ଅନ୍ତଃରାଜ୍ୟ ଟ୍ରେନ୍ ଡକାୟତି ଗ୍ୟାଙ୍ଗ୍ର ୪ ଗିରଫ
ରାଉରକେଲା : ମୁମ୍ବାଇ-ହାୱଡା ରୁଟ୍ର ଏକ୍ସପ୍ରେସ୍ ଓ ପାସେଞ୍ଜର ଟ୍ରେନଗୁଡ଼ିକରେ ଡକାୟତି କରୁଥିବା ଏକ ଗ୍ୟାଙ୍ଗର ୪ ଜଣଙ୍କୁ ରେଳବାଇ ପୁଲିସ ଗିରଫ କରିଛି। ଗତକାଲି ରାତି ପ୍ରାୟ ୧୦ଟାରେ ସେମାନେ କଲୁଙ୍ଗା ଷ୍ଟେସନ ନିକଟରେ ଟାଟା- ବିଳାସପୁର ପାସେଞ୍ଜର ଟ୍ରେନରୁ ଡକାୟତି ଉଦ୍ୟମ କରୁଥିବାବେଳେ ପୁଲିସ ହାତରେ ଧରା ପଡ଼ିଛନ୍ତି। ଗିରଫ ଡାକାୟତମାନେ ହେଲେ ଚତୁରୀ ମଣ୍ଡଳ, ବିପିନ କୁମାର, ପିଣ୍ଟୁ ରାଜ ଓ ଅମରଜିତ୍ କୁମାର। ସେମାନେ ସମସ୍ତେ ବିହାର ରାଜ୍ୟର ମୁଙ୍ଗେରର ନିବାସୀ। ଡକାୟତମାନଙ୍କ ନିକଟରୁ ୫ଟି ମୋବାଇଲ, ଦୁଇଟି ଭୁଜାଲି, ଛୁରି, ବ୍ଲେଡ, ନଗଦ ୭ ହଜାର ଟଙ୍କା, ଲୁଟ୍ ମନିପର୍ସ ଓ ଆଧାର କାର୍ଡ ଆଦି ଜବତ ହୋଇଛି। ଏମାନଙ୍କ ନାଁରେ ରାଉରକେଲା, ଝାରସୁଗୁଡ଼ା ସମେତ ଅନ୍ୟ ରେଳବାଇ ଥାନାରେ ଏକାଧିକ ଆପରାଧିକ ମାମଲା ରହିଛି।