ବନ୍ଧୁଙ୍କୁ ଘର ବାହାରପଟୁ ତାଲା ପକାଇ ମୋବାଇଲ ଫୋନ ଓ ୮୦୦୦ ଟଙ୍କା ନେଇଗଲା ସାଙ୍ଗ
ଧଉଳି: ଧଉଳି ଥାନା ଶିଶୁପାଳଗଡ଼ (ଲକ୍ଷ୍ମୀବିହାର) ଅଞ୍ଚଳରେ ଗତକାଲି ରାତି ୨ଟା ବେଳେ ଜଣେ ସାଙ୍ଗ ତାଙ୍କର ଅନ୍ୟ ଦୁଇ ସାଙ୍ଗକୁ ବାହାରପଟୁ ତାଲା ପକାଇ ଗୋଟିଏ ମୋବାଇଲ ଫୋନ ସହିତ ନଗଦ ୮ ହଜାର ଟଙ୍କା ଲୁଟି ନେଇଛି। ଘର ଭିତରେ ଲୁଟର ଶିକାର ସାଙ୍ଗ ସନ୍ତୋଷ କୁମାର ନାୟକଙ୍କ ସମେତ ଅନ୍ୟଜଣେ ଏସଂପର୍କରେ ଆଜି ପୂର୍ବାହ୍ନରେ ଧଉଳି ଥାନାରେ ଲିଖିତ ଅଭିଯୋଗ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସନ୍ତୋଷଙ୍କ ଅଭିଯୋଗ ଅନୁସାରେ ଯାଜପୁର ଜିଲ୍ଲା ମଙ୍ଗଳପୁର ଥାନା ଅଧୀନ କୁନିଆଁପୁର ଗ୍ରାମର ଜଣେ ଯୁବକଙ୍କ ସହ ସାଙ୍ଗ ହୋଇ ୩ଜଣଯାକ ସାଙ୍ଗ ହୋଇ ଲକ୍ଷ୍ମୀବିହାରରେ ଘରଭଡ଼ା ନେଇ ରହୁଥିଲେ। ଗତକାଲି ରାତିରେ ସନ୍ତୋଷଙ୍କ ସମେତ ଅନ୍ୟ ସାଙ୍ଗକୁ ବାହାରପଟୁ ତାଲା ପକାଇ ଅଭିଯୁକ୍ତ ଯୁବକ ମୋବାଇଲ ଫୋନ ନେଇ ଫେରାର ହୋଇଯାଇଥିଲା। ଆଜି ସକାଳେ ଡାକ ପକାଇବାରୁ ସ୍ଥାନୀୟ ଲୋକ କବାଟା ତାଲା ଭାଙ୍ଗି ଉଭୟଙ୍କୁ ଉଦ୍ଧାର କରିଥିଲେ। ହେଲେ ରିପୋର୍ଟ ଲେଖା ହେବା ବେଳକୁ ଚୋରି ମୋବାଇଲ ଫୋନ ଓ ଟଙ୍କା ସନ୍ତୋଷ ଫେରିପାଇନଥିବା ଜଣାପଡ଼ିଛି। ପୁଲିସ ଚୋରି ମୋବାଇଲ ଫୋନକୁ ଟ୍ରାକିଂ କରି ଲୁଟେରାଙ୍କ ନିକଟରେ ପହଞ୍ଚିବାକୁ ଚେଷ୍ଟା କରୁଛି। ସନ୍ତୋଷଙ୍କ ଅଭିଯୋଗକୁ ଭିତ୍ତିକରି ଥାନାରେ ଏକ ମାମଲା ରୁଜୁ ହୋଇଛି।