ନିଦ ହଜାଇଛି ମହାନଦୀ; ବାଙ୍କୀ ଉବୁଟୁବୁ, ଦଳେଇ ଘାଇରେ ୬୧ ଫୁଟ୍ ଉପରେ ଚାଲିଛି ପାଣି
କଟକ: ଆତଙ୍କ ଆଉ ଆଶଙ୍କାରେ ଏବେ ଦିନ କାଟୁଛନ୍ତି କଟକ, ଜଗତସିଂହପୁର, କେନ୍ଦ୍ରାପଡ଼ା ଜିଲ୍ଲାର ତଳିଆ ଅଞ୍ଚଳବାସିନ୍ଦା। ଲୋକଙ୍କ ଆଖିରୁ ନିଦ ହଜି ଯାଇଛି। ଆଜି ରାତିରେ ମହାନଦୀରେ ଯେତିକି ପାଣି ଆସୁଛି ତଳ ଅଞ୍ଚଳରେ ତାହା ନଦୀକୁ ଆସନ୍ତାକାଲି ଆହୁରି ଫୁଲାଇବ। ଅନେକ ସ୍ଥାନରେ ନଈ ବନ୍ଧରେ ଘଳିଆ ପଡିଛି। ପଛୁଆ ପାଣି ଅଧିକାଂଶ ଅଞ୍ଚଳକୁ ବୁଡାଇ ସାରିଲାଣି। ଏଭଳି ସ୍ଥିତିରେ ଲୋକ କ୍ଷୟକ୍ଷତିକୁ ନେଇ ଆତଙ୍କିତ ହୋଇ ପଡିଛନ୍ତି। ମହାନଦୀ ଓ କାଠଯୋଡ଼ି ପାଣି କଟକ ସହରର ତଳିଆ ଅଞ୍ଚଳକୁ ବି ବୁଡାଇ ଦେଇଛି। ଯେଉଁଠି ଗଲା ୬ ବର୍ଷ ହେଲା ପାଣି ପଶି ନଥିଲା, କଟକ ସହରର ସେ ଅଞ୍ଚଳରେ ବି ଏବେ ପାଣି ପଶିଛି। ମହାନଦୀର ମୁଣ୍ଡଳିରେ ରାତି ୧୧ଟା ବେଳକୁ ୧୨ ଲକ୍ଷ କ୍ୟୁସେକ୍ରୁ ଅଧିକ ପରିମାଣର ବନ୍ୟା ଜଳ ପ୍ରବାହିତ ହେଉଛି। ମହାନଦୀର ଯୋବ୍ରା ବ୍ୟାରେଜ ନିକଟରେ ବିପଦ ସଙ୍କେତ ୨୧.୯୪ ଫୁଟ ରହିଥିବା ବେଳେ ରାତି ୧୧ଟା ବେଳକୁ ୨୨.୧୫ ଫୁଟରେ ବନ୍ୟାଜଳ ପ୍ରବାହିତ ହେଉଛି। କାଠଯୋଡ଼ିର ନରାଜରେ ବିପଦ ସଙ୍କେତ ୨୬.୪୧ ଫୁଟ ରହିଥିବା ବେଳେ ରାତି ୧୧ଟା ବେଳକୁ ବନ୍ୟାଜଳ ୨୫.୫୫ ଫୁଟ୍ରେ ପ୍ରବାହିତ ହେଉଛି। ସେପଟେ ଜଗତସିଂହପୁର ଜିଲ୍ଲାର ଅତ୍ୟନ୍ତ ସମ୍ବେଦନଶୀଳ ଦଳେଇ ଘାଇରେ ଜଳସ୍ତର ୬୧ ଫୁଟ୍ ଟପି ଗଲାଣି। ପୁରୁଣା ତଥ୍ୟ ଅନୁଯାୟୀ ଯଦିଓ ଦଳେଇ ଘାଇର ବିପଦସଙ୍କେତ ୫୭ ଫୁଟ ବୋଲି ଧରା ଯାଉଛି, କିନ୍ତୁ ନଦୀ ବନ୍ଧ ମଜଭୁତ ହେବା ପରେ ଏବେ ୬୨ ଫୁଟ ଟପିଲେ ଅଧିକ ବିପଦ ଆଶଙ୍କା କରାଯାଉଛି। ୧୯୫୫, ୧୯୮୨ରେ ଦଳେଇ ଘାଇ ନିକଟରେ ବନ୍ଧ ଭାଙ୍ଗିବା ବେଳେ ସେଠାରେ ୬୪ ଫୁଟରେ ବନ୍ୟାଜଳ ପ୍ରବାହିତ ହେଉଥିବାର ରେକର୍ଡ ରହିଛି। ଆସନ୍ତକାଲି ସୁଦ୍ଧା କଟକ, କେନ୍ଦ୍ରାପଡା, ଜଗତସିଂହପୁର ଜିଲ୍ଲାର ତଳିଆ ଅଞ୍ଚଳରେ ବନ୍ୟାଜଳ ଆହୁରି ବଢିବାର ଆଶଙ୍କା କରାଯାଉଛି।
Sambad is now on WhatsApp
Join and get latest news updates delivered to you via WhatsApp
କଟକ ଜିଲ୍ଲାର ବାଙ୍କୀରୁ ନରସିଂହପୁର ଯାଏ ଅଞ୍ଚଳ ପାଣିରେ ଉବୁଟୁବୁ ହେଉଛି। ଅନେକ ଅଞ୍ଚଳକୁ ଯୋଗାଯୋଗ ବିଚ୍ଛିନ୍ନ ହୋଇ ସାରିଛି। ଆଠଗଡ଼, ତିଗିରିଆର ତଳିଆ ଅଞ୍ଚଳବାସୀ ଆତଙ୍କିତ ଅବସ୍ଥାରେ ଅଛନ୍ତି। ଜଗତସିଂହପୁର ଜିଲ୍ଲା କୁଜଙ୍ଗ ନିକଟରେ ମହାନଦୀ ଓ ପାଇକାର ବନ୍ୟାଜଳ କୂଳ ଡେଇଁ ଗାଁକୁ ପଶି ସାରିଛି। ଅନେକ ତଳିଆ ଅଞ୍ଚଳ ଏବେ ସଂପୂର୍ଣ୍ଣ ଜଳବନ୍ଦି ସ୍ଥିତିରେ ରହିଛି। ସେପଟେ କେନ୍ଦ୍ରାପଡ଼ା ଜିଲ୍ଲା ଗରଦପୁରରେ ଚିତ୍ରୋତ୍ପଳା ଓ ପାଇକା ନଦୀର ବିଭିନ୍ନ ସ୍ଥାନରେ ଘଳିଆ ପଡିବା ଅଞ୍ଚଳବାସୀଙ୍କ ପାଇଁ ଆତଙ୍କର କାରଣ ହୋଇଛି। ଚଳିତ ବର୍ଷ ବନ୍ୟାର ସବୁଠୁ ଅଧିକ ପରିମାଣର ବନ୍ୟାଜଳ ଆସନ୍ତକାଲି ଏହି ସବୁ ତଳିଆ ଅଞ୍ଚଳ ଦେଇ ପ୍ରବାହିତ ହେବ। ବନ୍ୟାଜଳକୁ ବନ୍ଧ କେତେ ସମ୍ଭାଳିବ, ଏବେ ତାହା ଉପରେ ସମସ୍ତଙ୍କ ନଜର ରହିଛି।
କଟକ ଜିଲ୍ଲାରେ ମହାନଦୀ, କାଠଯୋଡ଼ି, ସିଡୁଆ, ବିରୂପା, ସୁକ ପାଇକା, ଚିତ୍ରୋତ୍ପଳା, ଲୁଣା, ଗେଙ୍ଗୁଟି, ଦେବୀ, କନ୍ଦଳ, କଣ୍ଟିଶାଳ ଭଳି ନଈ ପ୍ରବାହିତ ହେଉଥିବା ବେଳେ ଜଗତସିଂହପୁର ଜିଲ୍ଲାରେ ମହାନଦୀ ସମେତ ଦେବୀ, କନ୍ଦଳ, ବିଲୁଆଖାଇ, ପାଇକା ଭଳି ନଦୀ ପ୍ରବାହିତ ହେଉଛନ୍ତି। କେନ୍ଦ୍ରାପଡା ଜିଲ୍ଲାରେ ବି ମହାନଦୀର ଶାଖା ନଦୀ ଭାବେ ଲୁଣା, ଚିତ୍ରୋତ୍ପଳା, ପାଇକା ନଈ ପ୍ରବାହିତ ହେଉଛନ୍ତି। ତିନିଟି ଜିଲ୍ଲାରେ ଜାଲ ଭଳି ଛାଇ ଯାଇଥିବା ମହାନଦୀର ଏସବୁ ଶାଖା ନଦୀ ଏବେ ଅଞ୍ଚଳବାସୀଙ୍କ ପାଇଁ ବିପଦର କାରଣ ସାଜିଛନ୍ତି। କଟକ ଜିଲ୍ଲାରେ ଏଯାଏ ପାଖାପାଖି ୧ ଲକ୍ଷ ଲୋକ ବନ୍ୟାରେ କ୍ଷତିଗ୍ରସ୍ତ ହୋଇସାରିଲେଣି। ଜଗତସିଂହପୁର ଓ କେନ୍ଦ୍ରାପଡା ଜିଲ୍ଲାରେ ଆସନ୍ତାକାଲି କ୍ଷତିର ପରିମାଣ ବଢିବ ବୋଲି ଆଶଙ୍କା କରାଯାଉଛି।