କଟକରେ ହେବନି ସାର୍ବଜନୀନ ଗଣେଶ ପୂଜା, ଦୁର୍ଗାପୂଜା ନେଇ ସନ୍ଦେହ
କଟକ: ଚଳିତ ବର୍ଷ କଟକବାସୀଙ୍କୁ ଆକର୍ଷଣୀୟ ଗଣେଶ ପୂଜା ଦେଖିବାକୁ ସୁଯୋଗ ମିଳିପାରିବ ନାହିଁ । କରୋନା ଭାଇରସ କଟକଣା ପାଇଁ ଆଜି ଶାନ୍ତି ଓ ପୂଜା କମିଟି ସହ କମିସନରେଟ ପୁଲିସର ଗୁରୁତ୍ୱପୂର୍ଣ୍ଣ ବୈଠକରେ ଏଭଳି ନିଷ୍ପତ୍ତି ହୋଇଛି । ସର୍ବସାଧାରଣ କିମ୍ବା କୌଣସି ସଂସ୍ଥା ପକ୍ଷରୁ ଗଣେଶ ପୂଜା କରାଯାଇପାରିବ ନାହିଁ । ଗଣେଶ ପୂଜା ବ୍ୟତୀତ ପ୍ରସିଦ୍ଧ ଦୁର୍ଗାପୂଜା ନେଇ ମଧ୍ୟ ଦ୍ୱନ୍ଦ୍ୱ ଉପୁଜିଛି । ଯଦି ପରିସ୍ଥିତିରେ କୌଣସି ସୁଧାର ନଆସୁଛି, କଟକ ସହରରେ ଦୁର୍ଗାପୂଜାର ଝଲକ ମଧ୍ୟ ଦେଖାଯିବ ନାହିଁ । ପ୍ରଶାସନ ପକ୍ଷରୁ ପରାମର୍ଶ ଦିଆଯାଇଛି ଯେ, ଏବେଠାରୁ ଦଶହରା ପାଇଁ କୌଣସି ପୂର୍ବ ପ୍ରସ୍ତୁତି କରା ନଯାଉ ।
Sambad is now on WhatsApp
Join and get latest news updates delivered to you via WhatsApp
ଡିସିପି ଅଖିଳେଶ୍ୱର ସିଂହ କହିଛନ୍ତି, ଚଳିତ ବର୍ଷ କଟକ କମିସନରେଟ ଅଂଚଳରେ କୌଣସି ସଂସ୍ଥା ପକ୍ଷରୁ ଗଣେଶ ପୂଜାର ଆୟୋଜନ କରିପାରିବେ ନାହିଁ । କେବଳ ଘରେ ପୂଜା ହୋଇପାରିବ । ଗଣେଶ ପୂଜା ନେଇ ଡିସିପିଙ୍କ କାର୍ଯ୍ୟାୟଳରେ ଅନୁଷ୍ଠିତ ବୈଠକରେ ଶାନ୍ତି କମିଟିର କର୍ମକର୍ତ୍ତାମାନେ ଉପସ୍ଥିତ ଥିଲେ ।
କଟକରେ ଯଦିଓ କୌଣସି ସଂସ୍ଥା କିମ୍ବା ସର୍ବସାଧାରଣସ୍ଥଳରେ ଗଣେଶ ପୂଜା ଅନୁଷ୍ଠିତ ହୋଇପାରିବ ନାହିଁ, କିନ୍ତୁ ପରିସ୍ଥିତିକୁ ଦୃଷ୍ଟିରେ କେବଳ ମୂର୍ତ୍ତି କିମ୍ବା ଘଟ ପୂଜା କରାଯାଇପାରିବ । ସ୍ଥିତି ଦେଖି ପରବର୍ତ୍ତୀ ବୈଠକରେ ନିଷ୍ପତ୍ତି ନିଆଯିବ ବୋଲି କହିଛନ୍ତି, କଟକ ମହାନଗର ନିଗମର ସଂପାଦକ ପ୍ରଭାତ ତ୍ରିପାଠୀ । ସେ କହିଛନ୍ତି, ଲୋକେ ବ୍ୟକ୍ତିଗତ ଭାବରେ ଘରେ ପୂଜା କରିବାରେ କୌଣସି ଅସୁବିଧା ନାହିଁ ।
ସୂଚନାଯୋଗ୍ୟ, ଐତିହାସିକ ସହର କଟକରେ ଗଣେଶ ପୂଜା ଠାରୁ ପୂଜା ଋତୁ ଆରମ୍ଭ ହୋଇଯାଇଥାଏ । ଭାଇଚାରର ସହରରେ ପ୍ରାୟ ସାଢ଼େ ୩ ହଜାର କ୍ଲବ ରହିଥିବା ବେଳେ ଏଥିରୁ ପ୍ରାୟ ଅଢ଼େଇ ହଜାର କ୍ଲବ ପକ୍ଷରୁ ଗଣେଶ ପୂଜାର ଆୟୋଜନ କରାଯାଇଥାଏ । କିନ୍ତୁ ସହରରେ ପ୍ରାୟ ଦେଢ଼ ଶହ ଅନୁଷ୍ଠାନ ଆକର୍ଷଣୀୟ ଭାବେ ଗଣେଶ ପୂଜାର ଆୟୋଜନ କରିଥାନ୍ତି ।