ନିୟମ ମାନିଲେ ସୁଫଳ ମିଳିବ, କ୍ରମାଗତ ୨ୟ ଦିନ ପାଇଁ ଏକଅଙ୍କରେ କରୋନା ଆକ୍ରାନ୍ତଙ୍କ ସଂଖ୍ୟା
୩ ଆକ୍ରାନ୍ତ ୯ ସୁସ୍ଥ, ପଜିଟିଭ ସଂଖ୍ୟା ୪୭୦କୁ ବୃଦ୍ଧି
ବାରିପଦା: କ୍ରମାଗତ ଦ୍ବିତୀୟ ଦିନ ପାଇଁ ମୟୂରଭଞ୍ଜରେ କରୋନା ଆକ୍ରାନ୍ତଙ୍କ ସଂଖ୍ୟା ଏକ ଅଙ୍କରେ ସିମୀତ ରହିଛି। ଆଜି ଜିଲ୍ଲାରୁ ମାତ୍ର ୩ ନୂତନ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ବିଜାତଳା ବ୍ଲକ୍ରୁ ୨ଜଣ ସଙ୍ଗରୋଧ କେନ୍ଦ୍ରରୁ ଥିବାବେଳେ ବାରିପଦା ପୌରପରିଷଦରୁ ଗୃହ ସଙ୍ଗରୋଧରୁ ଜଣେ ଆକ୍ରାନ୍ତ ଚିହ୍ନଟ ହୋଇଛନ୍ତି। ଏଥି ସହିତ ଜିଲ୍ଲାରେ ପଜିଟିଭ୍ ସଂଖ୍ୟା ବୃଦ୍ଧିପାଇ ୪୭୦ରେ ପହଞ୍ଚିଛି । ସେହିପରି ଆଜି ଜିଲ୍ଲାରୁ ୯ ଜଣ ସୁସ୍ଥ ହୋଇ ଫେରିଛନ୍ତି । ଫଳରେ ଜିଲ୍ଲାରେ ସୁସ୍ଥ ସଂଖ୍ୟା ୩୩୭ ରହିଥିବା ସମୟରେ ସକ୍ରିୟ ସଂଖ୍ୟା ୧୩୧ ଏବଂ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ସୂତ୍ରରୁ ମୃତ୍ୟୁ ସଂଖ୍ୟା ୨ ଥିବାର ଜଣାପଡ଼ିଛି । ଜୁଲାଇ ୭ରୁ ଜୁଲାଇ ୧୯ ଅର୍ଥାତ୍ ୧୩ ଦିନରେ ଆକ୍ରାନ୍ତ ସଂଖ୍ୟା ୨ ଶହ ବୃଦ୍ଧି ପାଇ ୪୬୬ରେ ପହଁଞ୍ଚିଥିଲା ।
Sambad is now on WhatsApp
Join and get latest news updates delivered to you via WhatsApp
ମାତ୍ର ଗତ ଦୁଇଦିନରେ ମାତ୍ର ୪ଟି ପଜିଟିଭ୍ ସାମ୍ନାକୁ ଆସିଛି। ମୟୂରଭଞ୍ଜରେ ପ୍ରଥମ ଥର ପାଇଁ ଚଳିତ ଜୁଲାଇ ମାସର ପ୍ରତ୍ୟେକ ଶନିବାର ଓ ରବିବାର ସପ୍ତାହାନ୍ତ ସର୍ଟଡ଼ାଉନକୁ କଡ଼ାକଡ଼ି ଭାବେ କାର୍ଯ୍ୟକାରୀ କରାଯାଇଛି । ଏହାର ପ୍ରଭାବ ସିଧାସଳଖ ଭାବେ ସ୍ଥାନୀୟ ସଂକ୍ରମଣ ଉପରେ ପ୍ରତିଫଳିତ ହୋଇଥିବା ଚର୍ଚ୍ଚା ହେଉଛି । ଏହା ସଂକ୍ରମଣ ସଂଖ୍ୟା ବୃଦ୍ଧିରେ ହଠାତ୍ ବ୍ରେକ୍ ଲଗାଇଥିବା କୁହାଯାଉଛି । ତେଣୁ ଏହା ଜିଲ୍ଲାବାସୀଙ୍କ ନିମନ୍ତେ ଏକ ଶୁଭ ସଙ୍କେତ ପାଲଟିଛି । ଜନସାଧାରଣ ଲକ୍ଡାଉନର ମାର୍ଗଦର୍ଶୀକାକୁ ମାନି ପରସ୍ପର ମଧ୍ୟରେ ସର୍ବନିମ୍ନ ସାମାଜିକ ଦୂରତା ୬ ଫୁଟ ରକ୍ଷାକରିବା ସାଙ୍ଗକୁ ମାସ୍କ ପିନ୍ଧିବା ଓ ବାରମ୍ବାର ହାତକୁ ଧୋଇବା ଦ୍ୱାରା କରୋନାକୁ ଜିତି ହେବ ବୋଲି ଗତ ଜୁଲାଇ ୨୦ ଓ ୨୧ର ରିପୋର୍ଟ ପ୍ରମାଣିତ କରାଇ ଦେଇଛି ।