ବିରୋଧୀଙ୍କ ହଟ୍ଟଗୋଳ ଭିତରେ ପାରିତ ହେଲା ୪ଟି ବିଲ୍, ଆସନ୍ତାକାଲି ଯାଏଁ ଗୃହ ମୁଲତବି
ଭୁବନେଶ୍ୱର: ବିରୋଧୀ ଦଳର ନେତାଙ୍କ ହଟ୍ଟଗୋଳ ଭିତରେ ଆଜି ବିଧାନସଭାରେ ୪ଟି ବିଲ୍ ପାରିତ ହୋଇଛି। ଓଡ଼ିଶା ପଂଚାୟତ ସଂଶୋଧନ ବିଲ, ଓଡ଼ିଶା ସରକାରୀ ଜମି ବନ୍ଦୋବସ୍ତ ସଂଶୋଧନ ବିଲ୍, ଓଡ଼ିଶା ଗୃହ ବ୍ୟବସ୍ଥା ବୋର୍ଡ ସଂଶୋଧନ ବିଲ୍ ଓ ଭାରତୀୟ ଷ୍ଟାମ୍ପ ଓଡ଼ିଶା ସଂଶୋଧନ ବିଲ୍ ପାରିତ ହୋଇଛି। ଆସନ୍ତାକାଲି ଦିନ ୧୦.୩୦ ପର୍ଯ୍ୟନ୍ତ ଗୃହ ମୁଲତବି ରଖାଯାଇଛି।
ଗୃହ ମୁଲତବି ହେବା ପୂର୍ବରୁ ଗୃହରେ ଆଜି ବିରୋଧୀ ଦଳର ନେତାମାନେ ପୁଣି ଥରେ ବାଚସ୍ପତିଙ୍କ ଚାମ୍ବରକୁ ଘେରିଥିଲେ। ଉଭୟ ବିଜେପି ଓ କଂଗ୍ରେସର ବିଧାୟକମାନେ ବାଚସ୍ପତିଙ୍କୁ ତାଙ୍କ ଚେୟାରକୁ ଆସିବାକୁ ଦେଇ ନଥିଲେ। ବିରୋଧୀଙ୍କ ଘେରାଉ ଯୋଗୁଁ ବାଚସ୍ପତି ଗୃହକୁ ଆସିପାରି ନ ଥିଲେ। ଫଳରେ ବାଚସ୍ପତିଙ୍କ ବଦଳରେ ଉପବାଚସ୍ପତିଙ୍କୁ ଗୃହ ପରିଚାଳନା କରିବାକୁ ପଡ଼ିଥିଲା। ବିରୋଧୀ ଦଳମାନେ ବାଚସ୍ପତିଙ୍କ ପୋଡିୟମ ଉପରେ ହୋହଲ୍ଲା କରିଥିଲେ। ଏହାରି ଭିତରେ ଗୃହରେ ରିପୋର୍ଟ ଉପସ୍ଥାପନ ଓ ବିଲ ପାରିତ ହୋଇଛି।
ଆଜି ସକାଳେ ଖଣି ଦୁର୍ନୀତିକୁ ନେଇ ବିଧାନସଭାରେ ବିରୋଧୀ ହଙ୍ଗାମା କରିଥିଲେ । ଖଣି ଦୁର୍ନୀତି ପ୍ରସଙ୍ଗରେ ବିରୋଧୀ ଆଣିଥିବା ମୁଲତବୀ ପ୍ରସ୍ତାବ ବାଚସ୍ପତି ଗ୍ରହଣ ନକରିବାରୁ ହଙ୍ଗାମା ହୋଇଥିଲା। ପ୍ରସ୍ତାବକୁ ବାଚସ୍ପତି ଗ୍ରହଣ ନ କରିବାରୁ ଗୃହରେ ହୋହାଲା କରିଥିଲେ କଂଗ୍ରେସ ସଦସ୍ୟ। ବାଚସ୍ପତିଙ୍କ ପୋଡିୟମ ତଳେ ନାରାବାଜି କରିଥିଲେ। ବିଜେପି ସଦସ୍ୟମାନେ ବି ଗୃହର ମଧ୍ୟ ଭାଗକୁ ଆସି ହଟ୍ଟଗୋଳ କରିଥିଲେ।