ଭୁବନେଶ୍ୱର:: ଓଡିଶା ରାଜ୍ୟ ସମବାୟ ବିଭାଗର ବରିଷ୍ଠ ଅଧିକାରୀ ବିଶ୍ୱପ୍ରକାଶ ମହାପାତ୍ରଙ୍କ ୬୯ ବର୍ଷ ବୟସରେ ୧୮ ମାର୍ଚ୍ଚ ୨୦୨୨ ଦୋଳ ପୂର୍ଣ୍ଣିମା ଦିନ ପରଲୋକ ଘଟିଛି । ଭୁବନେଶ୍ୱରର ଏକ ଘରୋଇ ଚିକିତ୍ସାଳୟରେ ଦୀର୍ଘ ଦିନ ଧରି କୋଭିଡ଼ ପରବର୍ତ୍ତୀ ସ୍ୱାସ୍ଥ୍ୟାବସ୍ଥାର ଚିକିତ୍ସା ନେଉଥିବା ବେଳେ ଶ୍ରୀ ମହାପାତ୍ରଙ୍କ ବିୟୋଗ ଘଟିଥିଲା ।
Sambad is now on WhatsApp
Join and get latest news updates delivered to you via WhatsApp
ଶ୍ରୀ ମହାପାତ୍ର ନିଜ କାର୍ଯ୍ୟକାଳ ମଧ୍ୟରେ ରାଜ୍ୟ ସମବାୟ ବିଭାଗର ପ୍ରାକ୍ତନ ଅତିରିକ୍ତ ସମବାୟ ନିବନ୍ଧକ ରହିବା ସହ ଓସ୍କାର୍ଡ ବ୍ୟାଙ୍କ ର ପରିଚାଳନା ନିର୍ଦ୍ଦେଶକ, ମାର୍କଫେଡର ପରିଚାଳନା ନିର୍ଦ୍ଦେଶକ ଏବଂ ଅଡିଟର ଜେନେରାଲ କୋ-ଅପରେଟିଭ ସୋସାଇଟିସ ଭଳି ବହୁ ଉଚ୍ଚପଦସ୍ଥ ପଦବୀରେ କାର୍ଯ୍ୟ ସମ୍ପାଦନା କରିଥିଲେ । ଶ୍ରୀ ମହାପାତ୍ରଙ୍କ ବିୟୋଗରେ ରାଜ୍ୟ ସମବାୟ ବିଭାଗ, ଯାଜପୁର ଜିଲ୍ଲା ସ୍ଥିତ ପୈତୃକ ଗ୍ରାମ କେରୁଣା ଏବଂ ଭୁବନେଶ୍ୱର ବମୀଖାଲ ଅଂଚଳରେ ଶୋକର ଛାୟା ଖେଳି ଯାଇଛି ।
ଶ୍ରୀ ମହାପାତ୍ରଙ୍କ ମୃତ୍ୟୁ ଶଯ୍ୟା ନିକଟରେ ତାଙ୍କ ଧର୍ମପତ୍ନୀ ମିନତୀ ମହାପାତ୍ରଙ୍କ ସମେତ ପୁଅ ବୋହୂ, ଝିଅ ଜ୍ୱାଇଁ, ନାତିନାତୁଣୀ ଓ ଆତ୍ମୀୟ ସ୍ଵଜନ ଉପସ୍ଥିତ ରହିଥିଲେ । ବମୀଖାଲ ଠାରେ ଥିବା ବରିଷ୍ଠ ନାଗରିକ ସଙ୍ଘର ବହୁ ମାନ୍ୟଗଣ୍ୟ ବ୍ୟକ୍ତିବିଶେଷ ଶ୍ରୀ ମହାପାତ୍ରଙ୍କ ବମୀଖାଲ ସ୍ଥିତ ବାସଭବନରେ ଶେଷ ଦର୍ଶନ କରିଥିଲେ । ଅପରାହ୍ନରେ ଶ୍ରୀ ମହାପାତ୍ରଙ୍କ ଶେଷକୃତ୍ୟ ପୁରୀ ସ୍ୱର୍ଗଦ୍ୱାର ଠାରେ ସମ୍ପନ୍ନ ହୋଇଥିଲା । ଶ୍ରୀ ମହାପାତ୍ରଙ୍କ ଏକମାତ୍ର ପୁତ୍ର ଦେବୀ ପ୍ରସାଦ ମହାପାତ୍ର ମୁଖାଗ୍ନି ଦେଇଥିଲେ ।