ବାଲେଶ୍ବର: ଏଫ୍‌ଏମ୍‌ କଲେଜ ଛାତ୍ରୀ ମୃତ୍ୟୁ ମାମଲାର ଆଜି ଷଷ୍ଠ ଦିନରେ ବି କ୍ରାଇମ୍‌ବ୍ରାଞ୍ଚ ଟିମ୍‌ ତନାଘନା ଜାରି ରଖିଛି। ଛାତ୍ରୀ ମୃତ୍ୟୁ ପଛରେ ରହିଥିବା ଅଭିଯୁକ୍ତଙ୍କ ନିକଟରେ ପହଞ୍ଚିବା ଲାଗି କ୍ରାଇମ୍‌ବ୍ରାଞ୍ଚ ଟିମ୍‌ ଶତାଧିକ ଛାତ୍ରଛାତ୍ରୀଙ୍କର ଏକ ତାଲିକା ପ୍ରସ୍ତୁତ କରିଥିବା ଜଣାପଡ଼ିଛି।  
ମଙ୍ଗଳବାର ମଧ୍ୟାହ୍ନ ପ୍ରାୟ ୧୨ଟାରେ କ୍ରାଇମ୍‌ବ୍ରାଞ୍ଚର ୨ ଜଣିଆ ଟିମ୍‌ ଏଫ୍‌ଏମ୍‌ କଲେଜ ପରିସରରେ ପହଞ୍ଚିଥିଲେ। ସାଢ଼େ ତିନିଟା ପର୍ଯ୍ୟନ୍ତ ସେଠାରେ ରହି ବିଭିନ୍ନ ଦିଗରୁ ମାମଲାର ତର୍ଜମା କରିଥିଲେ। ବିଶ୍ବସ୍ତ ସୂତ୍ରରୁ ମିଳିଥିବା ସୂଚନା ଅନୁଯାୟୀ, କ୍ରାଇମ୍‌ବ୍ରାଞ୍ଚ ଟିମ୍‌ ଶତାଧିକ ଛାତ୍ରଛାତ୍ରୀଙ୍କର ଏକ ତାଲିକା ପ୍ରସ୍ତୁତ କରିଛି। ଏହି ତାଲିକାରେ ଯେଉଁ ଛାତ୍ରଛାତ୍ରୀଙ୍କ ନାଁ ରହିଛି, ସେମାନଙ୍କୁ କ୍ରାଇମ୍‌ବ୍ରାଞ୍ଚ ଡିଏସ୍‌ପି ଇମନ୍‌ କଲ୍ୟାଣ ନାୟକ ଓ ଇନ୍‌ସପେକ୍ଟର ପାଞ୍ଚାଳି ରାଉତ ଡାକି ପଚରାଉଚରା କରୁଛନ୍ତି। ଆଜି ମଧ୍ୟ ପ୍ରାୟ ୧୦ରୁ ଅଧିକ ଛାତ୍ରଛାତ୍ରୀଙ୍କୁ ପଚରାଉଚରା କରାଯାଇଛି। ଗୁରୁତ୍ବପୂର୍ଣ୍ଣ ବିଷୟ ହେଉଛି, ତାଲିକାରେ କେଉଁ ଛାତ୍ରଛାତ୍ରୀଙ୍କ ନାଁ ରହିଛି; ସେ ସମ୍ପର୍କରେ କଲେଜ କର୍ତ୍ତୃପକ୍ଷଙ୍କୁ ଅନ୍ଧାରରେ ରଖାଯାଇଛି। କ୍ରାଇମ୍‌ବ୍ରାଞ୍ଚ ଟିମ୍‌ ସଂପୃକ୍ତ ଛାତ୍ରଛାତ୍ରୀଙ୍କୁ ସିଧା କଲେଜ ପରିସରକୁ ଡାକି ପଚରାଉଚରା କରୁ୍‌ଥିବା ଜଣାପଡ଼ିଛି। 
ତଦନ୍ତ ସମ୍ପର୍କରେ ବିଶେଷ କିଛି ଜଣା ପଡ଼ିନଥିଲେ ମଧ୍ୟ ପ୍ରକୃତ ଅଭିଯୁକ୍ତଙ୍କ ନିକଟରେ ପହଞ୍ଚିବା ପାଇଁ କ୍ରାଇମ୍‌ବ୍ରାଞ୍ଚ ଟିମ୍‌ର ଲକ୍ଷ୍ୟ ରହିଛି। ଯେଉଁଥି ପାଇଁ ଏଭଳି ତରିକା ଆପଣାଯାଇଛି। ବାଲେଶ୍ବର ଛାତ୍ରୀ ଆତ୍ମଦାହ ମାମଲାକୁ ଇତିମଧ୍ୟରେ ୧୧ ଦିନ  ବିତିଥିଲେ ମଧ୍ୟ ଏହିଭଳି କାର୍ଯ୍ୟ କରିବା ପାଇଁ ଛାତ୍ରୀଙ୍କୁ ପ୍ରକୃତରେ କିଏ ପ୍ରବର୍ତ୍ତାଇଥିଲେ, ତାହା ଏ ଯାବତ୍‌ ଜଣାପଡ଼ିନି। ଅନ୍ୟପକ୍ଷରେ ବିଶ୍ବବିଦ୍ୟାଳୟ ଅନୁଦାନ ଆୟୋଗ (ୟୁଜିସି) ପକ୍ଷରୁ ଗଠିତ ୪ ସଦସ୍ୟ ବିଶିଷ୍ଟ ଫ୍ୟାକ୍ଟ ଫାଇଣ୍ଡିଂ ଟିମ୍‌, ରାଜ୍ୟ ସରକାରଙ୍କ ଉଚ୍ଚଶିକ୍ଷା ବିଭାଗର ୩ ଜଣିଆ ଟିମ୍‌ ଗତ ଶନିବାର ପରଠାରୁ ତଦନ୍ତ ଲାଗି ଆଉ ଏଫ୍‌ଏମ୍‌ କଲେଜ ପରିସରକୁ ଆସିନାହାନ୍ତି। ଉଚ୍ଚଶିକ୍ଷା ବିଭାଗ ଟିମ୍‌ କେଉଁ ପରିସ୍ଥିତିରେ ଛାତ୍ରୀ ଆତ୍ମଦାହ କଲେ, ଗିରଫ ଅଭିଯୁକ୍ତ ସହକାରୀ ପ୍ରଫେସର ସମୀର କୁମାର ସାହୁଙ୍କ ଭୂମିକା, କଲେଜ ଅଧ୍ୟକ୍ଷଙ୍କ ସମେତ କଲେଜ ପ୍ରଶାସନିକ କର୍ତ୍ତୃପକ୍ଷଙ୍କ ଭୂମିକା ଆଦି ୫ଟି ଦିଗରେ ତଦନ୍ତ କରୁଥିଲେ। ‌ସେହିପରି ୟୁଜିସି ଫ୍ୟାକ୍ଟ ଫାଇଣ୍ଡିଂ ଟିମ୍‌ କଲେଜରେ ଥିବା ଅଭିଯୋଗ ଶୁଣାଣି ବ୍ୟବସ୍ଥା, ଯୌନ ନିର୍ଯାତନା ନିବାରଣ ନେଇ ଥିବା ବ୍ୟବସ୍ଥା ଆଦି ଭଳି ୬ଟି ଦିଗରେ ତଦନ୍ତ କରୁଥିଲେ। ଏହି ଦୁଇ ଟିମ୍‌ ତଦନ୍ତ ଲାଗି ଆଉ କଲେଜକୁ ଆସୁନଥିବାରୁ ସେମାନଙ୍କ ତଦନ୍ତ ଏକପ୍ରକାର ଶେଷ ହୋଇଥିବା, ସେମାନେ ସରକାରଙ୍କୁ ରିପୋର୍ଟ ପ୍ରଦାନ କରିବେ ବୋଲି କୁହାଯାଉଛି। ଏ ପରିପ୍ରେକ୍ଷୀରେ କଲେଜ ଅଧ୍ୟକ୍ଷ ଫିରୋଜ ପାଢ଼ୀ କହିଛନ୍ତି; ଗତ ୩ ଦିନ ହେବ ୟୁଜିସି, ଉଚ୍ଚଶିକ୍ଷା ବିଭାଗ ଟିମ୍‌ ତଦନ୍ତ ଲାଗି ଆସିନଥିବା ବେଳେ ସେମାନେ ଆଉ ଆସିବେ କି ନାହିଁ, ସେ ସମ୍ପର୍କରେ ଆମକୁ କିଛି ଅବଗତ କରିନାହାନ୍ତି।