କାଲିମେଳା : ଲଗାଣ ବର୍ଷାରେ ମାଲକାନଗିରି ଜିଲ୍ଲା ଉବୁଟୁବୁ ହେଉଥିଲା ବେଳେ ବଡ଼ ବିପଦର ସଂକେତ ଦେଉଛି ଗୋଦାବରୀ ବନ୍ୟାଜଳ। ଉପରମୁଣ୍ଡରେ ପ୍ରବଳ ବର୍ଷା ଯୋଗୁ ଦ୍ରୁତଗତିରେ ଫୁଲିବାରେ ଲାଗିଛି। ଯାହାର ପ୍ରଭାବରେ ମାଲକାନଗିରି ଜିଲ୍ଲାରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। କାଲିମେଳା ବ୍ଲକ୍‌ ମୋଟୁ ଅଞ୍ଚଳରେ ସିଲେରୁ ଓ ସାବେରୀ ନଦୀରୁ ଜଳ ନିଷ୍କାସନ ନହୋଇ ଏବେ ଟଳମଳ ହେଉଛି। କିଛି ଘଣ୍ଟା ମଧ୍ୟରେ ଓଡ଼ିଶାର ଅନେକ ଅଞ୍ଚଳ ବୁଡ଼ିଯିବାର ଆଶଙ୍କା କରାଯାଉଛି।

Advertisment

କାଲିମେଳା ଠାରୁ ୧୪୦କିଲୋମିଟର ଦୂର ଭଦ୍ରାଞ୍ଚଲମ ନିକଟରେ ଆଜି ୫୦ଫୁଟ୍‌ ଉଚ୍ଚରେ ଗୋଦାବରୀ ନଦୀ ପ୍ରବହିତ ହେଉଛି। ଯଦି ନଦୀର ଜଳସ୍ତର ୫୫ଫୁଟ୍‌କୁ ବଢ଼ିଯିବ ତେବେ ମାଲକାନଗିରି ଜିଲ୍ଲାର ସୀମାନ୍ତ ଗାଁ ଗୁଡ଼ିକ ସଂପୂର୍ଣ୍ଣ ବୁଡ଼ିଯିବ। ବନ୍ୟାର ସର୍ବାଧିକ ପ୍ରଭାବ ମୋଟୁ ଅଞ୍ଚଳରେ ପଡ଼ିବ ବୋଲି କୁହାଯାଉଛି। କାରଣ ପୋଲଭରମ ପ୍ରକଳ୍ପ ଯୋଗୁ ଗୋଦାବରୀରୁ ବନ୍ୟାଜଳ ନିଷ୍କାସନରେ ସମସ୍ୟା ହେଉଛି। ତେଣୁ ଗୋଦାବରୀ ନଦୀର ପଛୁଆ ପାଣି ଯୋଗୁ ମାଲକାନଗିରି ଜିଲ୍ଲାରେ ପ୍ରବାହିତ ନଦୀରୁ ବନ୍ୟାଜଳ ନିଷ୍କାସନ ହୋଇପାରୁନି। ୩୨୮ନମ୍ବର ଜାତୀୟ ରାଜପଥରେ କୁଇଗୁର ପୋଲ ଆଜି ବୁଡ଼ିଯିବାରୁ ଓଡ଼ିଶାରୁ ଆନ୍ଧ୍ରକୁ ଯୋଗାଯୋଗ ବିଚ୍ଛିନ୍ନ ହୋଇଛି। ଶେଷ ଖବର ସୁଦ୍ଧା ଏହି ପୋଲ ଉପରେ ୫ଫୁଟ୍‌ ଉଚ୍ଚରେ ବନ୍ୟାଜଳ ଚାଲିଥିଲା। ଯାହାଫଳରେ ଦକ୍ଷିଣ ଭାରତର ଏହି ପ୍ରବେଶ ପଥରେ ୫କିଲୋମିଟର ପର୍ଯ୍ୟନ୍ତ ଶହ ଶହ ଗାଡ଼ି ରାସ୍ତାରେ ଅଟକି ରହିଛି। ସେହିପରି ଗୋଦାବରୀ ବନ୍ୟାଜଳ ଯୋଗୁଁ ଅନେକ ଅଞ୍ଚଳକୁ ଯାତାୟାତ ଠପ୍‌ ହୋଇଯାଇଛି। ଜଗଦଲପୁର-ଭଦ୍ରାଞ୍ଚଲମ ମୁଖ୍ୟ ରାସ୍ତାର ଚାଟିଚିନ୍ତୁର ନିକଟରେ ପୋଲ ବୁଡ଼ିଯିବାରୁ ଛତିଶଗଡ଼ରୁ ଆନ୍ଧ୍ରକୁ ଯୋଗାଯୋଗ ସଂପୂର୍ଣ୍ଣ ବିଚ୍ଛିନ୍ନ ହୋଇଯାଇଛି।