିମେଟ ହେଲା ୧୦ ଲକ୍ଷ। ତୃତୀୟ କାମଟି ହେଲା ସୁରଲୁ ଠାରୁ ବଡପଙ୍ଖାଳ ରାସ୍ତା ନିର୍ମାଣ। ଏହାର ୱାର୍କ କୋଡ ହେଲା ୨୪୨୯୦୦୨୦୦୧/ଆରସି/୧୦୪୪୮୬୯୮।ଏହାର ଏଷ୍ଟିମେଟ ହେଲା ୪ ଲକ୍ଷ ୬୯ ହଜାର। ଚତୁର୍ଥ କାମଟି ହେଲା ବଡପଙ୍ଖାଳ ଠାରୁ ସାନ ପଙ୍ଖାଳ ମଧ୍ୟରେ ରାସ୍ତା ନିର୍ମାଣ। ଏହାର ୱାର୍କ କୋଡ ହେଲା ୨୪୨୯୦୦୨୦୦୧/ଆରସି/୧୦୪୪୮୬୯୩।ଏହାର ଏଷ୍ଟିମେଟ ହେଲା ୯ ଲକ୍ଷ। ପଞ୍ଚମ କାମଟି ହେଲା ଗାଡେଙ୍ଗି ଠାରୁ ବଡପଙ୍ଖାଳ ରାସ୍ତା ନିର୍ମାଣ। ଏହାର ୱାର୍କ କୋଡ ହେଲା ୨୪୨୯୦୦୨୦୦୧/ଆରସି/୧୦୪୩୫୪୦୨। ଏହାର ଏଷ୍ଟିମେଟ ହେଲା ୧୦ ଲକ୍ଷ ଟଂକା। ଷଷ୍ଠ କାମଟି ହେଲା ଗାଡେଙ୍ଗା ବ୍ରିଜ ଠାରୁ ବଜପଙ୍ଖାଳ। ଏହାର ୱାର୍କ କୋଡ ହେଲା ୨୪୨୯୦୦୨୦୦୧/ଆରସି/୧୦୪୪୮୬୯୫। ଏହାର ଏଷ୍ଟିମେଟ କୋଷ୍ଟ ହେଉଛି ୧୦ ଲକ୍ଷ ଟଂକା।

ତେବେ ଏହାର ତଦନ୍ତ ପାଇଁ ଲୋକପାଳ ଗତ ୨୦୨୧ ମସିହା ଜୁଲାଇ ୩୦ ତାରିଖରେ ପଞ୍ଚାୟତରେ ପହଞ୍ଚିଲା ବେଳକୁ ପଞ୍ଚାୟତରେ ତାଲି ଝୁଲୁଥିଲା। ତଦନ୍ତ ବେଳେ ଲୋକପାଳ ଜାଣିବାକୁ ପାଇଲେ ଯେ ପ୍ରଥମ କାମ ସୁରଲୁ ଠାରୁ ସାନପଙ୍ଖାଲ ରାସ୍ତାର ଉନ୍ନତିକରଣ କରିବା ପାଇଁ ମାତ୍ର ୩୦୦ ମିଟର କାମ କରାଯାଇଛି ଯାହାକି ସୁରଲୁ ମୁଖ୍ୟ ରାସ୍ତା ଠାରୁ ଘାଟ କାଟିଂ କରାୟାଇଛି। କାମ ହୋଇଥିବା ଦେଖାଇବା ପାଇଁ ମାତ୍ର ୩୦୦ ମିଟର ରାସ୍ତା ଜେସିବି ଲଗାଇ କରାଯାଇଥିବା ଗ୍ରାମବାସୀ ଲୋକପାଳଙ୍କ ନିକଟରେ ଅଭିଯୋଗ କରିଥିଲେ। ଏହି ପ୍ରଥମ କାମରେ ହିଁ ଅଳ୍ପ କାମ ହୋଇଥିବା ବେଳେ ଅନ୍ୟ ୫ଟି କାମ ଆଦୌ କରାନଯାଇ ଟଂକା ଆତ୍ମସାତ କରାଯାଇଥିବା ଅଭିଯୋଗ କରାଯାଇଛି।

publive-image

ତେବେ କାମଗୁଡିକର ଟି-ବୋର୍ଡ ଗୁଡିକ ନଥିବା ବେଳେ ଯାହା ଥିଲା ସେଠାରେ ଭୁଲ ରିପୋର୍ଟ ରହିଥିବା ଦେଖିବାକୁ ମିଳିଥିଲା।ଏପରିକି କାମଗୁଡିକର ମେଟେରିଆଲ କିଣିଥିବା ବିଲରେ ପୂର୍ବତନ ପିଇଓ ସୁଶିଲ ନିମାଲପୁରିଙ୍କ ପତ୍ନୀ ସକୁନ୍ତଳା ନିମାଲପୁରିଙ୍କ ନାମରେ ରହିଛି।ଯାହା ସଂଦେହକୁ ଆହୁରି ଦୃଢିଭୁତ କରୁଛି। ତଦନ୍ତ ହେବା ଜାଣିବା ପରେ ପିଇଓ, ଜେଇ, ଏପିଓ, ଜିଆରଏସ ସମେତ ବ୍ଲକ କର୍ମକର୍ତ୍ତା ଏହାକୁ କିପରି ରଫାଦଫା କରାଯିବ ସନେଇ କାମ ଆରମ୍ଭ କଲେ।

ଚଳିତ ବର୍ଷ ଜାନୁଆରି ୪ ତାରିଖ ଦିନ ଏପିଓ, ଜେଇ ଲୋକପାଳଙ୍କ ନିକଟରେ ଆସି ସମସ୍ତ ମାଷ୍ଟର ରୋଲ ସହ ସମସ୍ତ ନଥିପତ୍ର ପ୍ରଦାନ କରିଥିଲେ, ଯାହା ତଦନ୍ତରେ ଥିଲା ସେସବୁ ଏଥିରେ ନଥିଲା। ଏପରିକି ସକୁନ୍ତଳା ନିମାଲପୁରି ନାମରେ ଥିବା ମେଟେରିଆଲ ବିଲକୁ ଯଆହାର ଜିଏସଟି ନମ୍ବର ଥିଲା ୧ଏଡିଡିପିଏନ ୨୦୦୨ ଆର୨ଜେଡଆରକୁ ମଧ୍ୟ ବଦଳାଇ ଦିଆଯାଇଥିଲା। ପରେ ଏହାକୁ ଜଣେ ଠିକାଦାର ସୋମନାଥ ନନ୍ଦ ନାମରେ କରାଯାଇଥିଲା। କଥା ପଦାରେ ପଡିବା ପରେ ପିଇଓ ତୁରନ୍ତ ବିଡିଓଙ୍କ ନିକଟରେ ପହଞ୍ଚି ୨୧ ଲକ୍ଷ ୭୬ ହଜାର ୩୦୭ ଟଂକା ନଗଦ ପ୍ରଦାନ କରିଥିବା ଜଣାପଡିଛି। ସୋମନାଥ ନନ୍ଦଙ୍କୁ ସେଥିରୁ ୧୪ ଲକ୍ଷ ଟଂକା ପ୍ରଦାନ କରାଯାଇଥିବା କୁହାଯାଇଥିଲା।ବଳକା ଟଂକାକୁ ପିସି ଆକାରରେ ବ୍ଲକ କର୍ମକର୍ତ୍ତା ରଖିଥିବା ସୋମନାଥ ନନ୍ଦ ଲୋକପାଳ ଯୁକ୍ତି ବାଢିଥିଲେ। କାମର ଟଂକା ଉଠାଗଲା ସତ କିନ୍ତୁ କାମ କେଉଁଆଡେ ଚୋରି ହୋଇଗଲା ବୋଲି ଏବେ ଚର୍ଚ୍ଚା ଜୋର ଧରିଛି। ତେବେ ଏନେଇ ଲୋକପାଳ ଲକ୍ଷ୍ମୀ ପାଢୀ ଜିଲ୍ଲାପାଳଙ୍କୁ ଅବଗତ କରାଇଥିଲେ। ତେବେ ଜିଲ୍ଲାପାଲ ଏନେଇ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନଥିବା ଜଣାପଡିଛି। ଏତେ ବଡ ଦୁର୍ନୀତି ଜିଲ୍ଲାରେ ଘଟୁଥିଲେ ମଧ୍ୟ କିପରି ଜିଲ୍ଲା ପ୍ରଶାସନ ଜାଣି ଚୁପ ରହିଛି ତାହାକୁ ନେଇ ସଂଦେହ ସୃଷ୍ଟି ହୋଇଛି।