ଭିଜିଲାନ୍ସ ଜାଲରେ ଫରେଷ୍ଟର, ୧୩ ଲକ୍ଷ ୮୫ ହଜାର ଟଙ୍କା ଜବତ
ନୂଆପଡ଼ା : ନୂଆପଡ଼ା ଜିଲ୍ଲା କୋମନା ବନାଳ ଅଧିନ ଫରେଷ୍ଟର ଘନଶ୍ୟାମ ଶବର ନଗଦ ଟଙ୍କା ଧରି ଘରକୁ ଯାଉଥିବା ବେଳେ ଭିଜିଲାନ୍ସ ଜାଲରେ ପଡିଛନ୍ତି। ଏବେ ଭିଜିଲାନ୍ସ ଅଧିକାରୀମାନେ ଫରେଷ୍ଟରଙ୍କ ଠାରୁ ମୋଟ ନଗଦ ୧୩ ଲକ୍ଷ ୮୫ ହଜାର ଟଙ୍କା ଜବତ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଆଜି ସନ୍ଧ୍ୟାରେ କୋମନା ସେକ୍ସନ ଫରେଷ୍ଟର ଶ୍ରୀ ଶବର ନିଜ ବାଇକ(ଓଡି ୨୬ ଏଫ ୪୦୭୫)ରେ ଖଡ଼ିଆଳ ସ୍ଥିତ ନିଜ ବାସ ଭବନକୁ ଯାଉଥିଲେ। ସନ୍ଧ୍ୟାରେ ଫରେଷ୍ଟର ଶ୍ରୀ ଶବର ଲକ୍ଷାଧିକ ଟଙ୍କା ନଗଦ ଧରି ନିଜ ଘରକୁ ଯାଉଥିବା ଭିଜିଲାନ୍ସ ବିଭାଗ ପୂର୍ବରୁ ଖବର ପାଇଥିଲା। ଏହି ଖବର ଅନୁସାରେ ଭିଜିଲାନ୍ସ ବିଭାଗର ଏକ ସ୍ବତନ୍ତ୍ର ଟିମ ଛକି ବସିଥିଲା। ଫରେଷ୍ଟର ଶ୍ରୀ ଶବର କୋମନା ଅଫିସରୁ ବାହାରି ଖଡ଼ିଆଳ ବାସ ଭବନକୁ ଯିବା ବାଟରେ ଜାତୀୟ ରାଜପଥ ୩୫୩ ଉପରେ ଭିଜିଲାନ୍ସ ଟିମ ଚଢାଉ କରି ତଲାସି କରିଥିଲେ। ସେଠାରେ ଏକ ବ୍ୟାଗରେ ନଗଦ ୫ ଲକ୍ଷ ୫ ହଜାର ଟଙ୍କା ଧରିଥିଲେ। ଏହି ଟଙ୍କା କେଉଁଠୁ ଆସିଲା ବୋଲି ଫରେଷ୍ଟର ଶ୍ରୀ ଶବରଙ୍କୁ ଭିଜିଲାନ୍ସ ଅଧିକାରୀ ପଚାରିବାରୁ ସଠିକ ଉତ୍ତର ଦେଇ ପାରିନଥିଲେ। ସେଠାରେ ନଗଦ ରାଶିକୁ ଜବତ କରି ଅଧିକ ତଦନ୍ତ ଚଳାଇଥିଲେ।
ସେଠାରୁ ଫରେଷ୍ଟର ଶ୍ରୀ ଶବରଙ୍କୁ ଧରି ନିଜ ସରକାରୀ ବାସ ଭବନ ଓ ଅଫିସରେ ଚଢାଉ କରିଥିଲେ। କୋମନା ସ୍ଥିତ ସରକାରୀ ବାସ ଭବନରେ ଚଢାଉ କରି ୮ ଲକ୍ଷ ଟଙ୍କା ଠାବ କରିଥିଲେ। ପରେ ତାଙ୍କର ଅଫିସରେ ତଲାସି କରି ଟେବୁଲ ଡ୍ର ରୁ ୮୦ ହଜାର ହଜାର ଠାବ କରିଥିଲେ। ଏଭଳି ଫରେଷ୍ଟର ଶ୍ରୀ ଶବରଙ୍କ ଠାରୁ ମୋଟ ୧୩ ଲକ୍ଷ ୮୫ ହଜାର ଟଙ୍କା ଜବତ କରିବା ସହ ତାଙ୍କୁ ଗିରଫ କରିଥିଲେ। ଏବେ ରାତିରେ ଖଡ଼ିଆଳ ସ୍ଥିତ ବାସ ଭବନ ଓ ବରଗାଁ ପୈତୃକ ଘରେ ଭିଜିଲାନ୍ସ ଟିମର ଚଢାଉ ଜାରି ରହିଥିବା ଭାରପ୍ରାପ୍ତ ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ଅଜୟ ପଟ୍ଟନାୟକ ସୂଚନା ଦେଇଛନ୍ତି। ଏନେଇ ଭିଜିଲାନ୍ସ ଡିଏସପି ଦିନବନ୍ଧୁ ବେହେରାଙ୍କୁ ଯୋଗାଯୋଗ କରିବାରୁ ଫୋନ ଗ୍ରହଣ କରିନଥିବାରୁ ଅଧିକ ତଥ୍ୟ ମିଳି ପାରିନାହିଁ।