ହରଭଙ୍ଗା: ବୌଦ୍ଧ-ଫୁଲବାଣୀ ସୀମାନ୍ତ ଗେଟାମୁଣ୍ଡା ଗାଁରେ ଦୋକାନକୁ କୁରକୁରି କିଣି ଘରକୁ ଫେରିବା ସମୟରେ ୪ବର୍ଷର ଶିଶୁର ଅଜଣା କାର ଧକ୍କାରେ ମୃତ୍ୟୁ ଘଟିଛିା ମୃତକଙ୍କ ପରିବାରକୁ କ୍ଷତିପୂରଣ ଦାବିରେ ଗ୍ରାମବାସୀ ଫୁଲବାଣୀ-ଚାରିଛକ ରାସ୍ତା ଅବରୋଧ କରିଥିବା ଜଣାଯାଇଛି। ମୃତ ଶିଶୁର ନାଁ ବିନାୟକ ପ୍ରଧାନ।
Sambad is now on WhatsApp
Join and get latest news updates delivered to you via WhatsApp
ପ୍ରାପ୍ତ ସୂଚନା ମତେ ଗେଟମୁଣ୍ଡା ଗ୍ରାମର ବିଛନ୍ଦ ପ୍ରଧାନଙ୍କ ପୁଅ ବିନାୟକ କୁରକୁରି ଖାଇବା ପାଇଁ ମାଙ୍କ ପାଖରେ ଅଳି କରିଥିଲା। ମା’ ତାକୁ ୫ ଟଙ୍କା ଦେବାରୁ ସେ କୁରକୁରି କିଣିବାକୁ ଯାଇଥିଲା। ରାସ୍ତା ଆରପଟକୁ ଯାଉଥିବା ବେଳେ ଫୁଲବାଣୀ ପଟୁ ଦ୍ରୁତ ଗତିରେ ଆସୁଥିବା ଏକ କାର ପିଲାଟିକୁ ଧକ୍କା ଦେଇଥିଲା। ଫଳରେ ବିନାୟକ ସଂଜ୍ଞାହୀନ ହୋଇ ରାସ୍ତାରେ ପଡ଼ିଥିଲା।
ସ୍ଥାନୀୟ ଲୋକେ ଓ ପରିବାର ଲୋକେ ତାଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ପୁରୁଣାକଟକ ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏ ଖବର ପାଇବା ପରେ ଗ୍ରାମବାସୀ ଉତ୍ୟକ୍ତ ହୋଇ ମୃତକଙ୍କ ପରିବାରକୁ ଆର୍ଥିକ କ୍ଷତିପୂରଣ ଯୋଗାଇ ଦେବା ଦାବିରେ ସ୍ଥାନୀୟ ରାଜପଥ ଅବରୋଧ କରିଥିଲେ। ଫଳରେ ଯାତାୟତ ପ୍ରଭାବିତ ହୋଇଥିଲା।