ସମ୍ପତ୍ତି ଭାଗବଣ୍ଟାକୁ ନେଇ ହଣାକଟା, ସାନପୁଅ ଆକ୍ରମଣରେ ୪ ଆହତ

ରାମଚନ୍ଦ୍ରପୁର : ରାମଚନ୍ଦ୍ରପୁର ଥାନା ଅନ୍ତର୍ଗତ ଅଳତି ଗ୍ରାମରେ ଭାଗ ବଣ୍ଟାକୁ କେନ୍ଦ୍ର କରି ସାନ ପୁଅର ଆକ୍ରମଣରେ ପରିବାରର  ୪ ସଦସ୍ୟ ଆହତ ହୋଇଛନ୍ତି। ଅଳତି ଗ୍ରାମର ଶ୍ରୀନିବାସ ଧଳ (୮୦)ଙ୍କ ତିନି ପୁଅ ସନ୍ତୋଷ, ସଂଜୟ ଏବଂ ଶରତ। ତିନିହେଁ ବିବାହ ପରେ ନିଜର ପିଲାଛୁଆଙ୍କୁ ଧରି ଅଲଗା ଅଲଗା ରହି ଆସୁଥିଲେ । କିନ୍ତୁ କିଛି ଦିନ ହେଲା ଜମିବାଡ଼ି ଭାଗ ବଣ୍ଟାକୁ କେନ୍ଦ୍ର କରି ସାନପୁଅ ଶରତ ଧଳ(୩୫) ବଡ଼ ପୁଅ ସନ୍ତୋଷ ଏବଂ  ପରିବାର ଅନ୍ୟ ସଦସ୍ୟଙ୍କ ସହିତ ମାନ ମନାନ୍ତର ରହି ଆସିଥିଲା । କିଛି ଦିନ  ହେଲା ନିଜ ଘରକୁ ବିଦ୍ୟୁତ୍ ସଂଯୋଗ ଆଣିବାକୁ ନେଇ ବାପା ଶ୍ରୀନିବାସ ସହିତ ସାନପୁଅ ଶରତର କଥା କଟାକଟି ହୋଇଥିଲା।

ଗୁରୁବାର ସକାଳୁ  ସାନପୁଅ ଶରତ ହାତରେ ଏକ ଧାରୁଆ ଅସ୍ତ୍ର ଧରି ଅଶ୍ଳୀଳ ଭାଷାରେ ଗାଳି ଗୁଲଜ କରିବା ସହିତ ଅତର୍କିତ ଭାବେ ପରିବାର ଲୋକଙ୍କୁ  ମରଣାତ୍ମକ ଆକ୍ରମଣ କରିଥିଲା। ଏହି ଆକ୍ରମଣରେ ଶ୍ରୀନିବାସଙ୍କ  ବଡ଼ପୁଅ  ସନ୍ତୋଷ ଧଳ(୫୨), ନାତୁଣୀ  ସ୍ବପ୍ନା ଧଳ (୧୮), ସ୍ତ୍ରୀ ସତ୍ୟଭାମା ଧଳ(୭୫), ଅବିବାହିତ ଝଅ ସ୍ବପ୍ନିତା ଧଳ (୩୩) ଗୁରୁତର ଭାବେ ଆହାତ ହୋଇଥିଲେ। ସେମାନଙ୍କୁ ସାଇଁକୁଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। ଏଥିନେଇ ପରିବାର ପକ୍ଷରୁ ରାମଚନ୍ଦ୍ରପୁର ଥାନାରେ ଏତଲା ଦାଏର ହୋଇଛି । ପୁଲିସ ୩୦୭/୨୨ ରେ ଏକ ମାମଲା ରୁଜୁ ଘଟଣାର ସରଜମିନ ତଦନ୍ତ କରି ଅଭିଯୁକ୍ତକୁ ଧରିବାକୁ ପ୍ରୟାସ ଜାରି ରଖିଛି।